ရန်ကုန်တိုင်းဒေသကြီးအတွင်း ဖြေရှင်းရန် ခက်ခဲနေဆဲ ဖြစ်သည့် လျှပ်စစ်မီးတိုင်များတွင် ဆက်သွယ်ရေးကြိုးများ ရှုပ်ထွေးမှုများကို ဖြေရှင်းရန် ဆက်သွယ်ရေးကြိုးများကို မြေအောက်ချိတ်ဆက်မှုစနစ် အမြန်ဆုံးပြောင်းလဲမည်ဟု ရန်ကုန်တိုင်းဒေသကြီးဝန်ကြီးချုပ် ဦးအောင်နိုင်သူက ပြောကြားခဲ့သည်။
နိုင်ငံတော်သမ္မတ၏ (မေ ၂ ရက်) ရန်ကုန်တိုင်းဒေသကြီး ခရီးစဉ်လမ်းညွှန်ချက်များအပေါ် လိုက်နာအကောင်အထည်ဖော်ရေး လုပ်ငန်းညှိနှိုင်းအစည်းအဝေး၌ ရန်ကုန်တိုင်းဒေသကြီးဝန်ကြီးချုပ် ဦးအောင်နိုင်သူက ပြောကြားခြင်းလည်း ဖြစ်သည်။
ယင်းသို့ ပြောကြားရာတွင် ယင်းဆက်သွယ်ရေးကြိုးများကို သက်ဆိုင်ရာ တိုင်းဒေသကြီးအစိုးရ တာဝန်ရှိသူများနှင့် ဌာနဆိုင်ရာများ၊ ဆက်သွယ်ရေးကုမ္ပဏီများ ပူးပေါင်း၍ (Under Ground Cable Network) ချိတ်ဆက်မှုစနစ်ကို အမြန်ပြင်ဆင် ဆောင်ရွက်ရန် ရန်ကုန်တိုင်းဒေသကြီးဝန်ကြီးချုပ် ဦးအောင်နိုင်သူက မှာကြားသည်။
ထို့အပြင် ရန်ကုန်တိုင်းဒေသကြီးအတွင်း ရပ်ကွက်နှင့်လမ်းများအတွင်း ရေမြောင်းများ ရေစီးရေလာ ကောင်းမွန်စေရေးအတွက် ရေစီးသည့်ပမာဏ (Water Volume) ချိန်ဆခြင်း ရေမြောင်းများအတွက် (Survey) တိုင်းတာခြင်းတို့ကို နည်းပညာတက္ကသိုလ်မှ ကျောင်းသား ကျောင်းသူများ အကူအညီရယူ၍ ကွင်းဆင်းပူးပေါင်းစိစစ်ရန်မှာကြားပြီး မြောင်းများ ပိတ်ဆို့ခြင်း မဖြစ်စေရေး ရေစီးလမ်းကြောင်းတစ်လျှောက် ဖြောင့်ဖြူး စေရေးအတွက် မသင့်လျော်သော မလိုအပ်သည့် လူကူးတံတားများ၊ သစ်ပင်များ ရှင်းလင်းခြင်းတို့ကို ဦးစားပေးလုပ်ငန်းအဖြစ် အမြန်ဆောင်ရွက်ရန်လည်း ရန်ကုန်တိုင်းဝန်ကြီးချုပ်က မှာကြားခဲ့သည်။