မန္တလေးတိုင်းဒေသကြီးအစိုးရအဖွဲ့၊ မန္တလေးမြို့တော်စည်ပင်သာယာရေးကော်မတီက မန္တလေးမြို့၊ ချမ်းအေးသာစံမြို့နယ်ရှိ ယခင်မန္တလေးစီးတီးဟိုတယ်နှင့် ဆက်စပ်အဆောက်အဦများအား သင့်လျော်သည့် စီးပွားရေးလုပ်ငန်းများ ဆောင်ရွက်နိုင်ရန် စိတ်ဝင်စားမှုအဆိုပြုလွှာ (Expression of Interest – EOI) များ ခေါ်ယူထားကြောင်း သိရသည်။
အဆိုပါ အဆောက်အဦများမှာ (၂၆ x ၂၇) လမ်းကြားနှင့် (၈၂ x ၈၃) လမ်းကြားရှိ မြေဧက (၁.၃၂၇၀) ဧကပေါ်တွင် တည်ရှိသည့် ယခင်မန္တလေးစီးတီးဟိုတယ် (RC-၄ ထပ်) နှင့် ဆက်စပ်အဆောက်အဦများဖြစ်ကြောင်း ထုတ်ပြန်ချက်တွင် ဖော်ပြထားသည်။
စိတ်ပါဝင်စားသည့် လုပ်ငန်းရှင်များအနေဖြင့် EOI ပုံစံများကို တစ်စုံလျှင် ကျပ် ၅ သိန်းနှုန်းဖြင့် မန္တလေးမြို့တော်စည်ပင်သာယာရေးကော်မတီ၊ သန့်ရှင်းရေးဌာနတွင် ၂၀၂၆ ခုနှစ် ဇွန်လ ၂၆ ရက်နေ့ နောက်ဆုံးထား၍ ရုံးချိန်အတွင်း လာရောက်ထုတ်ယူနိုင်ကြောင်း သိရသည်။
ထို့ပြင် အချက်အလက်များ ဖြည့်သွင်းထားသည့် EOI အဆိုပြုလွှာများနှင့် သက်ဆိုင်ရာ စာရွက်စာတမ်းများကို ၂၀၂၆ ခုနှစ် ဇူလိုင်လ ၂ ရက်နေ့ ညနေ ၄ နာရီမတိုင်မီ မန္တလေးမြို့တော်စည်ပင်သာယာရေးကော်မတီ၊ သန့်ရှင်းရေးဌာနသို့ ပြန်လည်ပေးပို့ရမည်ဖြစ်ကြောင်း ကြေညာထားသည်။
အသေးစိတ် သိရှိလိုသူများအနေဖြင့် ဖုန်းနံပါတ် ၀၉-၆၈၀၃၆၂၁၂၁၊ ၀၉-၄၄၄၀၁၅၆၀၉ နှင့် ၀၉-၇၉၈၆၄၄၈၅၈ တို့သို့ ရုံးချိန်အတွင်း ဆက်သွယ်မေးမြန်းနိုင်ကြောင်း သိရသည်။