နေပြည်တော်၊ ဇူလိုင် ၂၅
စစ်ကိုင်းမြို့နယ်တွင် လစဉ်မီတာမဖတ်ရှုဘဲ ခန့်မှန်းယူနစ်များဖြင့် ဓာတ်အားခတောင်းခံနေမှုနှင့်ပတ်သက်၍ မီတာဖတ်ချက်အမှန်ရရှိရေး ဆောင်ရွက်လျက်ရှိကြောင်း လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီး ဦးအေးကျော်က လွှတ်တော်တွင် ပြန်လည်ဖြေကြားခဲ့သည်။
တတိယအကြိမ် အမျိုးသားလွှတ်တော် ဒုတိယပုံမှန်အစည်းအဝေး (၂၁) ရက်မြောက်နေ့တွင် စစ်ကိုင်းတိုင်းဒေသကြီး အမျိုးသားလွှတ်တော်ကိုယ်စားလှယ် ဦးဝင်းတင့်က စစ်ကိုင်းမြို့နယ်ရှိ လျှပ်စစ်မီတာများကို ခန့်မှန်းယူနစ်များဖြင့် ငွေတောင်းခံနေမှုအပေါ် မေးမြန်းခဲ့ရာ ဒုတိယဝန်ကြီးက ယင်းကဲ့သို့ ပြန်လည်ရှင်းလင်းခဲ့ခြင်းဖြစ်သည်။
ဒုတိယဝန်ကြီးက ယခင်က စစ်ကိုင်းမြို့ပေါ်ရှိ ရပ်ကွက်အားလုံးတွင် မီတာဖတ်ရှုခြင်းနှင့် ဓာတ်အားခတောင်းခံလွှာ ပေးဝေခြင်းကို ပုံမှန်ဆောင်ရွက်နိုင်ခဲ့သော်လည်း ကိုဗစ်-၁၉ ကပ်ရောဂါကာလနှင့် ၂၀၂၁ ခုနှစ်နောက်ပိုင်း နယ်မြေအခြေအနေများကြောင့် အချို့ရပ်ကွက်များတွင် မီတာဖတ်ရှုခြင်း မဆောင်ရွက်နိုင်ခဲ့သဖြင့် ယခင်သုံးစွဲခဲ့သည့် တစ်နှစ်တာပျမ်းမျှယူနစ်များအပေါ် အခြေခံ၍ ဓာတ်အားခတွက်ချက် တောင်းခံခဲ့ရကြောင်း ပြောကြားသည်။
လက်ရှိတွင် နယ်မြေလုံခြုံရေးအခြေအနေပေါ် မူတည်၍ ဝန်ထမ်းများက မီတာဖတ်ရှုခြင်းနှင့် ရပ်မိရပ်ဖများ၏ အကူအညီဖြင့် ဓာတ်အားခကောက်ခံခြင်းများကို ဆောင်ရွက်လျက်ရှိပြီး ဒေသခံများ၏ ပူးပေါင်းကူညီမှု ပိုမိုရရှိရေးအတွက် လွှတ်တော်ကိုယ်စားလှယ်၏ ပံ့ပိုးကူညီမှုကိုလည်း မေတ္တာရပ်ခံခဲ့ကြောင်း သိရသည်။
ထို့ပြင် မီတာယူနစ်ဖတ်ချက်နှင့် ဓာတ်အားခတောင်းခံငွေ ကိုက်ညီစေရေး ဆက်လက်ကြိုးပမ်းသွားမည်ဖြစ်ပြီး၊ ယူနစ်ကြွေးကျန်များရှိသည့် မီတာများကိုလည်း ပြည်သူများ တစ်ကြိမ်တည်း ငွေပမာဏများစွာ ပေးဆောင်ရခြင်းမရှိစေရန် အရစ်ကျပေးဆောင်နိုင်ရေး ဖြေလျှော့ဆောင်ရွက်ပေးလျက်ရှိကြောင်း ဒုတိယဝန်ကြီး ဦးအေးကျော်က ပြန်လည်ဖြေကြားခဲ့သည်။