တရုတ်နိုင်ငံသည် မြန်မာနိုင်ငံ၏ ငြိမ်းချမ်းရေး၊ နယ်စပ်တည်ငြိမ်ရေးနှင့် ဖွံ့ဖြိုးတိုးတက်ရေးအတွက် အရေးပါသည့် မဟာဗျူဟာမြောက် မိတ်ဖက်နိုင်ငံဖြစ်ပြီး နှစ်နိုင်ငံပူးပေါင်းဆောင်ရွက်မှုကို အဆင့်မြှင့်တင်နိုင်ခဲ့သည့် နိုင်ငံတော်အဆင့် ချစ်ကြည်ရေးခရီးစဉ်အတွင်း အစိုးရအချင်းချင်း (G to G) နားလည်မှုစာချွန်လွှာ (MoU) ၁၈ ခုနှင့် စီးပွားရေးလုပ်ငန်းရှင်အချင်းချင်း (B2B) နားလည်မှုစာချွန်လွှာ (၇၀) ခု လက်မှတ်ရေးထိုးနိုင်ခဲ့ကြောင်း နိုင်ငံတော်သမ္မတရုံး ပြောရေးဆိုခွင့်ရှိသူ ဒေါက်တာခိုင်ခိုင်စိုးက ပြောကြားသည်။
ဇွန် ၃၀ ရက်က နေပြည်တော်၌ ကျင်းပသည့် နိုင်ငံတော်သမ္မတရုံး သတင်းစာရှင်းလင်းပွဲတွင် နိုင်ငံတော်သမ္မတ ဦးဆောင်သည့် မြန်မာအဆင့်မြင့်ကိုယ်စားလှယ်အဖွဲ့၏ တရုတ်ပြည်သူ့သမ္မတနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် ရလဒ်များနှင့် မြန်မာ-တရုတ်ဆက်ဆံရေးအခြေအနေတို့ကို ရှင်းလင်းပြောကြားရာ၌ ဒေါက်တာခိုင်ခိုင်စိုးက အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။
ဒေါက်တာခိုင်ခိုင်စိုးက တရုတ်နိုင်ငံသည် မြန်မာနိုင်ငံ၏ နယ်စပ်ဒေသတည်ငြိမ်အေးချမ်းရေး၊ နယ်စပ်ကုန်သွယ်ရေး ပြန်လည်ဖွံ့ဖြိုးတိုးတက်ရေးနှင့် နိုင်ငံ၏ စီးပွားရေးဖွံ့ဖြိုးတိုးတက်မှုတို့အတွက် များစွာအထောက်အကူပြုနိုင်သည့် မဟာဗျူဟာမြောက် မိတ်ဖက်နိုင်ငံဖြစ်ကြောင်း၊ နှစ်နိုင်ငံအပြန်အလှန် ပူးပေါင်းဆောင်ရွက်ခြင်းဖြင့်သာ နှစ်နိုင်ငံ၏ ရည်မှန်းချက်များကို အောင်မြင်စွာ အကောင်အထည်ဖော်နိုင်မည်ဖြစ်ကြောင်း ပြောကြားသည်။
ထို့ပြင် တရုတ်နိုင်ငံသမ္မတနှင့် ဝန်ကြီးချုပ်တို့က မြန်မာနိုင်ငံအပေါ် အဓိကကျသည့် အထောက်အပံ့များကို ဆက်လက်ပေးအပ်သွားမည်ဟု ကတိပြုခဲ့ကြောင်း၊ ကုလသမဂ္ဂနှင့် အာဆီယံအပါအဝင် နိုင်ငံတကာမျက်နှာစာများတွင် မြန်မာနိုင်ငံ တန်းတူရည်တူပါဝင်နိုင်ရေးကို ခိုင်ခိုင်မာမာ ထောက်ခံအားပေးသွားမည်ဟု အလေးအနက်ပြောကြားခဲ့ကြောင်း ၎င်းက ဆိုသည်။
ဒေါက်တာခိုင်ခိုင်စိုးက “မြန်မာနိုင်ငံနဲ့ တရုတ်နိုင်ငံဟာ တစ်နိုင်ငံနဲ့ တစ်နိုင်ငံ ခွဲခြားလို့မရဘဲ အတူတကွပူးပေါင်းဆောင်ရွက်ပြီး ရည်မှန်းချက်ချင်းအတူတူသွားနေတဲ့ မဟာဗျူဟာမြောက် တရုတ်-မြန်မာ ဆက်ဆံရေးအဆင့်ဖြစ်ပါတယ်” ဟုလည်း ပြောကြားခဲ့သည်။
