မြန်မာနိုင်ငံအနေဖြင့် နိုင်ငံအားလုံးနှင့် ဆက်ဆံရာတွင် အားသာချက်၊ အားနည်းချက် မခွဲခြားဘဲ လွတ်လပ်၍ တက်ကြွသည့် နိုင်ငံခြားရေးမူဝါဒကို ကျင့်သုံးလျက်ရှိကြောင်း နိုင်ငံတော်သမ္မတ ဦးမင်းအောင်လှိုင်က ပြောကြားသည်။
နိုင်ငံတော်သမ္မတက နိုင်ငံအချင်းချင်း သံတမန်ဆက်ဆံရေးသည် သက်ဆိုင်ရာနိုင်ငံများအတွက် အရေးကြီးသည့် ကဏ္ဍတစ်ခုဖြစ်ကြောင်း၊ ခေါင်းဆောင်အချင်းချင်း ဆက်ဆံရေး၊ အစိုးရအချင်းချင်း ဆက်ဆံရေး၊ သံတမန်ရေးရာဆက်ဆံမှုနှင့် စီးပွားရေးပူးပေါင်းဆောင်ရွက်မှုများ အပါအဝင် ကဏ္ဍပေါင်းစုံတွင် ဆက်စပ်လျက်ရှိကြောင်း ပြောကြားခဲ့သည်။
ထို့ပြင် မြန်မာနိုင်ငံအနေဖြင့် မိမိတို့ ရွေးချယ်ကျင့်သုံးနေသည့် နိုင်ငံရေးစနစ်ကို ခိုင်မာစွာ အကောင်အထည်ဖော် ဆောင်ရွက်ခဲ့ခြင်းကြောင့် နိုင်ငံတကာဆက်ဆံရေးကဏ္ဍတွင် တိုးတက်မှုများ ရရှိလာခြင်းဖြစ်ကြောင်း ၎င်းက ဆိုသည်။
နိုင်ငံတော်သမ္မတက လက်ရှိရရှိထားသည့် တိုးတက်မှုများကို ပိုမိုခိုင်မာအောင် ဆက်လက်ဆောင်ရွက်သွားမည်ဖြစ်ပြီး နိုင်ငံတကာဆက်ဆံရေးတွင် မြန်မာနိုင်ငံ၏ ပါဝင်ဆောင်ရွက်မှုကို ယခင်ထက် ပိုမိုတိုးတက်ကောင်းမွန်လာစေရန် ကြိုးပမ်းသွားမည်ဖြစ်ကြောင်း ပြောကြားခဲ့သည်။
ထို့အပြင် နိုင်ငံတကာမှ တာဝန်ရှိသူများနှင့် အဖွဲ့အစည်းများ၏ လာရောက်တွေ့ဆုံမှုများသည် နိုင်ငံအတွက် အခွင့်အလမ်းများဖြစ်ကြောင်း၊ ယင်းအခွင့်အလမ်းများကို မှန်ကန်ရိုးသားစွာ အသုံးချနိုင်ပါက နိုင်ငံဖွံ့ဖြိုးတိုးတက်ရေးအတွက် အထောက်အကူဖြစ်စေမည်ဟု ဆိုသည်။
“ကျွန်တော်တို့ လုပ်ဆောင်နေတဲ့ နိုင်ငံရေးစနစ်နဲ့ စီးပွားရေးစနစ်ဟာ တိုင်းပြည်ကောင်းမွန်ဖွံ့ဖြိုးလာစေရေးကို ရည်ရွယ်ပြီး ရိုးသားစွာ အကောင်အထည်ဖော်နေခြင်းဖြစ်ပါတယ်” ဟု နိုင်ငံတော်သမ္မတက ပြောကြားခဲ့သည်။
နှစ်နိုင်ငံဆက်ဆံရေးများတွင်လည်း ရိုးသားမှုကို အခြေခံကာ နိုင်ငံအားလုံးနှင့် လွတ်လပ်၍ တက်ကြွသည့် နိုင်ငံခြားရေးမူဝါဒကို ကျင့်သုံးလျက်ရှိကြောင်း၊ ယင်းမူဝါဒသည် မြန်မာနိုင်ငံအတွက် အခိုင်မာဆုံး ရပ်တည်ချက်ဖြစ်ကြောင်း ၎င်းက ထည့်သွင်းပြောကြားသည်။
ထို့ပြင် မြန်မာနိုင်ငံသည် နှင့် အပါအဝင် အိမ်နီးချင်းနိုင်ငံများနှင့် ငြိမ်းချမ်းစွာ အတူယှဉ်တွဲနေထိုင်ရေးမူကြီး (၅) ရပ်ကို အခြေခံ၍ ပူးပေါင်းဆက်ဆံလျက်ရှိပြီး ယင်းဆက်ဆံရေးများကြောင့် မြန်မာနိုင်ငံ၏ အနာဂတ်အလားအလာမှာ ကောင်းမွန်လျက်ရှိကြောင်း နိုင်ငံတော်သမ္မတက ပြောကြားခဲ့သည်။