ဒေသတွင်းလုံခြုံရေးနှင့် တည်ငြိမ်ရေးအတွက် ရုရှား-မြောက်ကိုရီးယား ပူးပေါင်းဆောင်ရွက်မှု တိုးမြှင့်နေဟု ပူတင်ပြော

မော်စကို၊ ဩဂုတ် ၁၅

ရုရှားနှင့် မြောက်ကိုရီးယားတို့သည် နယ်ပယ်အသီးသီးတွင် ပူးပေါင်းဆောင်ရွက်လျက်ရှိပြီး ဒေသတွင်းလုံခြုံရေးနှင့် တည်ငြိမ်ရေးဆိုင်ရာ လုပ်ငန်းစဉ်များကိုလည်း ညှိနှိုင်းဆောင်ရွက်နေကြောင်း ရုရှားသမ္မတ ဗလာဒီမာပူတင်က မြောက်ကိုရီးယားခေါင်းဆောင် ကင်မ်ဂျုံအန်ထံ ပြောကြားခဲ့သည်ဟု မြောက်ကိုရီးယားနိုင်ငံပိုင် KCNA သတင်းဌာနက ဖော်ပြသည်။

ဂျပန်ကိုလိုနီအုပ်ချုပ်မှုအောက်မှ ကိုရီးယားလွတ်မြောက်ရေး နှစ်ပတ်လည်နေ့အထိမ်းအမှတ်အဖြစ် ကင်မ်ဂျုံအန်ထံ ပေးပို့သည့် သတင်းစကားတွင် ရုရှားနှင့် မြောက်ကိုရီးယားတို့အနေဖြင့် နှစ်နိုင်ငံဆက်ဆံရေးနှင့် နိုင်ငံတကာရေးရာကိစ္စများ၌ အပြုသဘောဆောင်သည့် ပူးတွဲဆောင်ရွက်မှုများကို ဆက်လက်လုပ်ဆောင်နိုင်မည်ဟု ယုံကြည်ကြောင်း ပူတင်က ပြောကြားခဲ့သည်။

ကင်မ်ဂျုံအန်သည် ဩဂုတ် ၁၄ ရက်က ပြုံယမ်းမြို့ရှိ လွတ်မြောက်ရေးမျှော်စင်သို့ သွားရောက်ကာ ဒုတိယကမ္ဘာစစ်အတွင်း ဂျပန်တပ်များကို တိုက်ခိုက်ခဲ့သည့် ဆိုဗီယက်စစ်သည်များအား ဂုဏ်ပြုခဲ့ကြောင်း KCNA က ဖော်ပြသည်။

နှစ်နိုင်ငံအကြား တိုက်ပွဲဝင်ချစ်ကြည်ရင်းနှီးမှု၏ သမိုင်းဝင်အမွေအနှစ်သည် လက်ရှိတိုးချဲ့လာနေသည့် နှစ်နိုင်ငံဆက်ဆံရေးအတွက် အခြေခံအုတ်မြစ်တစ်ရပ်ဖြစ်ကြောင်း ကင်မ်ဂျုံအန်က ပြောကြားခဲ့သည်။

ရုရှားသမ္မတဟောင်း ဒီမီထရီ မက်ဗီဒက်ကလည်း ကင်မ်ဂျုံအန်ထံ နှုတ်ခွန်းဆက်သဝဏ်လွှာ ပေးပို့ခဲ့ကြောင်း သိရသည်။

ယခုကဲ့သို့ နှစ်နိုင်ငံခေါင်းဆောင်များအကြား သဝဏ်လွှာများ အပြန်အလှန်ပေးပို့ခြင်းနှင့် သမိုင်းဝင်ဆက်ဆံရေးကို အလေးထားဖော်ပြခြင်းတို့သည် မော်စကိုနှင့် ပြုံယမ်းအကြား ပိုမိုနက်ရှိုင်းလာသည့် ဆက်ဆံရေးကို ထင်ဟပ်စေကြောင်း Asia One သတင်းကို ကိုးကား၍ သိရသည်။