ဟနွိုင်း၊ မေလ ၁၈ ရက်
ဗီယက်နမ်နိုင်ငံ တောင်ပိုင်း၏ စီးပွားရေးဗဟိုချက်ဖြစ်သော ဟိုချီမင်းစီးတီးသည် အာရှ-ပစိဖိတ်ဒေသအတွင်း ထိပ်တန်းရေရှည်တည်တံ့ပြီး ဆန်းသစ်တီထွင်မှုရှိကာ နေချင်စဖွယ်ကောင်းသော မဟာမြို့ကြီးတစ်ခုအဖြစ် ပြောင်းလဲရန် နှစ် ၁၀၀ မျှော်မှန်းချက် ထည့်သွင်းထားသည့် ၂၀၂၅-၂၀၅၀ မာစတာပလန် မူဘောင်ကို အတည်ပြုလိုက်ကြောင်း ဒေသတွင်းမီဒီယာတစ်ခုဖြစ်သည့် VnEconomy က တနင်္လာနေ့တွင် ဖော်ပြခဲ့သည်။
မြို့တော်ပြည်သူ့ကော်မတီက အတည်ပြုခဲ့သည့် အဆိုပါမူဘောင်အရ ဟိုချီမင်းစီးတီးသည် ၂၀၂၅ ခုနှစ်မှ ၂၀၅၀ ပြည့်နှစ်အတွင်း ဒေသတွင်း စုစုပေါင်းပြည်တွင်းထုတ်ကုန် (GRDP) ကို တစ်နှစ်လျှင် အနည်းဆုံး ၁၀ ရာခိုင်နှုန်း နှုန်းဖြင့် တိုးတက်ရန် ရည်မှန်းထားသည်။ အခြေအနေများ ကောင်းမွန်ပါက ၂၀၅၀ ပြည့်နှစ်တွင် စုစုပေါင်း GRDP သည် အမေရိကန်ဒေါ်လာ ၁.၂ ထရီလျံခန့်အထိ ရှိလာမည်ဟု ခန့်မှန်းထားကြောင်း အစီရင်ခံစာတွင် ဖော်ပြထားသည်။
အဆိုပါမူဘောင်သည် ဟိုချီမင်းစီးတီးကို ခိုင်မာသောစီးပွားရေးတိုးတက်မှုနှင့်အတူ ပတ်ဝန်းကျင်ထိန်းသိမ်းရေး၊ လူမှုရေး မျှတမှုနှင့် ယဉ်ကျေးမှုထိန်းသိမ်းစောင့်ရှောက်ရေးတို့ကို ဟန်ချက်ညီညီ ထိန်းညှိရင်း စီးပွားရေး၊ ဘဏ္ဍာရေး၊ ကုန်သွယ်ရေး၊ ဝန်ဆောင်မှုလုပ်ငန်း၊ ထောက်ပံ့ပို့ဆောင်ရေး၊ ခရီးသွားလုပ်ငန်း၊ ပညာရေး၊ ကျန်းမာရေး၊ သိပ္ပံ၊ နည်းပညာနှင့် ဆန်းသစ်တီထွင်မှုတို့အတွက် ဒေသတွင်း အဓိကဗဟိုချက်ကြီးတစ်ခု ဖြစ်လာစေရန် မျှော်မှန်းထားသည်။
ထို့ပြင် ခေတ်မီအခြေခံအဆောက်အဦ၊ စမတ်ကျသော စီမံအုပ်ချုပ်မှုစနစ်နှင့် ရာသီဥတုဒဏ်ခံနိုင်ရည် မြင့်မားမှုတို့ ပါဝင်သော ဗဟိုချက်ပေါင်းစုံ မြို့ပြပုံစံကြီးတစ်ခု ဖော်ဆောင်ရန် ရည်ရွယ်ထားပြီး ပြည်သူများ၏ ဝင်ငွေနှင့် လူနေမှုအဆင့်အတန်းကို အရှေ့တောင်အာရှတွင် အမြင့်မားဆုံးစာရင်းဝင် ဖြစ်လာစေရန် လုပ်ဆောင်ခြင်းဖြင့် နိုင်ငံသားများ၏ လူနေမှုဘဝအရည်အသွေးကို မြှင့်တင်ရန်လည်း ရည်မှန်းထားသည်။
အဆိုပါ မူဘောင်စီမံကိန်းသည် စတုရန်းကီလိုမီတာ ၆,၇၀၀ ကျော်ရှိသော မြို့ပြအုပ်ချုပ်ရေးနယ်မြေတစ်ခုလုံးကို လွှမ်းခြုံထားပြီး စီးပွားရေးဖွံ့ဖြိုးတိုးတက်မှု လိုအပ်ချက်များကို ဖြည့်ဆည်းရန်အတွက် အနာဂတ်တွင် ပင်လယ်ပြင်ကို မြေဖို့၍ နယ်မြေချဲ့ထွင်မည့် နေရာများကိုပါ လျာထားသည်။ အစီရင်ခံစာအရ ၂၀၅၀ ပြည့်နှစ်တွင် ထိုမြို့၏ လူဦးရေသည် ၂၀ သန်းမှ ၂၂ သန်းအထိ ရှိလာမည်ဟု ခန့်မှန်းထားကြောင်း သိရသည်။
Ref: ဆင်ဟွာ