နေပြည်တော်၊ ဇဗ္ဗူသီရိမြို့နယ်တွင် ယနေ့ ဇူလိုင် ၂၃ ရက်နံနက် ၉ နာရီ ၁၅ မိနစ်ခန့်က ဗေဗေ့မောင်ဆည်မှလာသော ရေနှုတ်မြောင်းရေလျှံမှုဖြစ်ပွားခဲ့ကြောင်း သိရသည်။
ရေလျှံမှုကြောင့် ရွှေကြာပင်ရပ်ကွက်၊ ငဝန်လမ်း၊ စိန် ပန်းပြာ(၁)လမ်း၊ စိန်ပန်းပြာ(၂)လမ်း၊ ရွှေလီလမ်းနှင့် ပမ္ပဝတီလမ်းတို့ရှိ နေအိမ်များအတွင်းသို့ရေဝင်ရောက်မှုများဖြစ်ပွားခဲ့သဖြင့် မီးသတ်တပ်ဖွဲ့ဝင်များက ရေဝင်ရောက်နေသည့်နေအိမ်များတွင် နေထိုင်သူများနှင့် ပစ္စည်းများအားကူညီရွှေ့ပြောင်းပေးခဲ့ကြကြောင်း သိရသည်။
ထို့ပြင် မြို့နယ်အတွင်းရှိ ဝန်ထမ်းအိမ်ရာမှတိုက်အချို့ ၏ မီတာများရေမြုပ်နေ၍ လျှပ်စစ်ဓာတ်အားဖြတ်တောက်ထားရသည့်အပြင် ကံ့ကော်အိမ်ရာ၊ ပိတောက်အိမ်ရာ၊ ၃ ထောင်ကျော်၊ ၄ ထောင်ကျော်၊ ၅ ထောင်ကျော်နှင့် ၆ ထောင်ကျော်ဝန်ထမ်းအိမ်ရာများသို့ ဓာတ်အားပေးထားသော (၄၀၀)ဗို့ Panel များနှင့် Cable များရေမြုပ်နေကြောင်း သိရသည်။