တရုတ်နိုင်ငံ ယူနန်ပြည်နယ် ကူမင်းမြို့၌ ကျင်းပနေသည့် ၁၀ ကြိမ်မြောက် တရုတ်–တောင်အာရှ ကုန်စည်ပြပွဲ (China-South Asia Expo) တွင် မြန်မာ့ကျောက်စိမ်း (Myanmar Jade) ကို အထူးပြခန်းတစ်ခုအဖြစ် ထည့်သွင်းပြသထားပြီး မြန်မာ့ကျောက်စိမ်း လေလံပွဲကို နိုင်ငံပြင်ပ၌ ပထမဆုံးအကြိမ် ကျင်းပသွားမည်ဖြစ်ကြောင်း ပြပွဲစီစဉ်သူများထံမှ သိရသည်။
Hall-7 ၌ ဖွင့်လှစ်ထားသည့် Myanmar Jade Auction Pavilion တွင် လုပ်ငန်း ၁၈ ခုမှ တင်ပြထားသည့် ကျောက်စိမ်းအကြမ်းထည်နှင့် အချောထည် လက်ဝတ်ရတနာ အမျိုးအစား ၁၀၀ ကျော်ကို ပြသရောင်းချသွားမည်ဖြစ်သည်။
ပြပွဲတာဝန်ရှိသူများ၏ အဆိုအရ ယခုလေလံပွဲသည် နှစ်ပေါင်း ၆၀ ကျော်အတွင်း မြန်မာနိုင်ငံပြင်ပ၌ ပထမဆုံးကျင်းပသည့် မြန်မာ့ကျောက်စိမ်း လေလံပွဲဖြစ်ပြီး ကျောက်စိမ်းကုန်သွယ်မှုဆိုင်ရာ စည်းမျဉ်းစည်းကမ်းများနှင့် အသင်းဝင်မှတ်ပုံတင်စနစ်များကိုလည်း ပြပွဲအတွင်း ပထမဆုံးအကြိမ် ထုတ်ပြန်မိတ်ဆက်သွားမည်ဖြစ်ကြောင်း သိရသည်။
ထို့အပြင် ယူနန်ပြည်နယ်အစိုးရနှင့် မြန်မာနိုင်ငံ သဘာဝသယံဇာတဆိုင်ရာ တာဝန်ရှိဌာနတို့သည် ၂၀၂၆ ခုနှစ် ဖေဖော်ဝါရီလအတွင်း တရုတ်–မြန်မာနယ်စပ် ကျယ်ကောင် (Jiegao) နယ်စပ်ကုန်သွယ်ရေးဇုန်၌ မြန်မာ့ကျောက်စိမ်း လေလံပွဲများ ပူးပေါင်းကျင်းပနိုင်ရေး နားလည်မှုစာချွန်လွှာကို လက်မှတ်ရေးထိုးခဲ့ကြောင်း သိရသည်။
ယခုပြပွဲတွင် ကျောက်စိမ်းအကြမ်းထည်များ ကြည့်ရှုရွေးချယ်နိုင်ခြင်း၊ အချောထည်လက်ဝတ်ရတနာများ ရောင်းဝယ်နိုင်ခြင်းနှင့် အွန်လိုင်းတိုက်ရိုက်ရောင်းချမှုအစီအစဉ်များကို တစ်နေရာတည်း၌ ဆောင်ရွက်ပေးထားပြီး မြန်မာ့ကျောက်စိမ်းကို နိုင်ငံတကာဝယ်လက်များနှင့် ချိတ်ဆက်ပေးနိုင်မည့် အခွင့်အလမ်းသစ်တစ်ရပ် ဖော်ဆောင်ပေးလျက်ရှိကြောင်း ပြပွဲဘက်က ဆိုသည်။
ဇွန် ၁၁ ရက်မှ ၁၆ ရက်အထိ ကျင်းပမည့် ယခုနှစ် တရုတ်–တောင်အာရှ ကုန်စည်ပြပွဲတွင် နိုင်ငံနှင့်ဒေသပေါင်း ၆၈ ခုမှ လုပ်ငန်းပေါင်း ၂,၃၀၀ ကျော် ပါဝင်ပြသနေပြီး ပြည်ပလုပ်ငန်းများ၏ ပါဝင်မှုအချိုးမှာ ၄၂ ရာခိုင်နှုန်းအထိ ရှိနေကြောင်း သိရသည်။ ထို့ပြင် နိုင်ငံပေါင်း ၄၅ ခုမှ ဝယ်ယူရေးကိုယ်စားလှယ်အဖွဲ့များ တက်ရောက်မည်ဖြစ်ရာ မြန်မာ့ကျောက်စိမ်းကဏ္ဍအတွက် နိုင်ငံတကာဈေးကွက်ချဲ့ထွင်နိုင်မည့် အခွင့်အလမ်းများ ရရှိလာနိုင်ကြောင်း လုပ်ငန်းရှင်များက မျှော်လင့်ထားကြသည်။
တရုတ်–တောင်အာရှ ကုန်စည်ပြပွဲသည် တရုတ်နှင့် တောင်အာရှနိုင်ငံများအကြား ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်မှုများ မြှင့်တင်ရန် ရည်ရွယ်၍ ကျင်းပသည့် အရေးပါသော ဒေသဆိုင်ရာ စီးပွားရေးပြပွဲတစ်ခုဖြစ်ပြီး ယခုနှစ်တွင် မြန်မာ့ကျောက်စိမ်း လေလံပွဲ ပါဝင်လာခြင်းက မြန်မာ့ကျောက်မျက်ကဏ္ဍအတွက် နိုင်ငံတကာဈေးကွက်သို့ တိုးချဲ့ဝင်ရောက်နိုင်မည့် အလားအလာသစ်တစ်ရပ်အဖြစ် သတ်မှတ်ခံထားရသည်။
