မြန်မာ့သာသနာရေးသမိုင်းတွင် အထူးထင်ရှားသည့် (၇၀) ပြည့် အထိမ်းအမှတ် ဆဋ္ဌသင်္ဂါယနာတင်အောင်ပွဲ မဟာမင်္ဂလာအခမ်းအနားကို ရန်ကုန်မြို့၊ ကမ္ဘာအေးကုန်းမြေရှိ မဟာပါသာဏလိုဏ်ဂူတော်ကြီး၌ ကဆုန်လပြည့်နေ့တွင် စည်ကားသိုက်မြိုက်စွာ ကျင်းပသွားမည် ဖြစ်သည်။
အဆိုပါ ထူးခြားမွန်မြတ်သည့် သာသနာ့အောင်ပွဲ အခမ်းအနားများကို ပြည်သူများ ကြည်ညိုနိုင်စေရန်အတွက် ရုပ်သံလိုင်းများမှတစ်ဆင့် တိုက်ရိုက်ထုတ်လွှင့်ပြသသွားမည်ဟု သိရသည်။
မဟာမင်္ဂလာအခမ်းအနား ကျင်းပပုံများကို ဧပြီလ (၃၀) ရက်နေ့တွင် MRTV HD Channel မှ တို-က်ရို-က်ထုတ်လွှင့်မည်ဖြစ်ပြီး၊ ဧပြီလ (၃၀) ရက်နေ့မှ မေလ (၂) ရက်နေ့အထိ ကျင်းပမည့် အစီအစဉ်အသီးသီးကိုမူ MRTV Parliament Channel တွင် နေ့စဉ်ထုတ်လွှင့်ပြသသွားရန် စီစဉ်ထားသည်။ ထို့ပြင် ဧပြီလ (၃၀) ရက်နေ့ ညပိုင်းတွင် ကျင်းပမည့် ဓမ္မသဘင်အခမ်းအနားကိုလည်း MRTV Farmers Channel တွင် တို-က်ရို-က် (Live) ကြည့်ရှုနိုင်မည်ဖြစ်ကာ MRTV HD Channel တွင်လည်း ထိုနေ့ည (၉) နာရီဝန်းကျင်၌ ပြန်လည်ပြသ (Delay) သွားမည် ဖြစ်သည်။
ယခုနှစ် (၇၀) ပြည့် အထိမ်းအမှတ်ပွဲတွင် ထူးခြားချက်အနေဖြင့် အထိမ်းအမှတ် ကျောက်စာတိုင်နှင့် သာသနာရေးဆိုင်ရာ ပြခန်းများကိုပါ ထည့်သွင်းပြသသွားမည်ဖြစ်သည်။ မဟာပါသာဏလိုဏ်ဂူသိမ်တော်ကြီး၏ အတွင်းပတ်လမ်းတွင် ပထမသင်္ဂါယနာမှ ဆဋ္ဌသင်္ဂါယနာအထိ အဆင့်ဆင့် သင်္ဂါယနာတင်ခဲ့သည့် သမိုင်းဝင်ပြကွက်များကို လေ့လာနိုင်မည် ဖြစ်သည်။
ယင်းအပြင် မျက်မှောက်ကာလတွင် သာသနာတော် တိုးတက်ထွန်းကား ပြန့်ပွားရေးအတွက် နိုင်ငံတော်အစိုးရ၏ သာသနာပြု လုပ်ငန်းဆောင်ရွက်ချက်များကိုလည်း စုံလင်စွာ ခင်းကျင်းပြသထားမည် ဖြစ်သည်။
ဗုဒ္ဓဘာသာဝင်များအတွက် အလွန်အားရကြည်နူးဖွယ်ကောင်းသည့် ဤနှစ် (၇၀) ပြည့် အောင်ပွဲအခမ်းအနားသည် သာသနာတော် တည်တံ့ပြန့်ပွားရေးအတွက် အရေးပါသည့် မှတ်တိုင်တစ်ခုဖြစ်သကဲ့သို့၊ အစဉ်အဆက် သင်္ဂါယနာတင်ခဲ့သည့် သမိုင်းကြောင်းများကိုပါ တစ်နေရာတည်းတွင် ကြည့်ရှုလေ့လာနိုင်မည့် ထူးခြားသည့် အခွင့်အရေးတစ်ခုလည်း ဖြစ်သည်။