နိုင်ငံတော်သမ္မတ၏ ငါးရက်ကြာ တရုတ်နိုင်ငံခရီးစဉ်အတွင်း နှစ်နိုင်ငံခေါင်းဆောင်များသည် နယ်စပ်လုံခြုံရေး၊ ငြိမ်းချမ်းရေး၊ နယ်စပ်ကုန်သွယ်ရေး၊ ရင်းနှီးမြှုပ်နှံမှု၊ Belt and Road Initiative (BRI) နှင့် China-Myanmar Economic Corridor (CMEC) စီမံကိန်းများ အမြန်ဆုံးပြန်လည်အကောင်အထည်ဖော်ရေး၊ စီးပွားရေးနှင့် အခြေခံအဆောက်အအုံ ဖွံ့ဖြိုးတိုးတက်ရေးကဏ္ဍများကို ကျယ်ကျယ်ပြန့်ပြန့် ဆွေးနွေးခဲ့ကြောင်း သိရသည်။
ခရီးစဉ်အတွင်း စိုက်ပျိုးရေး၊ ကုန်သွယ်ရေး၊ သတင်းမီဒီယာ၊ ပညာရေး၊ လူသားအရင်းအမြစ်ဖွံ့ဖြိုးတိုးတက်ရေး၊ နည်းပညာ၊ လူသားချင်းစာနာထောက်ထားမှု၊ အာကာသသိပ္ပံနှင့် ဂြိုဟ်တုပူးတွဲတည်ဆောက်ရေး အပါအဝင် ကဏ္ဍစုံ၌ အစိုးရအချင်းချင်း (G to G) နားလည်မှုစာချွန်လွှာ (MoU) ၁၈ ခုကို လက်မှတ်ရေးထိုးနိုင်ခဲ့ပြီး Global Security Initiative (GSI)၊ Global Development Initiative (GDI)၊ Global Civilization Initiative (GCI) နှင့် Global Governance Initiative (GGI) တို့တွင် ပူးပေါင်းဆောင်ရွက်ရေးဆိုင်ရာ သဘောတူညီချက်များကိုလည်း ရရှိခဲ့ကြောင်း ပြောကြားသည်။
ထို့အပြင် ရှန်ဟိုင်းမြို့၌ ကျင်းပခဲ့သည့် မြန်မာ-တရုတ် ရင်းနှီးမြှုပ်နှံမှုနှင့် ကုန်သွယ်မှုညီလာခံတွင် နှစ်နိုင်ငံ စီးပွားရေးလုပ်ငန်းရှင် ၆၀၀ ကျော် တက်ရောက်ခဲ့ပြီး ပြခန်း ၃၅ ခန်းပြသခဲ့ကာ စီးပွားရေးလုပ်ငန်းရှင်အချင်းချင်း (B2B) နားလည်မှုစာချွန်လွှာ (၇၀) ခု လက်မှတ်ရေးထိုးနိုင်ခဲ့ကြောင်း သိရသည်။
ဒေါက်တာခိုင်ခိုင်စိုးက BRI နှင့် CMEC စီမံကိန်းများသည် တရုတ်နိုင်ငံ၏ အနောက်ဘက်ထွက်ပေါက်ကို အိန္ဒိယသမုဒ္ဒရာနှင့် ချိတ်ဆက်ပေးသည့် အတိုဆုံးလမ်းကြောင်းဖြစ်သဖြင့် မြန်မာနိုင်ငံသည် တရုတ်နိုင်ငံအတွက် မဟာဗျူဟာအရ အရေးပါသည့် နိုင်ငံဖြစ်ကြောင်း၊ ယခုနိုင်ငံတော်အဆင့် ချစ်ကြည်ရေးခရီးစဉ်သည် မြန်မာ-တရုတ် မဟာဗျူဟာမြောက် မိတ်ဖက်ဆက်ဆံရေးကို ပိုမိုခိုင်မာစေပြီး စီးပွားရေး၊ ကုန်သွယ်ရေး၊ ရင်းနှီးမြှုပ်နှံမှု၊ နည်းပညာ၊ အခြေခံအဆောက်အအုံနှင့် လူသားအရင်းအမြစ်ဖွံ့ဖြိုးတိုးတက်ရေးကဏ္ဍများတွင် ပူးပေါင်းဆောင်ရွက်မှုများ ပိုမိုတိုးချဲ့နိုင်မည့် အခြေခံကောင်းများ ဖန်တီးပေးနိုင်ခဲ့ကြောင်း ပြောကြားခဲ့သည်။