တောင်ငူ နန်းတော်ရာ နေရာနှင့် ကေတုမတီ မြို့ရိုးအား ပြန်လည်ဖော်ထုတ်နိုင်ရန်နှင့် ကျုံးကိုလည်း ပြန်လည် ထိန်းသိမ်းဆောင်ရွက်ရန်လိုအပ်ကြောင်း နိုင်ငံတော်စီမံအုပ်ချုပ်ရေး ကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က မှာကြားလိုက်သည်။
ဒုတိယဝန်ကြီးချုပ်နှင့် ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဗိုလ်ချုပ်ကြီး မြထွန်းဦးက တောင်ငူမြို့ရှောင် ရထားလမ်းတည်ဆောက်ရန် လျာထားဆောင်ရွက်လျက်ရှိမှု အခြေအနေများကို ဇူလိူင် ၃ရက်နေ့က ရှင်းလင်းတင်ပြရာတွင် ဗိုလ်ချုပ်မှူးကြီး မင်းအောင်လှိုင်က မှာကြားခဲ့ခြင်း ဖြစ်သည်။
မိမိတို့၏ သမိုင်းကြောင်းအရ အထင်ကရရှိခဲ့သည့် ဘုရင့်နန်းတော်များအား အဖြစ်နိုင်ဆုံး ဖော်ထုတ်ထိန်းသိမ်းစောင့်ရှောက်ရန်လိုကြောင်း၊ တောင်ငူနန်းတော်ရာနေရာနှင့် ကေတုမတီမြို့ရိုးအား ပြန်လည်ဖော်ထုတ်နိုင်ရေးဆောင်ရွက်ရန်နှင့် ပြောင်းရွှေ့ရန်လိုအပ်သည့် ဝန်ကြီးဌာနအဆောက်အဦများကို ပြောင်းရွှေ့သွားရန်လိုကြောင်း၊ သာသနိကအဆောက်အဦများကို လက်ရှိအချိန်တွင် ပြောင်းရွှေ့ခြင်း မပြုရန် လိုကြောင်း၊ ကျုံးကိုလည်း ပြန်လည်ထိန်းသိမ်းဆောင်ရွက်ရန်လိုကြောင်း၊ ကေတုမတီမြို့ရိုးများ ပြန်လည်ထိန်းသိမ်းနိုင်ရေးအတွက် ဆောင်ရွက်ရာတွင် ဖြစ်နိုင်ဖွယ်ရာအချက်အလက်များနှင့်အညီ ဆောင်ရွက်သွားရန်လိုကြောင်း ဗိုလ်ချုပ်မှူးကြီး မင်းအောင်လှိုင်က ပြောကြားသည်။
မန္တလေးနန်းတော်ရှိ မင်္ဂလာတံတားတစ်စင်းဖြစ်သည့် စည်ရှည်တံတားနှင့်ပတ်သက်၍ ပြန်လည် တည်ဆောက်ရန် လိုအပ်သည့်အချက်အလက်များနှင့် အထောက်အထားများပြည့်စုံအောင် ပြုစုဆောင်ရွက်ရန်၊ ပြန်လည်တည်ဆောက်ရာတွင်လည်း ရှေးမူမပျက် မူလပုံစံအတိုင်း တည်ဆောက်သွားနိုင်ရန်အတွက်လည်း နစက ဥက္ကဋ္ဌက မှာကြားခဲ့ကြောင်း သိရသည်။
အလားတူ တံတားနှင့်ဆက်စပ်လျက်ရှိသည့် လမ်းများကိုလည်း ကောင်းမွန်အောင် ပြင်ဆင် ဆောင်ရွက်သွားရန်လိုကြောင်း၊ နိုင်ငံသားအားလုံးအနေဖြင့် မိမိတို့နိုင်ငံ၏ သမိုင်းကိုတန်ဖိုးထား ထိန်းသိမ်းသွားရန်လိုကြောင်း၊ တောင်ငူဘူတာတည်ဆောက်ရန်အတွက် လျာထားသည့်မြေမှ လယ်ယာမြေများအား ကြိုတင်ဖော်ထုတ်ပေးရန်လိုကြောင်း၊ တိုးချဲ့မြိုသစ်ကို စနစ်တကျပုံစံထုတ်လုပ်ပြီးမှ ဆောင်ရွက်ရန် လိုကြောင်း၊ တောင်ငူမြို့ရှောင်ရထားလမ်းတည်ဆောက်ရာတွင်လည်း ရေရှည်အတွက်စဉ်းစား၍ ဆောင်ရွက်သွားရန်လိုကြောင်းဖြင့် ဗိုလ်ချုပ်မှူးကြီး မင်းအောင်လှိုင်က မှာကြားသည်။
