စက်မှုလုပ်ငန်းနှင့် စက်မှုဇုန်ဖွံ့ဖြိုးတိုးတက်ရေးလုပ်ဆောင်ရန် အချက်(၁၅)ချက်ကို အချိန်မှီဆောင်ရွက်ရန် လုပ်ဆောင်မည်

စက်မှုဇုန်ဖွံ့ဖြိုးတိုးတက်ရေး ဗဟိုကော်မတီ ညှိနှိုင်းအစည်းအဝေးကို အောက်တိုဘာလဆန်းပိုင်းက ကျင်းပခဲ့ပြီး နိုင်ငံတော်ဝန်ကြီးချုပ်က အချက်(၁၅)ချက်ကို အချိန်မီဆောင်ရွက်ရန် လမ်းညွှန်ထားကြောင်း စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းက ပြောသည်။ စက်မှုလုပ်ငန်းနှင့် စက်မှုဇုန်ဖွံ့ဖြိုးတိုးတက်ရေးဗဟိုကော်မတီ၏ လမ်းညွှန်ချက်များကို မန္တလေးတိုင်းရှိ စက်မှုဇုန်ဖော်ဆောင်ရေးနှင့် ကြီးကြပ်မှုကော်မတီ၊ မန္တလေးတိုင်းကုန်သည်များနှင့် စက်မှုလက်မှုလုပ်ငန်းရှင်များအသင်းနဲ့ စက်မှုဇုန်တာဝန်ရှိသူများကို အောက်တိုဘာ(၁၉)ရက်နေ့က တွေ့ဆုံရှင်းလင်းခဲ့ချိန် ပြည်ထောင်စုဝန်ကြီးက အထက်ပါအတိုင်းပြောကြားခဲ့ခြင်းဖြစ်သည်။ အမြန်ဆုံးပြီးစီးနိုင်ရေးအတွက် အချိန်ဇယားများရေးဆွဲဆောင်ရွက်သွားရမည်ဖြစ်ကြောင်းလည်း ဒေါက်တာချာလီသန်းက ပြောသည်။ လက်ရှိ ဒေသဆိုင်ရာကော်မတီ၏ လုပ်ငန်းတာဝန်များ စက်မှုဇုန်အသီးသီးရှိ စက်ရုံတစ်ခုချင်းစီ၏ ရင်းနှီးမြုပ်နှံမှုတန်ဖိုး ထုတ်လုပ်မှုတန်ဖိုး၊ မြင်းကောင်ရေးအား၊ လုပ်သားဦးရေ၊ ထုတ်ကုန်အမျိုးအစား၊ မြေအသုံးပြုမှုတို့ကို ပြုစုတင်ပြပေးရန်လည်း ပြည်ထောင်စုဝန်ကြီးက ပြောကြားခဲ့သည်။