AYA Tri-Nation Cup 2026 ပြိုင်ပွဲတွင် ချန်ပီယံဆုရရှိနိုင်မည့် အခွင့်အရေးနှင့်အတူ ယှဉ်ပြိုင်ကစားမည့် မြန်မာ့လက်ရွေးစင် အမျိုးသမီးအသင်းနှင့် ထိုင်းလက်ရွေးစင် အမျိုးသမီးအသင်းတို့၏ ပွဲစဉ်ကို ဇွန် ၉ ရက်တွင် ကျင်းပသွားမည်ဖြစ်သည်။
အဆိုပါပြိုင်ပွဲအတွက် ပွဲကြိုသတင်းစာရှင်းလင်းပွဲကို ဇွန် ၈ ရက် နံနက်ပိုင်းက ရန်ကုန်မြို့ရှိ သုဝဏ္ဏအားကစားကွင်း၌ ကျင်းပပြုလုပ်ခဲ့သည်။
သတင်းစာရှင်းလင်းပွဲတွင် မြန်မာ့လက်ရွေးစင် အမျိုးသမီးအသင်း နည်းပြချုပ် Mitsuo Kato က “ထိုင်းအသင်းဟာ မြန်မာအသင်းထက် ကမ္ဘာ့အဆင့်သတ်မှတ်ချက် ပိုမိုမြင့်မားပါတယ်။ ဒါကြောင့် ဒီပွဲဟာ ကျွန်တော်တို့အတွက် ခက်ခဲတဲ့ပွဲတစ်ပွဲ ဖြစ်လာမှာပါ။ ဒါပေမဲ့ အသင်းကို ကောင်းမွန်စွာ ပြင်ဆင်ထားပြီး ကစားသမားတွေလည်း အဆင်သင့်ဖြစ်နေကြပါပြီ။ လာမယ့်ပွဲစဉ်တွေအတွက် အတွေ့အကြုံကောင်းတွေ ရရှိနိုင်ဖို့နဲ့ ရလဒ်ကောင်းတစ်ခု ရယူနိုင်ဖို့ အကောင်းဆုံးကြိုးစားကစားသွားမှာ ဖြစ်ပါတယ်” ဟု ပြောကြားခဲ့သည်။
မြန်မာ့လက်ရွေးစင် အမျိုးသမီးအသင်းခေါင်းဆောင် ခင်မာလာထွန်းကလည်း “အသင်းအနေနဲ့ အကောင်းဆုံး ပြင်ဆင်ထားပါတယ်။ ကစားသမားအားလုံး အဆင်သင့်ဖြစ်နေပြီး ဒဏ်ရာရရှိထားသူလည်း မရှိပါဘူး။ ဒါကြောင့် ပွဲစဉ်မှာ အကောင်းဆုံးကြိုးစားကစားပြီး အနိုင်ရလဒ်ရယူနိုင်ဖို့ ကြိုးပမ်းသွားမှာပါ” ဟု ပြောကြားခဲ့သည်။
မြန်မာ့လက်ရွေးစင် အမျိုးသမီးအသင်းသည် ထိုင်းအသင်းအား ဂိုးပြတ်အနိုင်ရရှိနိုင်ပါက AYA Tri-Nation Cup 2026 ပြိုင်ပွဲ၏ ချန်ပီယံဆုကို ဆွတ်ခူးနိုင်မည်ဖြစ်ကြောင်း သိရသည်။