၂၀၂၆ ခုနှစ်မှ ၂၀၂၇ ခုနှစ်အထိ အာဆီယံ ပညာရေးကဏ္ဍ၏ သဘာပတိအဖြစ် တာဝန်ယူမည့် စင်ကာပူနိုင်ငံသည် အင်္ဂါနေ့က ထုတ်ပြန်ခဲ့သည့် “အာဆီယံ ပညာရေးဆိုင်ရာ လုပ်ငန်းစီမံကိန်း ၂၀၂၆-၂၀၃၀” အရ ပညာရေးကဏ္ဍတွင် ဉာဏ်ရည်တု (AI) သုံးစွဲမှု၊ STEM (သိပ္ပံ၊ နည်းပညာ၊ အင်ဂျင်နီယာနှင့် သင်္ချာ) ပညာရေးနှင့် ကျောင်းသားများ၏ ဘက်စုံဖွံ့ဖြိုးတိုးတက်မှုတို့ကို အဓိကထားသည့် ဒေသတွင်း အစီအစဉ်များကို ဦးဆောင်ကျင်းပသွားမည် ဖြစ်သည်။
စင်ကာပူနိုင်ငံ၌ ကျင်းပခဲ့သည့် (၁၄) ကြိမ်မြောက် အာဆီယံ ပညာရေးဝန်ကြီးများ အစည်းအဝေးတွင် ပညာရေးဝန်ကြီးများက အဆိုပါ လုပ်ငန်းစီမံချက်ကို စတင်မိတ်ဆက်ခဲ့ခြင်းဖြစ်ပြီး ရည်ရွယ်ချက်မှာ ကျွမ်းကျင်မှုမြင့်မားပြီး ယှဉ်ပြိုင်နိုင်စွမ်းရှိသော လုပ်သားထုနှင့်အတူ ဘက်စုံထက်မြက်၍ ကြံ့ကြံ့ခံနိုင်စွမ်းရှိသည့် လူသားအရင်းအမြစ်များကို ပြုစုပျိုးထောင်ပေးရန်ဖြစ်ကြောင်း စင်ကာပူ ပညာရေးဝန်ကြီးဌာန၏ သတင်းထုတ်ပြန်ချက်တွင် ဖော်ပြထားသည်။
ထို့အပြင် အဆိုပါ စီမံကိန်း သည် အာဆီယံ၏ ဘုံတန်ဖိုးများကို ကိုယ်စားပြုသော အာဆီယံ စရိုက်လက္ခဏာ ကို ပိုမိုအားကောင်းခိုင်မာလာစေရန်လည်း ဦးတည်ဆောင်ရွက်မည်ဖြစ်ကြောင်း ဝန်ကြီးဌာနက ဆိုသည်။
ကျင်းပရန် စီစဉ်ထားသည့် အစီအစဉ်များတွင် အာဆီယံအဖွဲ့ဝင် နိုင်ငံများ၊ တရုတ်၊ ဂျပန်၊ တောင်ကိုရီးယားနှင့် အာဆီယံ ဆွေးနွေးဖက်နိုင်ငံများ ပါဝင်မည့် ပညာရေးကဏ္ဍဆိုင်ရာ AI ဆွေးနွေးပွဲ၊ STEM လူငယ်စခန်း၊ တက္ကသိုလ်ကျောင်းသားများအတွက် နွေရာသီ သင်တန်းအစီအစဉ်နှင့် ပြင်ပလူငယ်စခန်းတို့ ပါဝင်သည်။
စင်ကာပူနိုင်ငံ၏ စရို-က်လက္ခဏာနှင့် နိုင်ငံသားဆိုင်ရာ ပညာရေးဗဟိုဌာန သည် လာမည့် နိုဝင်ဘာလတွင် ဒေသတွင်း သုတေသန ကွန်ရက်တစ်ခုကို ဦးဆောင်သွားမည်ဖြစ်ပြီး အာဆီယံအဖွဲ့ဝင် နိုင်ငံများအနေဖြင့် မိမိတို့၏ နိုင်ငံ့ သင်ရိုးညွှန်းတမ်းများတွင် စာရိတ္တနှင့် အမွေအနှစ်တန်ဖိုးထားမှုဆိုင်ရာ ပညာရေးကို မည်သို့ ဒီဇိုင်းရေးဆွဲ အကောင်အထည်ဖော်ထားသည်ဆိုသည့် အလေ့အထများကို အပြန်အလှန် ဖလှယ်နိုင်ကြမည် ဖြစ်သည်။
Ref: ဆင်ဟွာ