အာဆီယံ အထွေထွေအတွင်းရေးမှူးချုပ် ဒေါက်တာ ကောင်းကင်ဟွန်း (Dr. Kao Kim Hourn) ဟာ ဖိလစ်ပိုင်နိုင်ငံ၊ မနီလာမြို့မှာ ဒီကနေ့ ကျင်းပတဲ့ (၃၃) ကြိမ်မြောက် အာဆီယံ ဒေသဆိုင်ရာ ဖိုရမ် (ARF) ကို တခြား ARF အဖွဲ့ဝင်တွေဆီက နိုင်ငံခြားရေးဝန်ကြီးတွေ၊ ကိုယ်စားလှယ်တွေနဲ့အတူ ပါဝင်တက်ရောက်ခဲ့ပါတယ်။ ဒီအစည်းအဝေးမှာ ဖိုရမ်ကို ဒီထက်ပိုပြီး အားကောင်းလာစေဖို့ ကြိုးပမ်းရမယ့် အပိုင်းတွေကို ဆွေးနွေးခဲ့ကြသလို၊ ဒေသတွင်းနဲ့ နိုင်ငံတကာရေးရာ တိုးတက်ပြောင်းလဲမှု အခြေအနေတွေအပေါ်မှာလည်း အမြင်ချင်းဖလှယ် ဆွေးနွေးခဲ့ကြပါတယ်။
ဒါ့အပြင် အာဆီယံကို ဗဟိုပြုတဲ့စနစ်အပေါ် ARF အဖွဲ့ဝင်တွေရဲ့ ထောက်ခံမှုကို ဒီအစည်းအဝေးမှာ ထပ်လောင်း အတည်ပြုခဲ့ကြပါတယ်။ ARF ဟာ နိုင်ငံရေးနဲ့ လုံခြုံရေးဆိုင်ရာ ကိစ္စရပ်တွေအတွက် ဆွေးနွေးတိုင်ပင်ဖို့နဲ့ ပူးပေါင်းဆောင်ရွက်ဖို့၊ အားလုံးပါဝင်နိုင်တဲ့၊ အခြေအနေနဲ့ ဆီလျော်ပြီး လက်တွေ့ကျကျ တုံ့ပြန်ဖြေရှင်းနိုင်တဲ့ စင်မြင့်တစ်ခုအဖြစ် ဆက်ရှိနေစေဖို့ သူတို့ရဲ့ ကတိကဝတ်တွေကိုလည်း ပြသခဲ့ကြပါတယ်။
ဖိလစ်ပိုင်နိုင်ငံ မက်ထရိုမနီလာ၊ ပေဆေး (Pasay) မြို့မှာ ဒီနေ့(ဇူလိုင်လ ၂၃ ရက်) ကျင်းပတဲ့ အာဆီယံ နိုင်ငံခြားရေးဝန်ကြီးများ အစည်းအဝေးနဲ့ ဆက်စပ်ကျင်းပတဲ့ ဒီအာဆီယံ ဒေသဆိုင်ရာ ဖိုရမ် (ARF) ကို ပြည်ထောင်စုမြန်မာနိုင်ငံ နိုင်ငံခြားရေးဝန်ကြီးဌာနရဲ့ အမြဲတမ်းအတွင်းဝန် ဦးဟောက်ခန့်ဆုမ်းလည်း တက်ရောက်ခဲ့ပါတယ်။