ရန်ကုန်၊ ဇူလိုင် ၂၈
ရန်ကုန်မြို့အတွင်း ဓာတ်အားပျောက်ဆုံးမှု လျှော့ချရေးနှင့် ဓာတ်အားဖြန့်ဖြူးမှုပိုမိုကောင်းမွန်စေရေး ရည်ရွယ်၍ ဒဂုံမြို့သစ်(ဆိပ်ကမ်း)မြို့နယ်ရှိ အမှတ်(၂) ဓာတ်အားခွဲရုံကို ခေတ်မီ Switch Gear စနစ်သစ်များဖြင့် အဆင့်မြှင့်တင် ဆောင်ရွက်ပြီးစီးခဲ့ကြောင်း သိရသည်။
အမှတ်(၂) ဓာတ်အားခွဲရုံ [၃၃/၁၁ ကေဗွီ (၂၀) အမ်ဗွီအေ] တွင် ယခင်အသုံးပြုခဲ့သည့် စက်ကိရိယာဟောင်းများကို ဖယ်ရှားကာ ၁၂ ကေဗွီ ဗို့အားထိန်းချုပ်နိုင်သည့် အဝင်တစ်လိုင်း၊ အထွက်ခြောက်လိုင်းပါ ခေတ်မီ Switch Gear များဖြင့် ဇူလိုင် ၂၆ ရက်က ရန်ကုန်လျှပ်စစ်ဓာတ်အားပေးရေးကော်ပိုရေးရှင်း (YESC) ဝန်ထမ်းများက စနစ်တကျ အစားထိုးတပ်ဆင်ခဲ့သည်။
ယင်းအဆင့်မြှင့်တင်မှုသည် ဓာတ်အားဖြန့်ဖြူးမှုစနစ်၏ ယုံကြည်စိတ်ချရမှုကို မြှင့်တင်ပေးနိုင်မည့်အပြင် ဓာတ်အားပျောက်ဆုံးမှု လျော့နည်းစေရေးကိုလည်း အထောက်အကူပြုမည်ဖြစ်ကြောင်း သိရသည်။
ထို့ပြင် မိုးရာသီအတွင်း ရေကြီးရေလျှံမှုကြောင့် ဓာတ်အားပြတ်တောက်မှုများ မဖြစ်ပေါ်စေရန် ရည်ရွယ်၍ ဓာတ်အားခွဲရုံအဆောက်အအုံကိုလည်း မူလအမြင့်ထက် နှစ်ပေခန့် ပိုမိုမြှင့်တင် တည်ဆောက်ထားကြောင်း သိရသည်။
Photo- YESC
