နေပြည်တော်၊ ဇူလိုင် ၂၃
ခန္တီးမြို့နယ်တွင် ပြည်သူ့စစ်မှုထမ်းဥပဒေနှင့် နည်းဥပဒေများကို ကျော်လွန်၍ ဆောင်ရွက်နေသည်ဟုဆိုသည့် ကိစ္စများကို မည်သို့ထိန်းညှိဆောင်ရွက်ပေးမည်ကို သိရှိလိုကြောင်း ခန္တီးမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဂုဏ်ဝမ်းက တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (၂၇) ရက်မြောက်နေ့တွင် မေးမြန်းခဲ့သည်။
ဦးဂုဏ်ဝမ်းက ကိုယ်စားလှယ်များအနေဖြင့် ပြည်သူ့စစ်မှုထမ်းဆင့်ခေါ်ရာတွင် ဥပဒေ၊ နည်းဥပဒေများနှင့်အညီ ဆောင်ရွက်ရန် အုပ်ချုပ်ရေးအဖွဲ့များနှင့် အကြိမ်ကြိမ်ညှိနှိုင်းခဲ့သော်လည်း ခန္တီးမြို့နယ်၌ ဥပဒေနှင့်မညီသည့် အတင်းအဓမ္မဖမ်းဆီးမှုများ ရှိနေကြောင်း တွေ့ရှိရသည်ဟု လွှတ်တော်တွင် တင်ပြခဲ့သည်။
အဆိုပါမေးခွန်းနှင့်ပတ်သက်၍ ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်မင်းသူက ပြန်လည်ရှင်းလင်းဖြေကြားရာတွင် ၂၀၂၆ ခုနှစ် မေ ၉ ရက်မှ ၁၃ ရက်အတွင်း ပြည်သူ့စစ်မှုထမ်းရန် ခေါ်ဆောင်ခံရသည်ဟု တင်ပြထားသည့် လူ(၉)ဦး၏ အခြေအနေကို စိစစ်ခဲ့ကြောင်း ပြောကြားသည်။
စိစစ်ချက်အရ ဦးဆားပါ၊ ဦးဖိုးချစ်လုံး၊ ဦးနောင်မိုင်နှင့် ဦးဇော်ဝင်းတို့ (၄)ဦးမှာ ပြည်သူ့စစ်မှုထမ်းဥပဒေနှင့် နည်းဥပဒေများအရ စစ်မှုထမ်းရမည့်သူများဖြစ်သဖြင့် ပြည်သူ့စစ်မှုထမ်းသင်တန်း အမှတ်စဉ် (၂၅)တွင် တက်ရောက်လျက်ရှိကြောင်း၊ ကျန် (၅)ဦးအနက် ဦးသီဟစိုးမှာ သတ်မှတ်အသက်ကျော်လွန်နေသူဖြစ်ပြီး ဦးသန်းထွန်းအောင်၊ ဦးရှိန်မင်းအောင်နှင့် ဦးမင်းသန့်တို့မှာ ကျောင်းသားများဖြစ်ကြောင်း၊ ဦးဉာဏ်မြင့်လှိုင်မှာ မိဘအိုများကို လုပ်ကိုင်ကျွေးမွေးနေသူဖြစ်သဖြင့် မြို့နယ်ပြည်သူ့စစ်မှုထမ်းဆင့်ခေါ်ရေးအဖွဲ့က မိဘအုပ်ထိန်းသူများထံ စနစ်တကျ ပြန်လည်အပ်နှံပေးခဲ့ကြောင်း ရှင်းလင်းပြောကြားသည်။
ဒုတိယဝန်ကြီးက အဆိုပါ (၉)ဦးမှာ ပုံစံ(၁) အမည်စာရင်းတွင် ပါဝင်သူများဖြစ်ပြီး မြို့နယ်ပြည်သူ့စစ်မှုထမ်းဆင့်ခေါ်ရေးအဖွဲ့က ပုံစံ(၂)ဖြင့် ဥပဒေနှင့်အညီ ဆင့်ခေါ်ခဲ့ခြင်းဖြစ်ကြောင်း၊ အတင်းအဓမ္မဖမ်းဆီးခေါ်ဆောင်ခဲ့ခြင်း မဟုတ်ကြောင်းလည်း ပြောကြားသည်။
ထို့ပြင် ပြည်သူ့စစ်မှုထမ်းဆင့်ခေါ်ရေးအဖွဲ့ အဆင့်ဆင့်အနေဖြင့် ဥပဒေနှင့်မညီသည့် ဆင့်ခေါ်မှုများ မဖြစ်ပေါ်စေရေး ကြပ်မတ်ဆောင်ရွက်လျက်ရှိပြီး ဥပဒေ၊ နည်းဥပဒေများကို ကျော်လွန်၍ ဆောင်ရွက်မှုများ တွေ့ရှိပါက ထိရောက်စွာ အရေးယူဆောင်ရွက်သွားမည်ဖြစ်ကြောင်း ဒုတိယဝန်ကြီး ဗိုလ်ချုပ်မင်းသူက လွှတ်တော်တွင် ပြန်လည်ဖြေကြားခဲ့သည်။
ဒုတိယဝန်ကြီး၏ ပြောကြားချက်အရ လူဦးရေ ၄၃,၀၅၃ ဦးခန့်ရှိသည့် ခန္တီးမြို့နယ်တွင် ပြည်သူ့စစ်မှုထမ်း ဆင့်ခေါ်ရာ၌ စစ်ကိုင်းတိုင်းဒေသကြီးအစိုးရအဖွဲ့က သတ်မှတ်ထားသည့် လူဦးရေခွဲတမ်းအရ အပတ်စဉ် (၆) ဦးနှုန်းဖြင့် ဆောင်ရွက်လျက်ရှိကြောင်း သိရသည်။