စုံ/မ စနစ်ဖြင့် စက်သုံးဆီရောင်းပေးမည်

၂၀၂၆ ခုနှစ် မတ်လ ၇ ရက်မှစတင်ပြီး စုံ/မ စနစ်ဖြင့် စက်သုံးဆီရောင်းပေးမည်ဖြစ်ကြောင်း သိရသည်။

အဆိုပါစနစ်အရ ပုဂ္ဂလိကယာဉ်များကို နေ့ရက်အလိုက် အလှည့်ကျစနစ်ဖြင့် စက်သုံးဆီရောင်းချပေးသွားမည်။

‘‘စုံ’’ ရက်များတွင် ‘’စုံ’’ဂဏန်းဖြစ်သော ဥပမာအားဖြင့် 2A/…, 4A/… စသည့် ယာဉ်များယာဉ်များကိုသာ စက်သုံးဆီဝယ်ယူခွင့်ပြုမည်ဖြစ်သည်။

‘’မ’’ ရက်များတွင် ‘’မ’’ ဂဏန်းဖြစ်သော ဥပမာအားဖြင့် 1A/…, 3A/… စသည့် ယာဉ်များကိုသာ စက်သုံးဆီရောင်းချပေးသွားမည်ဖြစ်သည်။

‘‘စုံ’’ ရက်များတွင် ‘’စုံ’’ဂဏန်း၊ ‘’မ’’ ရက်များတွင် ‘’မ’’ ဂဏန်းဖြစ်သော ယာဉ်များကို စက်သုံးဆီရောင်းချမည့်အပေါ် စွမ်းအင်ဝန်ကြီးဌာနမှ တာဝန်ရှိသူတစ်ဦးက ‘’ ဟုတ်ပါတယ်ဗျ။ စုံ ရက်မှာ စုံကားပဲမောင်းရမယ်ဆိုတော့ စုံကားပဲ ဆီထည့်ပေးမယ်ဆိုတဲ့သဘောဖြစ်သွားတာပေါ့၊ အဲဒီသဘောပါပဲ။ ပြောချင်တာက လမ်းကြောင်းပေါ်မှာက မောင်းလို့ရတဲ့ကားပဲ မောင်းမှာ၊ အဲတော့ မောင်းလို့ရတဲ့ကားတွေက ဆီထည့်ခွင့်ရှိသွားတာပေါ့၊ အဲဒီသဘောပါပဲ။ ထုတ်ပြန်တာက စုံရက်မှာစုံကား၊ မရက်မှာ မကားပဲထွက်ရမယ်လို့ ညွှန်ကြားတာ၊ ဆီထည့်ဖို့ကကျတော့ understood ဖြစ်သွားတာပေါ့နော်။ ထွက်လို့ရတဲ့ကားတွေသည် ဆီထည့်လို့ရတဲ့ကားပဲဖြစ်သွားတယ်ပေါ့””ဟု ရှင်းပြခဲ့သည်။

စက်သုံးဆီခြိုးခြံချွေတာရေးနှင့် ဖူလုံမှုရှိစေရေးအတွက် ၂ဝ၂၆ ခုနှစ်၊ မတ်လ ၇ ရက်မှစတင်၍ ပုဂ္ဂလိကယာဉ်များ၊ လုပ်ငန်းသုံးယာဉ်များနှင့် သယ်ယူ ပို့ဆောင်ရေးယာဉ်များသည် စုံ/မစနစ်ဖြင့် မောင်းနှင်ရမည်ဖြစ်သည်။