စက်သုံးဆီအရောင်းဆိုင်များတွင် QR Code/ Barcode စနစ်အသုံးပြု၍ ရောင်းချရာ၌ သတ်မှတ်ထားသည့် ညွှန်ကြားချက်များအတိုင်း လိုက်နာမှုမရှိသည့် ဆိုင် ၂၀ အား စိစစ်ဖော်ထုတ်၍ ထိရောက်စွာ အရေးယူဆောင်ရွက်ခဲ့ကြောင်း လျှပ်စစ်နှင့်စွမ်းအင်ဝန်ကြီးဌာနမှ သတင်းထုတ်ပြန်ထားသည်။
လျှပ်စစ်နှင့်စွမ်းအင်ဝန်ကြီးဌာနသည် အရောင်းဆိုင်များမှ ယာဉ်များ၏ QR/Barcode ကို Scan ဖတ်၍ ရောင်းချသည့် ပမာဏပေါ် မူတည်ပြီး စက်သုံးဆီဝယ်ယူခွင့် (PO) များကို ခွဲဝေပေးလျက်ရှိသည်။
ယင်းရောင်းချမှု အခြေအနေများကိုလည်း Online Monitoring Center မှတစ်ဆင့် စဉ်ဆက်မပြတ် စောင့်ကြည့်စစ်ဆေးလျက်ရှိသည်။
စနစ်မှန်ကန်ရေးအတွက် ဆိုင်သို့ အမှန်တကယ် လာရောက်ဝယ်ယူသည့် ယာဉ်များကိုသာ Scan ဖတ်ရောင်းချရန်နှင့် မသမာသော နည်းလမ်းဖြင့် ရောင်းအားမြင့်တက်အောင် ဆောင်ရွက်ပါက ရေနံနှင့်ရေနံထွက်ပစ္စည်းဆိုင်ရာ ဥပဒေဖြင့် အရေးယူမည်ဖြစ်ကြောင်း လုပ်ငန်းရှင်များအား ကြိုတင်အသိပေးထားပြီးဖြစ်သည်။
သို့သော်လည်း အချို့အရောင်းဆိုင်များသည် မူရင်း QR ကို Scan မဖတ်ဘဲ ယာဉ်နံပါတ်များကို ရိုက်ထည့်ကာ ဆီဝယ်ယူခွင့် (PO) ပိုမိုရရှိရန် ဆောင်ရွက်နေသည်ကို Control Centre မှ စစ်ဆေးတွေ့ရှိခဲ့သည်။ ထို့ကြောင့် ပြစ်မှုကျူးလွန်သည့် အရောင်းဆိုင် ၂၀ အား ဝယ်ယူခွင့်ပမာဏ လျှော့ချခြင်း၊ ဒဏ်ကြေးငွေ တပ်ရိုက်ခြင်းနှင့် ပြင်းထန်စွာ သတိပေးခြင်းများ ပြုလုပ်ခဲ့သည်။
ယခုအခါ စက်သုံးဆီ ဖြန့်ဖြူးမှု စနစ်တကျရှိစေရေးအတွက် နည်းပညာအဆင့်မြှင့်တင်မှုများကို စဉ်ဆက်မပြတ် ဆောင်ရွက်လျက်ရှိသည်။
အလားတူ မသမာမှုမျိုး ထပ်မံတွေ့ရှိပါက အရောင်းဆိုင်အား အမြဲတမ်း ပိတ်သိမ်းသည်အထိ ဥပဒေနှင့်အညီ ပြင်းထန်စွာ အရေးယူသွားမည်ဖြစ်၍ လုပ်ငန်းရှင်များအနေဖြင့် မိမိတို့ဆိုင်များကို စိစစ်ကြပ်မတ်ကြရန် လျှပ်စစ်နှင့်စွမ်းအင်ဝန်ကြီးဌာနက သတိပေးထားသည်။