ကားလမ်းမကြီးများပေါ်ရှိ တရားမဝင်ငွေကြေးကောက်ခံမှုများ တိုင်ကြားလာပါက ဥပဒေအရ အရေးယူလျက်ရှိဟု ဒုတိယဝန်ကြီး ပြော

နေပြည်တော်၊ ဇူလိုင် ၂၅

တစ်နိုင်ငံလုံးရှိ ကားလမ်းမကြီးများပေါ်တွင် တရားဝင်လုံခြုံရေးဂိတ်အချို့၏ တရားမဝင်ငွေကြေးကောက်ခံမှုများ ပပျောက်စေရေးနှင့်ပတ်သက်၍ တိုင်ကြားချက်များ ရရှိပါက တည်ဆဲဥပဒေများနှင့်အညီ အရေးယူဆောင်ရွက်လျက်ရှိကြောင်း ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်မင်းသူက ပြောကြားခဲ့သည်။

တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (၂၉) ရက်မြောက်နေ့တွင် မိုးကောင်းမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးထွန်းထွန်းအောင်က ကချင်ပြည်နယ်နှင့် တစ်နိုင်ငံလုံးရှိ ကားလမ်းမကြီးများပေါ်၌ တရားမဝင်ငွေကြေးကောက်ခံမှုများ လျော့နည်းပပျောက်စေရေးအတွက် အစီအမံများရှိ၊ မရှိ မေးမြန်းခဲ့ရာ ဒုတိယဝန်ကြီးက ယင်းကဲ့သို့ ပြန်လည်ဖြေကြားခဲ့ခြင်းဖြစ်သည်။

ဒုတိယဝန်ကြီးက ပူးပေါင်းစစ်ဆေးရေးဂိတ်များတွင် ခရီးသွားပြည်သူများ စိတ်အနှောင့်အယှက်မဖြစ်စေရေး၊ ယာဉ်ကြောပိတ်ဆို့မှုနှင့် စောင့်ဆိုင်းချိန်ကြာမြင့်မှုများ မဖြစ်ပေါ်စေရေး၊ တရားမဝင်ငွေကြေးကောက်ခံမှုများ မရှိစေရေးတို့အတွက် တာဝန်ရှိသူအဆင့်ဆင့်က ကြပ်မတ်ဆောင်ရွက်လျက်ရှိကြောင်း ပြောကြားသည်။

ထို့ပြင် မော်တော်ယာဉ်များထံမှ ငွေကြေးမတရားတောင်းခံခြင်း မပြုရန် အသိပေးစာနှင့် တိုင်ကြားနိုင်သည့် ဖုန်းနံပါတ်များပါဝင်သော ဗီနိုင်းဆိုင်းဘုတ်များကို စိုက်ထူထားပြီး တိုင်ကြားချက်များ ရရှိပါက စုံစမ်းစစ်ဆေး၍ တည်ဆဲဥပဒေများနှင့်အညီ အရေးယူဆောင်ရွက်လျက်ရှိကြောင်း ပြောကြားခဲ့သည်။

ထို့အပြင် မန္တလေး-မြစ်ကြီးနား ကားလမ်းကြောင်းရှိ ပူးပေါင်းစစ်ဆေးရေးဂိတ်များတွင်လည်း တာဝန်ရှိသူအဆင့်ဆင့်၏ ကြပ်မတ်စစ်ဆေးမှုများ၊ CCTV ကင်မရာများဖြင့် စောင့်ကြည့်ခြင်း၊ ငွေကြေးတောင်းခံမှုမပြုရန် အသိပညာပေးတားမြစ်ခြင်းနှင့် တိုင်ကြားချက်များအပေါ် ဥပဒေနှင့်အညီ အရေးယူဆောင်ရွက်ခြင်းများကို ဆက်လက်ဆောင်ရွက်လျက်ရှိကြောင်း ဒုတိယဝန်ကြီး ဗိုလ်ချုပ်မင်းသူက ပြန်လည်ဖြေကြားခဲ့သည်။