နိုင်ငံတွင် မွေးဖွားနှုန်းကျဆင်းနေမှုကို မြှင့်တင်နိုင်ရေးကြိုးပမ်းချက်အဖြစ် လက်ထပ်ထိမ်းမြားခြင်း၊ ချစ်ချင်းမေတ္တာ၊ မျိုးပွားခြင်း နှင့် မိသားစု တို့နှင့်ပတ်သက်၍ အပေါင်းလက္ခဏာဆောင်သော အမြင်များကို အလေးပေးစေရေးအတွက် တက္ကသိုလ်၊ ကောလိပ်များတွင် ချစ်မှုရေးရာသင်ခန်းစာများ ကို ထည့်သွင်းသင်ကြားပေးရန် တရုတ်က တိုက်တွန်းခဲ့သည်။
တရုတ်နိုင်ငံအနေဖြင့် ၂၀၂၃ ခုနှစ်တွင် ၂ နှစ်ဆက်တိုက် လူဦးရေကျဆင်းမှုကို ကြုံတွေ့ခဲ့ရပြီးနောက် ရင်သွေးယူကြရေးအတွက် လူငယ်ဇနီးမောင်နှံများကို ပိုမိုဆွဲဆောင်နိုင်ရန် ပေကျင်းက အစီအမံအမျိုးမျိုးကို ချမှတ်ဖော်ဆောင်နေခဲ့သည်။
တရုတ်နိုင်ငံသည် လူဦးရေ ၁ ဒဿမ ၄ ဘီလျံဖြင့် ကမ္ဘာပေါ်တွင် ဒုတိယမြောက်လူဦးရေအများဆုံးနိုင်ငံဖြစ်သော်လည်း သက်ကြီးရွယ်အိုဦးရေ အလျင်မြန်တိုးပွားနေမှုသည် အနာဂတ်တွင် အစိုးရအသုံးစရိတ်လိုအပ်ချက်တိုးမြင့်လာကာ စီးပွားရေးအပေါ် ဖိအားဖြစ်လာစေနိုင်သည်။
ကောလိပ်ကျောင်းသားများသည် ကလေ-းမွေးဖွားမှုအတွက် အကြီးမားဆုံး မောင်းနှင်အားဖြစ်လာနိုင်သော်လည်း အိမ်ထောင်ရေးနှင့် အချစ်ရေးတို့အပေါ် ၎င်းတို့၏ အမြင်များသည် သိသိသာသာ ပြောင်းလဲလာသည်ဟု ကျင်းစုနှင့် ရှင်းဟွာသတင်းစာအုပ်စုက လူဦးရေဆိုင်ရာ တရားဝင်ထုတ်ပြန်ချက်တစ်ခုဖြစ်သည့် China Population News ကို ကိုးကား၍ ဖော်ပြခဲ့သည်။
တက္ကသိုလ်နှင့် ကောလိပ်များသည် အိမ်ထောင်ရေးနှင့် ချစ်မှုရေးရာ သင်ခန်းစာများကို ထည့်သွင်းသင်ကြားပေးခြင်းဖြင့် ကောလိပ်ကျောင်းသားများကို အိမ်ထောင်ရေး၊ အချစ်ရေးဆိုင်ရာ ပညာပေးမှုများလုပ်ဆောင်ပေးရန် တာဝန်ရှိသည်ဟု မှတ်ယူရမည်ဖြစ်ကြောင်း သတင်းထုတ်ပြန်ချက်တွင် ဖေါ်ပြထားသည်။
အဆိုပါအစီအစဉ်သည် ကျန်းမာပြီး၊ အပြုသေဘာဆောင်သော အိမ်ထောင်ရေးနှင့် ကလေးမွေးဖွားခြင်းဆိုင်ရာ ဝန်းကျင်အခြေအနေတစ်ရပ်ကို ဖန်တီးရန် အထောက်အကူဖြစ်လိမ့်မည်ဟု ဆိုသည်။
နိုင်ငံတော်ကောင်စီသည် နိုဝင်ဘာလတွင် ဒေသဆိုင်ရာ အစိုးရများကို ဆင့်ခေါ်၍ တရုတ်နိုင်ငံ၏ လူဦးရေကျဆင်းမှုကို ထိန်းညှိရန်နှင့် အရွယ်ကောင်းအခါကောင်းတွင် အိမ်ထောင်သားမွေးပြုမှုကို အလေးထားကြစေရန်အတွက် အရင်းအမြစ်များကို အသုံးပြုရန် ညွှန်ကြားခဲ့သည်။ သို့သော်လည်း အဆိုပါ လှုပ်ရှားမှုသည် တရုတ်လူငယ်များအတွင်း စိတ်ဝင်စားဖွယ်မရှိဟု လူဦးရေစာရင်းအင်း ပညာရှင်များက သုံးသပ်သည်။
China Population News က စစ်တမ်းကောက်ယူခဲ့သော ကောလိပ်ကျောင်းသားများ၏ ၅၇ ရာခိုင်နှုန်းက သူတို့အနေဖြင့် အချစ်ရေးကိစ္စကို မလိုလားကြောင်း ဖြေကြားခဲ့ကြပြီး အဓိကအားဖြင့် အချစ်ရေးနှင့် ပညာရေးအကြား ဟန်ချက်ညီစေရန် မည်သို့အချိန်ခွဲဝေသုံးစွဲရမည်ကို မသိ၍ဖြစ်ကြောင်း ဆိုခဲ့ကြသည်။
Ref: ယူအက်စ်နူးစ်