မြန်မာအက်ဂရိုအိတ်(စ်)ချိန်း အများနှင့်သက်ဆိုင်သော ကုမ္ပဏီလီမိတက် (MAEX) သည် ၂၀၂၅-၂၀၂၆ ဘဏ္ဍာနှစ်အတွက် သာမန်အစုရှယ်ယာတစ်စုလျှင် ကျပ် ၂၀၀ နှုန်းဖြင့် အမြတ်ဝေစုခွဲဝေပေးရန် အဆိုပြုဆုံးဖြတ်ခဲ့ကြောင်း ဇူလိုင် ၁ ရက်တွင် ထုတ်ပြန်ကြေညာသည်။
အဆိုပါဆုံးဖြတ်ချက်ကို ၂၀၂၆ ခုနှစ် မတ်လ ၃၁ ရက်နေ့အထိ ဘဏ္ဍာရေးအခြေအနေများအပေါ် အခြေခံကာ ဇွန်လ ၂၉ ရက်နေ့တွင် ကျင်းပသည့် ဒါရိုက်တာအဖွဲ့အစည်းအဝေး၌ အတည်ပြုခဲ့ခြင်းဖြစ်ကြောင်း သိရသည်။
အမြတ်ဝေစုအဆိုပြုချက်ကို ၂၀၂၆ ခုနှစ် ဩဂုတ်လ ၂၆ ရက်နေ့တွင် အွန်လိုင်းဖြင့် ကျင်းပမည့် ဒသမအကြိမ်မြောက် နှစ်ပတ်လည် အထွေထွေအစည်းအဝေး (AGM) ၌ အစုရှယ်ယာရှင်များထံ တင်ပြအတည်ပြုသွားမည်ဖြစ်သည်။
အမြတ်ဝေစုခံစားခွင့်ရှိမည့် အစုရှယ်ယာရှင်များကို ၂၀၂၆ ခုနှစ် ဇူလိုင်လ ၂၀ ရက်နေ့အထိ အရောင်းအဝယ်ပြုလုပ်ထားသည့် အစုရှယ်ယာများအပေါ် အခြေခံ၍ ၂၀၂၆ ခုနှစ် ဇူလိုင်လ ၂၃ ရက်နေ့ (YSX Record Date) တွင် မှတ်တမ်းတင်ထားသော အစုရှယ်ယာရှင်စာရင်းအရ သတ်မှတ်သွားမည်ဖြစ်ကြောင်း ကုမ္ပဏီက ထုတ်ပြန်ထားသည်။
အမြတ်ဝေစု စတင်ခွဲဝေပေးမည့်ရက်ကို နှစ်ပတ်လည် အထွေထွေအစည်းအဝေး ကျင်းပပြီးနောက် ထပ်မံအသိပေးကြေညာသွားမည်ဖြစ်ကြောင်းလည်း ဖော်ပြထားသည်။
ထို့ပြင် ၂၀၂၆ ခုနှစ် မတ်လ ၃၁ ရက်နေ့တွင် ကုန်ဆုံးသည့် ၂၀၂၅-၂၀၂၆ ဘဏ္ဍာရေးနှစ်၏ ဘဏ္ဍာရေးရှင်းတမ်းများကိုလည်း ထုတ်ပြန်ကြေညာထားပြီးဖြစ်ကြောင်း MAEX က အသိပေးထားသည်။
ပုံစာ-MAEX က စီမံခန့်ခွဲလုပ်ကိုင်နေသည့် တညင်းကုန်းစျေးကို တွေ့ရစဥ်
