နှစ်ပေါင်း (၈) သန်းခန့် သက်တမ်းရှိသည်ဟု ခန့်မှန်းထားသော စတီဂိုလိုဖိုဒွန် ရှေးဦးဆင်၏ သွားပါအောက်မေးရိုးနှင့် အံသွားအစုံများ အပါအဝင် ကျောက်ဖြစ်ရုပ်ကြွင်း (၁၉) ခုကို မေ ၁၈ ရက်တွင် ရှေးဟောင်းသုတေသနနှင့် အမျိုးသားပြတိုက်ဦးစီးဌာန (ရန်ကုန်ဌာနခွဲ) သို့ လွှဲပြောင်းပေးအပ်ခဲ့ကြောင်း သိရသည်။
လွှဲပြောင်းပေးအပ်သည့် ရှေးဟောင်းဇီဝရုပ်ကြွင်းများတွင် စတီဂိုလိုဖိုဒွန် ရှေးဦးဆင်၏ သွားပါအောက်မေးရိုးနှင့် အံသွားအစုံများ၊ ရှေးဦးကြံ့၏ သွားပါအောက်မေးရိုးနှင့် အောက်အံသွားအစိတ်အပိုင်းများ၊ ရေမြင်းမျိုးနွယ်ဝင် တိရစ္ဆာန်၏ အောက်မေးရိုးအပိုင်းအစ၊ ရှေးဦးကျွဲနွားမျိုးစိတ်၏ ခြေဆစ်လက်ဆစ်ရိုးများ၊ ရှေးဦးသစ်ကုလားအုတ်၏ သွားပါအောက်မေးရိုးနှင့် ဆင်အံသွားအပိုင်းအစများအပြင် အခြားနို့တိုက်သတ္တဝါများ၏ အရိုးအပိုင်းအစများလည်း ပါဝင်ကြောင်း သိရသည်။
ရှေးဟောင်းဝတ္ထုပစ္စည်းများကို ကိုယ်ပိုင်ထိန်းသိမ်းလိုသူများအနေဖြင့် ရှေးဟောင်းသုတေသနနှင့် အမျိုးသားပြတိုက်ဦးစီးဌာနတွင် “ရှေးဟောင်းဝတ္ထုပစ္စည်း ထိန်းသိမ်းခွင့်လက်မှတ်” ရရှိရေးအတွက် လျှောက်ထားနိုင်ကြောင်း သိရသည်။
ထိန်းသိမ်းခွင့်ရရှိသူများသည် သတ်မှတ်စည်းကမ်းချက်များနှင့်အညီ ရာသက်ပန်ထိန်းသိမ်းခွင့် ရရှိနိုင်သော်လည်း လက်မှတ်သက်တမ်းမကုန်မီ သက်တမ်းတိုး လျှောက်ထားရမည်ဖြစ်ကြောင်း ဖော်ပြထားသည်။
ထို့ပြင် ရှေးဟောင်းဝတ္ထုပစ္စည်းများနှင့် ကျောက်ဖြစ်ရုပ်ကြွင်းများသည် နိုင်ငံတော်၏ ယဉ်ကျေးမှုအမွေအနှစ်များဖြစ်သဖြင့် ခွင့်ပြုချက်မရှိဘဲ ပြည်ပသို့ သယ်ယူပို့ဆောင်ခြင်း၊ တူးဖော်ရှာဖွေခြင်း၊ ရောင်းဝယ်ခြင်း၊ ပုံတူပွားယူခြင်းနှင့် စီးပွားရေးအတွက် အသုံးပြုခြင်းတို့ကို “ရှေးဟောင်းဝတ္ထုပစ္စည်းများ ကာကွယ်ထိန်းသိမ်းရေးဥပဒေ” အရ တားမြစ်ထားကြောင်း သိရသည်။