ရှမ်းပြည်နယ် တောင်ပိုင်း၊လွိုင်လင်မြို့ နေမင်းရောင်တိုးဂိတ် ၌ ဧပြီ ၂၀ ရက်ညပိုင်းက မူးယစ်ဆေးဝါး နှင့် ကုန်စည်ပစ္စည်းများ ရောနှောသယ်ဆောင်လာသည့် ၁၂ ဘီးမော်တော်ယာဉ်တစ်စီးကို ဖမ်းဆီးရမိခဲ့ကြောင်း သိရသည်။
အဆိုပါ ဖမ်းဆီးရမိသည့်ကားတွင် ခန့်မှန်းတန်ဖိုး ကျပ် ၁၆ ဒသမ ၈ ဘီလီယံတန်ဖိုးရှိ မူးယစ်ဆေးဝါးများ သယ်ဆောင်လာခြင်းလည်း ဖြစ်သည်။
လွိုင်လင်မြို့၊ အမှတ် (၂) ရပ်ကွက်ရှိ နေမင်းရောင်တိုးဂိတ်၌ ဧပြီ ၂၀ ရက်နေ့ က လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့က လုံခြုံရေးနှင့် မူးယစ်ဆေးဝါးတားဆီးနှိမ်နင်းရေးလုပ်ငန်းများ ဆောင်ရွက်နေစဉ် ဖမ်းဆီးရမိခဲ့ခြင်းလည်း ဖြစ်ကြောင်း သိရသည်။
လွိုင်လင်ဘက်မှ တောင်ကြီးဘက်သို့ ယာဉ်မောင်း ဖြိုးဝေထွန်း (ဘ) ဦးမောင်သိန်း (၂၃) နှစ် မောင်းနှင်၍ ယာဉ်နောက်လိုက် ခန့်ကျော်ထက် (ဘ) ဦးခင်မောင်လွင် (၂၁) နှစ် လိုက်ပါလာသည့် Nissan Diesel အစိမ်းရောင် ၁၂ ဘီးမော်တော်ယာဉ်အမှတ် MDY-20/4H—– အား စစ်ဆေးရာ ယာဉ်ပေါ်မှ အဝါရောင်ပြောင်းအိတ်များဖြင့် ဖုံးအုပ်သယ်ဆောင်လာသည့် တရုတ်စာတန်းနှင့် GUAN YIN WAN စာတန်းပါ ICE အဖြူရောင်ပုံဆောင်ခဲများထည့်ထားသည့် အဝါရောင်ဆာလာအိတ် ၄၈ အိတ် (ICE အဖြူရောင်ပုံဆောင်ခဲ ၁၂၀၀ ကီလိုဂရမ်ခန့်)၊ ခန့်မှန်းတန်ဖိုးငွေကျပ် ၁၆ ဒသမ ၈ ဘီလီယံခန့်ကို တွေ့ရှိဖမ်းဆီးရမိခဲ့ခြင်း ဖြစ်ကြောင်း သိရသည်။
ဖမ်းဆီးရမိ ယာဉ်မောင်း၏ ပြောကြားချက်အရ ၎င်းတို့သည် ၂၀၂၅ ခုနှစ် ဖေဖော်ဝါရီလမှစတင်၍ ချောင်းဦးမြို့မှ မိုင်းလားမြို့အထိမောင်းနှင်ရသည့် ယာဉ်မောင်းအလုပ်ကို ယာဉ်နောက်လိုက် ခန့်ကျော်ထက်နှင့်အတူ လုပ်ကိုင်ခဲ့ကြောင်း၊ ဧပြီ ၁၈ ရက်တွင် မိုင်းလားမြို့မှ ချောင်းဦးမြို့သို့ ပြန်လည်ထွက်ခွာလာစဉ် ကုန်ပစ္စည်းများမပါဝင်သဖြင့် ကုန်များရရှိရေး ချိတ်ဆက်ခဲ့ရာ နမ့်စန်မြို့၊ အမှတ် (၉) ကျေးရွာအကျော်ရှိ ပြည့်ဖြိုးကျော်ပြောင်းပွဲရုံနှင့် ချိတ်ဆက်မိပြီး ဧပြီ ၂၀ ရက်တွင် ပွဲရုံပိုင်ရှင် ဝင်းဇော်ညွန့်နှင့် ခင်ဝင်းဆွေတို့က ကြက်စာအိတ် ၄၈ အိတ်နှင့် ပြောင်းအိတ် ၂၅၀ အိတ်တို့ကို တင်ဆောင်ပေးခဲ့ခြင်းဖြစ်ကြောင်း သိရှိရသည်။
အဆိုပါ မူးယစ်ဆေးဝါးများနှင့်အတူ ဖမ်းဆီးရမိသူများ၊ ဖမ်းဆီးရမိမော်တော်ယာဉ်တို့ကို သက်ဆိုင်ရာဌာနများသို့ လွှဲပြောင်းအပ်နှံ၍ လုပ်ထုံးလုပ်နည်းများနှင့်အတူ ဆက်လက် ဆောင်ရွက်သွားမည်ဖြစ်ကြောင်း သိရှိရသည်။