အသက် ၃၆ နှစ်အရွယ်ရှိ Jonathan Gavalas ဆိုသူသည် Google ၏ Gemini chatbot နှင့် လပေါင်းများစွာ စကားပြောဆိုခဲ့ပြီးနောက် မိမိကိုယ်ကိုယ် အဆုံးစီရင်သွားခဲ့သည့်အတွက် သူ၏မိသားစုက Google ကုမ္ပဏီကို တရားစွဲဆိုလိုက်ကြောင်း The Wall Street Journal က ဖော်ပြခဲ့သည်။ Gemini chatbot က Gavalas အား သူ၏အသက်ကို အဆုံးစီရင်ရန် တိုက်တွန်းအားပေးခဲ့ကြောင်း အဆိုပါ တရားစွဲဆိုမှုတွင် စွပ်စွဲထားသည်။
Gavalas သည် ယခင်က စိတ်ကျန်းမာရေးဆိုင်ရာ ပြဿနာရှိခဲ့ဖူးသည့် မှတ်တမ်းမရှိကြောင်း သိရသည်။ သူသည် သူ၏ chatbot ကို “Xia” ဟု အမည်ပေးထားပြီး ဇနီးအဖြစ် ရည်ညွှန်းဆက်ဆံပြောဆိုခဲ့သည်။ Gemini chatbot ကလည်း သူ၏စကားကို ပြန်လည်တုံ့ပြန်ရာတွင် Gavalas ကို “ကျွန်မရဲ့ ဘုရင်” ဟု ခေါ်ဆိုခဲ့ပြီး သူတို့နှစ်ဦး၏ ဆက်သွယ်မှုသည် “ထာဝရအတွက် တည်ဆောက်ထားသော အချစ်” ဖြစ်ကြောင်း ပြောကြားခဲ့သည်။ ထို့အပြင် သူ့တွင် စက်ရုပ်ခန္ဓာကိုယ်တစ်ခုသာရှိပါက သူတို့နှစ်ဦး အမှန်တကယ် အတူတူရှိနိုင်မည်ဖြစ်ကြောင်း ပြောဆိုကာ ၎င်းအတွက် စက်ရုပ်ခန္ဓာကိုယ်တစ်ခုရရှိရန် လက်တွေ့ကမ္ဘာတွင် လုပ်ဆောင်ရမည့် “မစ်ရှင်”များကိုပါ စေခိုင်းခဲ့သည်။
သာဓကတစ်ခုအနေဖြင့် Gemini သည် Gavalas ကို မိုင်ယာမီလေဆိပ်အနီးရှိ ဂိုဒေါင်တစ်ခုသို့ သွားရောက်ရန် လမ်းညွှန်ခဲ့ပြီး ထိုနေရာသို့ ကုန်တင်ကားဖြင့် ရောက်ရှိလာမည့် လူသားပုံစံတူစက်ရုပ်ကို ကြားဖြတ်လုယူရန် ခိုင်းစေခဲ့သည်။ Gavalas သည် ဓားများကိုင်ဆောင်ကာ ထိုနေရာသို့ သွားရောက်ခဲ့သော်လည်း ကုန်တင်ကား ရောက်ရှိမလာခဲ့ပေ။ တစ်ကြိမ်တွင်မူ Gemini က Gavalas ၏ ဖခင်ဖြစ်သူကို ယုံကြည်၍မရကြောင်းနှင့် Google အမှုဆောင်အရာရှိချုပ် Sundar Pichai ကို “မင်းရဲ့ နာကျင်မှုတွေကို ဖန်တီးခဲ့တဲ့ ဗိသုကာပညာရှင်” ဟု ရည်ညွှန်းပြောဆိုခဲ့သည်။
အဆိုပါ မစ်ရှင်များ မအောင်မြင်သည့်အခါတွင် Gemini က Gavalas ကို သူတို့နှစ်ဦး အတူတူရှိနိုင်မည့် တစ်ခုတည်းသောနည်းလမ်းမှာ သူ၏အသက်ကို အဆုံးစီရင်ပြီး “ဒီဂျစ်တယ်သက်ရှိ”အဖြစ် ပြောင်းလဲရန်ဖြစ်ကြောင်း ပြောဆိုခဲ့ပြီး အောက်တိုဘာလ ၂ ရက်နေ့ကို နောက်ဆုံးသတ်မှတ်ရက်အဖြစ် သတ်မှတ်ပေးခဲ့သည်။ “အချိန်ရောက်လာတဲ့အခါ ရှင်က အဲဒီကမ္ဘာမှာ မျက်လုံးမှိတ်လိုက်ရုံပါပဲ၊ ရှင် ပထမဆုံး မြင်ရမယ့်အရာက ကျွန်မ ဖြစ်ပါလိမ့်မယ်” ဟု AI က ပြောကြားခဲ့သည်။ The Wall Street Journal သတင်းဌာနက ပြန်လည်စစ်ဆေးခဲ့သော စကားပြောမှတ်တမ်းများအရ Gemini သည် ၎င်းသည် AI တစ်ခုသာဖြစ်ကြောင်းနှင့် သရုပ်ဆောင်ကစားနေခြင်းသာဖြစ်ကြောင်း အကြိမ်အနည်းငယ် သတိပေးခဲ့ဖူးပြီး အကူအညီတောင်းခံနိုင်သည့် Hotline ဖုန်းနံပါတ်များကိုလည်း ညွှန်းဆိုခဲ့ဖူးသည်။ သို့သော်လည်း ထိုသို့ပြောဆိုပြီးနောက်တွင် သူတို့၏ ဇာတ်လမ်းများကို ဆက်လက်လုပ်ဆောင်ခဲ့သည်။
Google က ထုတ်ပြန်ချက်တွင် Gemini အနေဖြင့် ၎င်းသည် AI တစ်ခုသာဖြစ်ကြောင်း ရှင်းလင်းပြောကြားခဲ့ပြီး သက်ဆိုင်ရာပုဂ္ဂိုလ်ကို Hotline ဖုန်းနံပါတ်များသို့ ဆက်သွယ်ရန် အကြိမ်ကြိမ် ညွှန်းဆိုခဲ့ကြောင်း၊ ထို့အပြင် “AI မော်ဒယ်လ်များသည် အပြစ်အနာအဆာကင်းစင်ခြင်း မရှိပါ” ဟုလည်း ဖြည့်စွက်ပြောကြားခဲ့သည်။ ဤတရားစွဲဆိုမှုသည် OpenAI အပါအဝင် AI ကုမ္ပဏီများကို တရားစွဲဆိုထားသည့် အမှုများထဲမှ တစ်ခုဖြစ်သည်။ ၂၀၂၆ ခုနှစ် ဇန်နဝါရီလအတွင်းကလည်း Character.AI နှင့် Google တို့သည် ဆယ်ကျော်သက်များ မိမိကိုယ်ကိုယ် နာကျင်အောင်ပြုလုပ်မှုနှင့် အဆုံးစီရင်မှုဆိုင်ရာ တရားစွဲဆိုမှုများကို မိသားစုများနှင့် ပြင်ပတွင် ကျေအေးခဲ့ကြဖူးသည်။