မြန်မာနှင့် ထိုင်းနိုင်ငံအကြား ကုန်သွယ်မှုနှင့် ရင်းနှီးမြှုပ်နှံမှုကဏ္ဍများ ပိုမိုအားကောင်းလာစေရန်အတွက် ထိုင်းဘတ်ငွေကို အကျိုးရှိရှိ အသုံးပြုသွားမည့် အခြေအနေများနှင့် နည်းပညာပူးပေါင်းဆောင်ရွက်ရေးဆိုင်ရာ ကိစ္စရပ်များကို နှစ်နိုင်ငံတာဝန်ရှိသူများအကြား နေပြည်တော်တွင် တွေ့ဆုံဆွေးနွေးခဲ့ကြသည်။
ဧပြီလ ၂၈ ရက် နံနက်ပိုင်းက ပြုလုပ်သည့် ဤတွေ့ဆုံပွဲတွင် မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါက်တာခင်နိုင်ဦးနှင့် မြန်မာနိုင်ငံဆိုင်ရာ ထိုင်းနိုင်ငံသံရုံး ယာယီတာဝန်ခံ Mr. Yordying Supasri တို့က နှစ်နိုင်ငံဘဏ်လုပ်ငန်းဆိုင်ရာ မဟာဗျူဟာများကို အလေးပေးတိုင်ပင်ခဲ့ကြခြင်း ဖြစ်သည်။
တွေ့ဆုံမှုအတွင်း ထိုင်းသံရုံးယာယီတာဝန်ခံက မြန်မာနိုင်ငံတော်ဗဟိုဘဏ်၏ နိုင်ငံခြားငွေလဲလှယ်နှုန်းဆိုင်ရာ ပံ့ပိုးကူညီမှုများကို ကျေးဇူးတင်ရှိကြောင်း ပြောကြားခဲ့သည်။
ထို့ပြင် ပို့ကုန်ရငွေများကို မြန်မာကျပ်ငွေသို့ လဲလှယ်ရသည့် မူဝါဒအား ဗဟိုဘဏ်က တဖြည်းဖြည်းချင်း ဖြေလျှော့ပေးခဲ့ခြင်းကို ထိုင်းစီးပွားရေးလုပ်ငန်းရှင်များက ကြိုဆိုလျက်ရှိကြောင်းနှင့် မြန်မာနိုင်ငံအတွင်း၌ ထိုင်းဘတ်ငွေကို အသုံးပြုကာ ရင်းနှီးမြှုပ်နှံမှုလုပ်ငန်းများ ပိုမိုတိုးချဲ့လုပ်ကိုင်လိုသည့် ဆန္ဒရှိကြောင်းလည်း အပြုသဘောဆောင် ဆွေးနွေးခဲ့သည်။
ဗဟိုဘဏ်ဥက္ကဋ္ဌ ဒေါက်တာခင်နိုင်ဦးက ပြန်လည်ဆွေးနွေးရာတွင် လက်ရှိ၌ ဗဟိုဘဏ်အနေဖြင့် ငွေကြေးတည်ငြိမ်မှုနှင့် ငွေကြေးဖောင်းပွမှု လျော့ကျစေရေးကို အဓိကထား ဆောင်ရွက်နေကြောင်း အသိပေးခဲ့သည်။
ထို့ပြင် မြန်မာနိုင်ငံတွင် ထိုင်းဘတ်ငွေကို ကုန်သွယ်မှုတွင်သာမက ရင်းနှီးမြှုပ်နှံမှုကဏ္ဍများတွင်ပါ ကျယ်ကျယ်ပြန့်ပြန့် အသုံးပြုနိုင်ရန် လမ်းဖွင့်ပေးထားကြောင်းနှင့် ငွေပေးချေမှုစနစ်များ ပိုမိုခိုင်မာလာစေရန် ထိုင်းနိုင်ငံရှိ ဘဏ်များနှင့် နည်းပညာဆိုင်ရာ ညှိနှိုင်းပူးပေါင်းဆောင်ရွက်မှုများ ဆက်လက်လုပ်ဆောင်သွားမည်ဖြစ်ကြောင်း ပြောကြားခဲ့သည်။
ဤကဲ့သို့ မြန်မာ-ထိုင်း နှစ်နိုင်ငံအကြား ငွေရေးကြေးရေးနှင့် ဘဏ်လုပ်ငန်းနည်းပညာရပ်များတွင် နီးကပ်စွာ လက်တွဲဆောင်ရွက်လာခြင်းသည် နှစ်နိုင်ငံကုန်သွယ်မှု စီးဆင်းမှုကို ပိုမိုမြန်ဆန်ချောမွေ့စေမည့်အပြင်၊ အိမ်နီးချင်းနိုင်ငံဖြစ်သည့် ထိုင်းနိုင်ငံမှ ရင်းနှီးမြှုပ်နှံမှုအသစ်များ စီးဝင်လာစေရန်အတွက် အလားအလာကောင်းသည့် ခြေလှမ်းတစ်ရပ်လည်း ဖြစ်သည်။