မန္တလေး၊ စက်တင်ဘာ ၉
တရုတ်နိုင်ငံ Shanghai University Medical School မှ နှလုံးနှင့်သွေးကြောခွဲစိတ်ဆိုင်ရာ ဆေးပညာရှင်အဖွဲ့နှင့် မန္တလေးပြည်သူ့ဆေးရုံကြီး၊ နှလုံးနှင့်သွေးကြောခွဲစိတ်ကုဌာနတို့ ပူးပေါင်း၍ နှလုံးသွေးကြောပိတ်လူနာ ခြောက်ဦးကို နှလုံးစက်အသုံးမပြုဘဲ နှလုံးသွေးကြောအစားထိုးဖြတ်ကျော်ဆက်သွယ်ခြင်း (Off-Pump Coronary Artery Bypass Surgery) ဖြင့် အောင်မြင်စွာ ခွဲစိတ်ကုသပေးနိုင်ခဲ့ကြောင်း သိရသည်။
တရုတ်နိုင်ငံ ရှန်ဟိုင်းမြို့ရှိ Yida Hospital, Shanghai University Medical School မှ Department of Cardiovascular Surgery Center ၏ Chairman and Professor ဖြစ်သူ Dr. Feng Wan ဦးဆောင်သည့် ဆေးပညာရှင်ငါးဦးပါအဖွဲ့သည် မန္တလေးပြည်သူ့ဆေးရုံကြီး၊ နှလုံးနှင့်သွေးကြောခွဲစိတ်ကုဌာနနှင့် ပူးပေါင်း၍ ဩဂုတ် ၂၄ ရက်မှ ၂၇ ရက်အထိ အဆိုပါခွဲစိတ်ကုသမှုများ ဆောင်ရွက်ပေးခဲ့ခြင်းဖြစ်သည်။
ခွဲစိတ်ကုသမှုခံယူခဲ့သည့် လူနာခြောက်ဦးကို မန္တလေးပြည်သူ့ဆေးရုံကြီး၊ နှလုံးနှင့်သွေးကြောခွဲစိတ်ကုဌာန၌ လိုအပ်သည့် ဆေးကုသမှုများ ဆက်လက်ပေးလျက်ရှိပြီး ကျန်းမာရေးအခြေအနေများ တိုးတက်ကောင်းမွန်လျက်ရှိကြောင်း သိရသည်။
ပါမောက္ခ Dr. Feng Wan သည် ၂၀၀၈ ခုနှစ်မှစ၍ မြန်မာနိုင်ငံရှိ ပြည်သူ့ဆေးရုံကြီးများ၏ နှလုံးနှင့်သွေးကြောခွဲစိတ်ကုဌာနများနှင့် ပူးပေါင်းကာ နှလုံးနှင့်သွေးကြောခွဲစိတ်ကုသမှုများ ဆောင်ရွက်ပေးလျက်ရှိသည်။ ၂၀၂၇ ခုနှစ်တွင်လည်း မြန်မာနိုင်ငံသို့ ထပ်မံလာရောက်၍ နှလုံးခွဲစိတ်ကုသမှုများ ဆောင်ရွက်ပေးရန်နှင့် နှလုံးနှင့်သွေးကြောခွဲစိတ်ပညာ ဘွဲ့လွန်ကျောင်းသား၊ ကျောင်းသူများအား လေ့ကျင့်သင်ကြားပေးရန် စီစဉ်ထားကြောင်း သိရသည်။
မန္တလေးပြည်သူ့ဆေးရုံကြီး၊ နှလုံးနှင့်သွေးကြောခွဲစိတ်ကုဌာနတွင် မွေးရာပါနှလုံးရောဂါ၊ နှလုံးအဆို့ရှင်ဆိုင်ရာရောဂါ၊ နှလုံးသွေးကြောပိတ်ရောဂါနှင့် နှလုံးသွေးလွှတ်ကြောမကြီးဆိုင်ရာ ခွဲစိတ်ကုသမှုများကို ပုံမှန်ဆောင်ရွက်ပေးလျက်ရှိသည်။
အဆိုပါဌာနအနေဖြင့် ၂၀၂၅ ခုနှစ်အတွင်း အကြီးစားခွဲစိတ်ကုသမှု ၁၅ ခု ဆောင်ရွက်ခဲ့ပြီး ၂၀၂၆ ခုနှစ် ဇန်နဝါရီမှ ဩဂုတ်လအထိ အကြီးစားခွဲစိတ်ကုသမှု ၄၀ အထိ ဆောင်ရွက်နိုင်ခဲ့ကြောင်း သိရသည်။