ပြီးခဲ့သည့်ရက်ပိုင်းအတွင်းကချုပ်ဆိုခဲ့သည့် မြန်မာအမျိုးသမီးလိဂ်နှင့် ကုမ္ပဏီများ စပွန်ဆာစာချုပ်ချုပ်ဆိုခဲ့သဖြင့် ယခု ကျင်းပမည့် ၂၀၂၆-၂၀၂၇ ရာသီ အမျိုးသမီးလိဂ်တွင် ဆုကြေးငွေများတိုးမြှင့်ရရှိလာတော့မည်ဖြစ်သည်။
ပြိုင်ပွဲတွင် အမှတ်ပေးချန်ပီယံအသင်းကို ငွေကျပ်သိန်း (၁,၀၀၀)၊ ဒုတိယအသင်းကို ငွေကျပ်သိန်း (၇၀၀)၊ တတိယအသင်းကို ငွေကျပ်သိန်း (၅၀၀)၊ စတုတ္ထအသင်းကို ငွေကျပ်သိန်း (၃၀၀)၊ ပဉ္စမအသင်းကို ငွေကျပ်သိန်း (၂၀၀)၊ ဆဋ္ဌမအသင်းကို ငွေကျပ် (၁၇၅) သိန်း၊ သတ္တမအသင်းကို ငွေကျပ်သိန်း (၁၅၀)၊ အဋ္ဌမအသင်းကို ငွေကျပ် (၁၂၅) သိန်း၊ နဝမအသင်းကို ငွေကျပ်သိန်း (၁၀၀) နှင့် အဆင့် (၁၀) အသင်းကို ငွေကျပ် (၇၅) သိန်း ချီးမြှင့်ပေးအပ်သွားမည်ဖြစ်သည်။
ထို့ပြင် ကစားသမားများ ပွဲစဉ်တစ်ပွဲချင်းစီတွင် အကောင်းဆုံးစွမ်းဆောင်ရည်များပြသနိုင်စေရန်နှင့် ပြိုင်ဆိုင်မှုပိုမိုမြင့်မားလာစေရန်ရည်ရွယ်၍ AYA Pay ၏ အဓိကပံ့ပိုးကူညီမှုဖြင့် AYA Pay Player of the Match ဆုအဖြစ် ပွဲစဉ်တစ်ပွဲချင်းစီ၏ အကောင်းဆုံးကစားသမားရွေးချယ်ခံရသူအား AYA Pay Player of the Match ဆုတံဆိပ်နှင့် AYA Pay ငွေသားဆုငွေကျပ် (၅) သိန်း ချီးမြှင့်မည်ဖြစ်သည်။
ထို့အတူ ဝင်ရောက်ယှဥ်ပြိုင်သည့်အသင်းများအား ကလပ်အသင်းတစ်သင်းလျှင် အခြေခံထောက်ပံ့ငွေကျပ်သိန်း (၅၀၀) ထောက်ပံ့ပေးမည့်အပြင် အိမ်ကွင်းပွဲစဉ်များလက်ခံကျင်းပခြင်းနှင့် ဆက်စပ်ကုန်ကျစရိတ်များအတွက် သီးခြားထောက်ပံ့ပေးမည်ဖြစ်ကာ Myanmar Women’s League မှသတ်မှတ်ထားသော Development Criteria များကို ပြည့်မီအောင် ဆောင်ရွက်နိုင်သော ကလပ်အသင်းများကို Club Development Subsidy အဖြစ် အများဆုံးငွေကျပ်သိန်း (၂၀၀) အထိ ထပ်မံထောက်ပံ့ပေးသွားမည် ဖြစ်သည်။
ယင်း ထောက်ပံ့ကြေးများကို ကလပ်အသင်းများ ရေရှည်ဖွံ့ဖြိုးတိုးတက်ရေး၊ ပရော်ဖက်ရှင်နယ်စံနှုန်းများ မြှင့်တင်ရေးနှင့် မြန်မာ့အမျိုးသမီးဘောလုံး အဆင့်အတန်းတိုးတက်မြင့်မားလာရေးတို့အတွက် အထောက်အကူပြုစေရန် ရည်ရွယ်ပြုလုပ်ခြင်းဖြစ်သည်။
မြန်မာနိုင်ငံဘောလုံးအဖွဲ့ချုပ်၊ မြန်မာနေရှင်နယ်လိဂ်ကော်မတီကကြီးမှူး၍ ၂၀၂၆-၂၇ ဘောလုံးရာသီ မြန်မာအမျိုးသမီးလိဂ်ပြိုင်ပွဲကို မနက်ဖြန် ဇွန် ၁၅ ရက်မှစတင်ကာ ရန်ကုန်မြို့ရှိ သုဝဏ္ဏအားကစားကွင်း၊ ပဒုမ္မာအားကစားကွင်း၊ သုဝဏ္ဏလေ့ကျင့်ရေးကွင်း (၁)၊ Yangon United Sports Complex (Y.U.S.C) နှင့် ပုသိမ်မြို့ကိုးသိန်းအားကစားကွင်းတို့တွင် ကျင်းပသွားမည်ဖြစ်သည်။
ယခုနှစ်ဘောလုံးရာသီ၌ မြန်မာအမျိုးသမီးလိဂ်အား ဘက်ရှိချန်ပီယံ ဧရာဝတီအက်ဖ်စီ၊ I.S.P.E အက်ဖ်စီ၊ သစ္စာအားမာန် အက်ဖ်စီ၊ ရန်ကုန် ယူနိုက်တက် အက်ဖ်စီ၊ ရှမ်းယူနိုက်တက်အက်ဖ်စီ၊ Young Lionesses အက်ဖ်စီ၊ မြဝတီအက်ဖ်စီ၊ ရန်ကုန်စီးတီး အက်ဖ်စီ၊ ရတနာပုံအက်ဖ်စီနှင့် ဇွဲကပင်ယူနိုက်တက်အက်ဖ်စီတို့ပါဝင်ယှဉ်ပြိုင်မည်ဖြစ်သည်။