အောက်တိုဘာ ၁၆ ရက်နံနက်ပိုင်းက နစက ဥက္ကဋ္ဌမှ NCA (၈)နှစ်မြောက်နှစ်ပတ်လည်နေ့အခမ်းအနားတက်ရောက်ခဲ့သည့် တိုင်းရင်းသားလက်နက် ကိုင်အဖွဲ့များ၏ ကိုယ်စားလှယ်များအား နေပြည် တော်၌တွေ့ဆုံစဥ် ပြောကြားခဲ့ခြင်းဖြစ်သည်။
တို့တာဝန်အရေးသုံးပါးနှင့်ပါတီစုံဒီမိုကရေစီစနစ်လျှောက်လှမ်းမှုကို ထိခိုက်မှုမရှိပါက တပ်မတော်အနေဖြင့်တွေ့ဆုံဆွေးနွေးမှုများကို ဆောင်ရွက်သွားမည်ဖြစ်ကာ နိုင်ငံတော်နှင့်တပ်မတော်အနေ ဖြင့် NCA လမ်းကြောင်းပေါ်တွင် ဆက်လက်လျှောက်လှမ်းလျက်ရှိသည်ဟု ဆိုသည်။
ထို့ပြင် နစက အနေဖြင့် တိုင်းပြည်သာယာဝပြောရေး၊စားရေရိက္ခာပေါများရေး၊စစ်မှန်၍ စည်းကမ်းပြည့်ဝသည့် ပါတီစုံဒီမိုကရေစီစနစ်ခိုင်မာရေး၊ဒီမိုကရေစီနှင့်ဖက်ဒရယ်ကိုအခြေခံသည့် ပြည်ထောင်စုတည်ဆောက်ရေးတို့ကို အကောင် အထည်ဖော်ဆောင်ရွက်လျက်ရှိပြီး တိုင်းပြည် ကောင်းစေရန် သက်ဆိုင်သူအားလုံးက တူညီသည့်ဆန္ဒများဖြင့်ဆောင်ရွက်ရန်လိုအပ်သည်ဟု ဆိုသည်။
ထို့အတူ တိုင်းပြည်တည်ငြိမ်အေးချမ်းရေးနှင့်ဒေသအလိုက်တည်ငြိမ်အေးချမ်းရေးအတွက် ဝိုင်းဝန်းဆောင်ရွက်သွားရန်လိုအပ်ကာ တပ်မတော်အနေဖြင့် ပြည်တွင်းငြိမ်းချမ်းရေးလုပ်ငန်းများဆောင်ရွက်ရာတွင် စိတ်ရှည်သည်းခံစွာဖြင့် ဆောင်ရွက်လျက်ရှိသည်ဟု ဆိုသည်။
ထို့ပြင် မိမိတို့အနေဖြင့် နိုင်ငံတည်ငြိမ်အေးချမ်းရေးနှင့်ဖွံ့ဖြိုးတိုးတက်ရေးလုပ်ငန်းများဆောင် ရွက်ရာ၌ “ရှေ့သို့ချီမည်ပန်းတိုင်ဆီ”ဆောင်ပုဒ်အတိုင်းကြိုးပမ်းဆောင်ရွက်လျက်ရှိ၍ တိုင်းရင်း သားလက်နက်ကိုင်အဖွဲ့များအားလုံးကလည်း ပါဝင်ဆောင်ရွက်ကြစေလိုသည်ဟု နစက ဥက္ကဋ္ဌက တိုက်တွန်းပြောကြားခဲ့သည်။
ထို့အတူ တိုင်းရင်းသားလက်နက်ကိုင်အဖွဲ့များ၏ ကိုယ်စားလှယ်များမှလည်း NCA နှင့်ပတ်သက်၍ အချို့အဖွဲ့အစည်းများကပျက်ပြယ်ပြီဟုထုတ်ပြန်မှုများရှိသော်လည်း NCA စာချုပ်မှာပျက် ပြယ်မှုမရှိဘဲတည်တံ့ခိုင်မြဲနေဆဲဖြစ်ပြီး NCA လမ်းကြောင်းပေါ်၌ ခိုင်ခိုင်မာမာဆက်လက်လျှောက်လှမ်းလျက်ရှိသည်ဟု ဆွေးနွေးပြောကြားခဲ့ကြသည်။
ထို့ပြင် ပြည်တွင်းငြိမ်းချမ်းရေးရရှိရန် ရှေ့ဆက် ဆောင်ရွက်သင့်သည့် အကြံပြုချက်များ၊ NCA တွင်ပါဝင်မှုမရှိသေးသည့် တိုင်းရင်းသားလက် နက်ကိုင်အဖွဲ့များ NCA တွင်ပါဝင်လာနိုင်ရေးဆောင်ရွက်သင့်သည့် အခြေအနေများ၊ပြည်တွင်းငြိမ်းချမ်းမှုရရှိရေးနှင့်ဒေသအလိုက်ဖွံ့ဖြိုးတိုး တက်မှုများရှိစေရေးအတွက် ဆောင်ရွက်သင့်သည့် အခြေအနေများ၊ဒေသအလိုက် ပညာရည်မြင့်မားရေးအတွက်ဆောင်ရွက်သင့်သည့် အခြေ အနေများကို ဆွေးနွေးတင်ပြခဲ့ကြသည်။
နစက ဥက္ကဋ္ဌအား KNU/KNLA(PC)ဥက္ကဋ္ဌ စောထော့လေး၊ ရခိုင်လွတ်မြောက်ရေးပါတီ(ALP) ဥက္ကဋ္ဌ စောမြရာဇာလင်း၊ လားဟူဒီမိုကရက်တစ်အစည်းအရုံး(LDU) ဥက္ကဋ္ဌ ကျာဆော်လမွန်၊ KKO အဖွဲ့မှ ကွပ်ကဲရေးမှူး စောဘငြိမ်း၊ ပအိုဝ်းအမျိုး သားလွတ်မြောက်ရေးအဖွဲ့ချုပ် ဥက္ကဋ္ဌ ခွန်သူရိန်၊ ပအိုဝ်းအမျိုးသားလွတ်မြောက်ရေးအဖွဲ့ချုပ် နာယက ခွန်ဥက္ကာ၊ မွန်ပြည်သစ်ပါတီ(NMSP) ဗဟိုအလုပ် အမှုဆောင် နိုင်ဗညားလယ်၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ် ဦး(ABSDF) ဒု-ဥက္ကဋ္ဌ ဦးမျိုးဝင်းတို့မှ လာရောက်တွေ့ဆုံခဲ့ကြခြင်းဖြစ်သည်။
