မြန်မာအမျိုးသမီးလိဂ် (MWL) ပြိုင်ပွဲတွင် ရလဒ်ကောင်းများရရှိရန် ပြင်ဆင်နေသည့် ဧရာဝတီယူနိုက်တက် အမျိုး သမီးဘောလုံးအသင်းသည် ယခုရာသီအတွက် ပြည်ပကစားသမား ခေါ်ယူအားဖြည့်မှုအဖြစ် ထိုင်းနိုင်ငံ ယူ-၂၀ အမျိုးသမီးလက်ရွေးစင်အသင်း၏ အဓိကကစားသမားတစ်ဦးဖြစ်သူ နတ်ချာနော့ခ် (Nachanok Kosonsaksakul)ကို အငှားစာချုပ်ဖြင့် ခေါ်ယူလိုက်ပြီဖြစ်ကြောင်း တရားဝင်သတင်းထုတ်ပြန်လိုက်သည်။
အသက် ၁၇ နှစ်အရွယ်သာရှိသေးသော်လည်း ခြေစွမ်းပြည့်ဝသည့် တိုက်စစ်ကစားသမား နတ်ချာနော့ခ်သည် ထိုင်းနိုင်ငံ ယူ-၁၇ နှင့် ယူ-၂၀ လက်ရွေးစင်အသင်းများတွင် အဆင့်ဆင့်ရွေးချယ်ခံခဲ့ရသူဖြစ်သည်။
၎င်းသည် ပရော်ဖက်ရှင်နယ်ကစားသမားဘဝတွင် ထိုင်းကလပ် ဖရာနာခွန် (Phranakorn FC)အသင်းအပြင်၊ အမေရိကန်အခြေစိုက် စတန်တွန်တက္ကသိုလ် (Stanton University)အသင်းတွင်လည်း သွားရောက်ကစားခဲ့ဖူးသည့် အတွေ့အကြုံရှိသူလည်း ဖြစ်သည်။
ဧရာဝတီအမျိုးသမီးအသင်းသည် ယခုနှစ်ရာသီတွင် ပြည်ပကစားသမားခေါ်ယူမှုပိုင်း၌ အင်တိုက်အားတိုက် ရင်းနှီးမြှုပ်နှံနေပြီး လက်ရှိတွင်ဘင်္ဂလားဒေ့ရှ် လက်ရွေးစင်ကစားသမား ရီတူ (Ritu Porna Chakma)၊ ဖိလစ်ပိုင် ကစားသမား အူဘေး (Camille Rodriguez Ubae) တို့ကို ခေါ်ယူထားပြီးဖြစ်သည်။
ယခု ထိုင်းလူငယ်လက်ရွေးစင် နတ်ချာနော့ခ် ထပ်မံရောက်ရှိလာခြင်းကြောင့် ဧရာဝတီအသင်းအနေဖြင့် စုစုပေါင်း ပြည်ပကစားသမား (၃) ဦးအထိ ရှိနေပြီဖြစ်သည်။