မြန်မာ့လက်ရွေးစင် ယူ-၁၇ အမျိုးသားနှင့် အမျိုးသမီးအသင်းများ၏ Asian Cup 2026 အာရှဖလားခရီးစဉ် အောင်မြင်စွာပြီးဆုံးသွားခဲ့ပြီး အခက်အခဲများကို ကြံ့ကြံ့ခံကျော်ဖြတ်ခဲ့သည့် မျိုးဆက်သစ် လူငယ်ကစားသမားများအား မြန်မာနိုင်ငံဘောလုံးအဖွဲ့ချုပ် (MFF) က အသိအမှတ်ပြု ကျေးဇူးတင်စကား ပြောကြားထားသည်။
MFF ၏ ထုတ်ပြန်ချက်အရ အာရှအဆင့် နောက်ဆုံးအဆင့် ဖိုင်နယ်ပွဲစဉ်များအထိ ရောက်ရှိလာနိုင်ရန် လူငယ်ကစားသမားများသည် ပြည်တွင်း ယူ-၁၅ ပြိုင်ပွဲများမှတစ်ဆင့် ပဏာမရွေးချယ်ခံခဲ့ရပြီး ရေရှည်လေ့ကျင့်ရေးစခန်းများ ဝင်ရောက်လေ့ကျင့်ခြင်း၊ ခက်ခဲသည့် ခြေစစ်ပွဲများကို ဖြတ်ကျော်ခြင်းနှင့် နိုင်ငံတကာခြေစမ်းပွဲများ၊ ပြိုင်ပွဲများတွင် အတွေ့အကြုံစုဆောင်းခဲ့ကြရကြောင်း ဖော်ပြထားသည်။
ထို့ပြင် နိုင်ငံဂုဏ်ဆောင်နိုင်ရန် အစွမ်းကုန်ကြိုးစားခဲ့ကြသည့် လူငယ်ကစားသမားများ၊ နည်းပြအဖွဲ့ဝင်များနှင့် အုပ်ချုပ်မှုအဖွဲ့ဝင်များအားလုံးကို အထူးအသိအမှတ်ပြု ကျေးဇူးတင်ရှိကြောင်း MFF က ထုတ်ဖော်ပြောကြားထားသည်။
ယခုလူငယ်ကစားသမားများသည် အနာဂတ်တွင် မြန်မာ့လက်ရွေးစင်အသင်းကြီးအတွက် အားကိုးအားထားပြုရမည့် အဓိကဒေါက်တိုင်များ ဖြစ်လာနိုင်ကြောင်းလည်း တိုက်တွန်းအားပေးထားသည်။
ထို့အပြင် ခြေစစ်ပွဲများမှ ဖိုင်နယ်ပွဲစဉ်များအထိ ကွင်းအတွင်း လာရောက်အားပေးခဲ့ကြသည့် ပရိသတ်များ၊ ရုပ်သံမှတစ်ဆင့် စဉ်ဆက်မပြတ်အားပေးခဲ့သူများနှင့် ဝိုင်းဝန်းပံ့ပိုးကူညီခဲ့ကြသူများအားလုံးကိုလည်း အထူးကျေးဇူးတင်ရှိကြောင်း ဖော်ပြထားသည်။
မြန်မာနိုင်ငံဘောလုံးအဖွဲ့ချုပ်အနေဖြင့် မြန်မာ့ဘောလုံးလောက အဆင့်အတန်းမြင့်မားလာစေရန် လူငယ်မျိုးဆက်သစ်များ စဉ်ဆက်မပြတ် ပေါ်ထွက်လာရေး၊ ပြည်တွင်းလူငယ်ပြိုင်ပွဲများ ပိုမိုကျင်းပနိုင်ရေးနှင့် လူငယ်လက်ရွေးစင်အသင်းများ အောင်မြင်မှုရရှိစေမည့် စီမံချက်များကို အထူးဦးစားပေး ဆက်လက်လုပ်ဆောင်သွားမည်ဖြစ်ကြောင်းလည်း သတင်းစကားပါးထားသည်။