အမေရိကန်နှင့် အခွန်နှုန်းထားဆိုင်ရာ သဘောတူညီချက်ရပြီးနောက် ဘင်္ဂလားဒေ့ရှ်၏ အထည်ချုပ်တင်ပို့မှု ၂၅ ရာခိုင်နှုန်းကျော် မြင့်တက်

ဘင်္ဂလားဒေ့ရှ်နိုင်ငံ၏ အမေရိကန်ဈေးကွက်သို့ အထည်ချုပ်ပစ္စည်းတင်ပို့မှုသည် ဩဂုတ်လအတွင်း အမေရိကန်ဒေါ်လာ ၈၀၆.၄၆ သန်းအထိ ရောက်ရှိခဲ့ပြီး ဇူလိုင်လနှင့် နှိုင်းယှဉ်ပါက ၂၅.၆၅ ရာခိုင်နှုန်း မြင့်တက်ခဲ့ကြောင်း ဘင်္ဂလားဒေ့ရှ် ပို့ကုန်မြှင့်တင်ရေးဗျူရို (EPB) ၏ အချက်အလက်များအရ သိရသည်။

အမေရိကန်ဈေးကွက်သို့ တင်ပို့ရာတွင် အခွန်နှုန်းထားဆိုင်ရာ သဘောတူညီချက်ရရှိပြီးနောက် အထည်ချုပ်တင်ပို့မှုများ ပြန်လည်အားကောင်းလာခြင်းဖြစ်ကြောင်း သိရသည်။

ဇူလိုင်နှင့် ဩဂုတ် နှစ်လအတွင်း အမေရိကန်သို့ အထည်ချုပ်တင်ပို့မှုမှ ဒေါ်လာ ၁.၆၁ ဘီလီယံ ရရှိခဲ့ပြီး ယခင်နှစ် အလားတူကာလက ရရှိခဲ့သည့် ဒေါ်လာ ၁.၄၄ ဘီလီယံနှင့် နှိုင်းယှဉ်ပါက ၁၁.၄၂ ရာခိုင်နှုန်း မြင့်တက်ခဲ့သည်။

အဆိုပါ နှစ်လအတွင်း တင်ပို့မှုတန်ဖိုးသည် ၂၀၂၅-၂၀၂၆ ဘဏ္ဍာနှစ်တစ်နှစ်လုံး အမေရိကန်သို့ အထည်ချုပ်တင်ပို့မှုမှ ရရှိခဲ့သည့် ဒေါ်လာ ၇.၇၄ ဘီလီယံ၏ ၂၀.၈ ရာခိုင်နှုန်းနှင့် ညီမျှကြောင်း သိရသည်။

လက်ရှိ တစ်နှစ်ချင်းတိုးတက်မှုနှုန်း ၁၁.၄၂ ရာခိုင်နှုန်းကို ယခုဘဏ္ဍာနှစ်တစ်လျှောက် ဆက်လက်ထိန်းသိမ်းနိုင်ပါက အမေရိကန်သို့ အထည်ချုပ်တင်ပို့မှုတန်ဖိုးသည် ဒေါ်လာ ၈.၆၂ ဘီလီယံခန့်အထိ ရောက်ရှိနိုင်ကြောင်း ခန့်မှန်းထားသည်။

သို့သော် လက်ရှိတင်ပို့မှုတိုးတက်လာခြင်းမှာ ဩဂုတ်လ၏ တိုးတက်မှုက အဓိကဖြစ်ပြီး ဇူလိုင်လတွင်မူ အမေရိကန်သို့ အထည်ချုပ်တင်ပို့မှု ၀.၁၈ ရာခိုင်နှုန်း ကျဆင်းခဲ့ကြောင်း EPB အချက်အလက်များအရ သိရသည်။