ဂျပန်နိုင်ငံ၊ အိချိနဂိုယာမြို့တွင် ကျင်းပပြုလုပ်မည့် (၂၀) ကြိမ်မြောက် အာရှအားကစားပြိုင်ပွဲ၌ မြန်မာနိုင်ငံအနေဖြင့် အားကစားနည်း ၅ မျိုး ဝင်ရောက်ယှဉ်ပြိုင်သွားမည်ဖြစ်ကြောင်း သိရသည်။
အဆိုပါ အာရှအားကစားပြိုင်ပွဲကို ဂျပန်နိုင်ငံ အိချိနဂိုယာမြို့နှင့် အိချိပရီဖက်ချာမြို့များတွင် စက်တင်ဘာ ၁၉ ရက်မှ အောက်တိုဘာ ၄ ရက်နေ့အထိ ကျင်းပသွားမည်ဖြစ်ပြီး အချို့သော အားကစားနည်းများကိုမူ စက်တင်ဘာ ၁၄ ရက်နေ့ကတည်းက စတင်ကျင်းပမည်ဖြစ်သည်။
ယခုနှစ် အာရှအားကစားပြိုင်ပွဲတွင် အားကစားနည်း ၄၆ မျိုး၏ ပြိုင်ပွဲအမျိုးအစားပေါင်း ၄၆၉ မျိုး ပါဝင်မည်ဖြစ်ကာ အာရှအိုလံပစ်ကောင်စီဝင် ၄၆ နိုင်ငံမှ အားကစားသမားပေါင်း ၁၀၀၀၀ ကျော် ပါဝင်ယှဉ်ပြိုင်ကြမည်ဖြစ်သည်။
မြန်မာနိုင်ငံအနေဖြင့် အဆိုပါပြိုင်ပွဲကြီးတွင် ပိုက်ကျော်ခြင်း၊ အမျိုးသမီးဘောလုံး၊ ထပ်ဘော (Teqball)၊ ဂျူဒို၊ e-Sports စသည့် အားကစားနည်း ၅ မျိုးဖြင့် ပါဝင်ယှဉ်ပြိုင်သွားမည်ဖြစ်သည်။ မြန်မာအဖွဲ့မှ ယှဉ်ပြိုင်မည့် အားကစားနည်းများအနက် အမျိုးသမီးဘောလုံးပြိုင်ပွဲမှာ အစောဆုံး စတင်ယှဉ်ပြိုင်ရမည်ဖြစ်ပြီး အောင်မြင်မှုရရှိရန်အတွက်လည်း ပြိုင်ပွဲကြို လေ့ကျင့်ပြင်ဆင်မှုများစွာ ပြုလုပ်ထားကြောင်း သိရသည်။
ပြီးခဲ့သည့် ၂၀၂၂ ဟန်ကျိုး အာရှအားကစားပြိုင်ပွဲတွင် မြန်မာနိုင်ငံအနေဖြင့် ရွှေတံဆိပ် ၁ ခုနှင့် ကြေးတံဆိပ် ၂ ခု ဆွတ်ခူးနိုင်ခဲ့ရာ ပိုက်ကျော်ခြင်း အမျိုးသား ၄ ယောက်တွဲပြိုင်ပွဲမှ ရွှေတံဆိပ်ဆုနှင့် နဂါးလှေပြိုင်ပွဲမှ ကြေးတံဆိပ် ၂ ခု ရယူနိုင်ခဲ့ခြင်းဖြစ်သည်။