သဘာဝပါတ်ဝန်းကျင် ထိခိုက်မှု နည်းသည့် ရပ်ဆိုင်းနေသောရေအား လျှပ်စစ်လုပ်ငန်းများ ဆက်လက် အကောင်အထည်ဖော်ဖို့ နစက ဥက္ကဌအား ကောင်စီဝင်အချို့ ဆွေးနွေးကြကြောင်း နိုင်ငံပိုင် သတင်းစာတွင်ဖော်ပြရေးသား

နေပြည်တော်၊ဇွန် ၉

သဘာဝပါတ်ဝန်းကျင် ထိခိုက်မှုနည်းသည့် ရပ်ဆိုင်းနေသောရေအား လျှပ်စစ်လုပ်ငန်း များဆက်လက်အကောင်အထည်ဖော်ဖို့ နစက ဥက္ကဌအား ကောင်စီဝင် အချို့ဆွေးနွေးကြသည့်အကြောင်း နိုင်ငံပိုင်သတင်းစာ တွင်ဖော်ပြရေးသားသည်ကိုတွေ့ရသည်။

ဇွန်လ ၇ရက်နေ့က နေပြည်တော်တွင် ပြုလုပ်သည့် နစက အစည်းအဝေး (၁၂/၂၀၂၁)တွင် ကောင်စီဝင်အချို့က အထက်ပါအတိုင်း ဆွေးနွေးအကြံပြုခဲ့ကြသည်ဟု ဇွန်၈ရက်ထုတ် မြန်မာ့အလင်းနှင့်ကြေးမုံ သတင်းစာကဖော်ပြသည်။

ဖော်ပြချက်တွင် နိုင်ငံ၏လျှပ်စစ် ဓာတ်အား လိုအပ်ချက် ဖြည့်ဆည်းနိုင်ရန်နှင့် ပြည်ပဝင်ငွေရရှိရန် သဘာဝပတ်ဝန်းကျင် ထိခိုက်မှု နည်းပါးသည့် ရပ်ဆိုင်းနေသော ရေအားလျှပ်စစ် စီမံကိန်းများ ဆက်လက်အကောင်အထည် ဖော်ရေး အတွက် ပြန်လည် သုံးသပ်ရေးဟု ဆိုထားသည်။

အထက်ပါ တိုက်တွန်းချက်အား မည်သူ ကဆောင်ရွက်ခဲ့သည်ကို သတင်းစာက သီးခြား မရေးသားသော်လည်း ကောင်စီဝင် များဖြစ်ကြ သည့် ဦးသိန်းညွန့်၊ မန်းငြိမ်းမောင်၊ ဦးခင်မောင်ဆွေ၊ Jeng Phang နော်တောင်၊ ဒေါ်အေးနုစိန်၊ ဦးမောင်းဟာ၊ ဦးစိုင်းလုံးဆိုင်၊ ဦးရွှေကြိမ်း တို၏ ဆွေးနွေးတင်ပြချက်ထဲ ရေအား လျှပ်စစ်လုပ်ငန်းများ ဆက်လက် အကောင်အထည်ဖော်ဖို့ ကိစ္စအား ထည့်သွင်း ဖော်ပြထား သည် ကိုသာတွေ့ရှိရသည်။

ကောင်စီဝင်များသည် နစက ဥက္ကဌဗိုလ်ချုပ်မှူးကြီးမင်းအောင်လှိုင်အား ဆွေးနွေးတင်ပြကြရာတွင် ရေအား လျှပ်စစ်ကိစ္စရပ်သာမက အခြေခံ ဥပဒေနှင့် ညီညွတ်မှု မရှိဘဲ လုပ်ပိုင်ခွင့်ကျော်လွန်ဆောင်ရွက်ခဲ့သည့် အဂတိ လိုက်စားမှု များကို စိစစ်ဖော် ထုတ်အရေးယူရေး၊ အားကစားသမားများ နိုင်ငံတော် အပေါ် သစ္စာ စောင့်သိရေးနှင့် နိုင်ငံ့သားကောင်း တစ်ယောက်တွင် ရှိရမည့် ကျင့်ဝတ်များ ရှိစေရန် လေ့ကျင့်ပျိုးထောင် ပေးရေး စသည် တိုနှင့် စပ်လျဉ်းပြီး၍လည်း ဆွေးနွေးတင်ပြခဲ့ကြသည်ဟုလည်း သတင်းစာ ကဖော်ပြရေးသား ထားသည်။

ဗိုလ်ချုပ်မှူးကြီးက လျှပ်စစ်ကဏ္ဍနှင့် ပတ်သက်ပြီး တိုင်းဒေသကြီးနှင့် ပြည်နယ်များ၏ လျှပ်စစ် လိုအပ်ချက်ကို ဖြည့်ဆည်း ပေးနိုင်ရန် လောင်စာစနစ်သုံး လျှပ်စစ်ဓာတ်အား ထုတ်လုပ်မှုကို အားမပေးလိုကြောင်း၊ ပြန်လည်ပြည့်ဖြိုးမြဲ စွမ်းအင်မှ လျှပ်စစ်ဓာတ်အား ထုတ်လုပ်မှု များကိုသာ အကောင်အထည်ဖော်ရန် လိုအပ်ပြီး ထိုသို့ ထုတ်ယူရာတွင် သက်ဆိုင်သည့် ပြည်နယ်များကို ရာခိုင်နှုန်းပြည့် သုံးစွဲနိုင်ရေး ဦးစားပေးစီမံပေးရန် လိုကြောင်း ကောင်စီဝင်များ၏ တင်ပြချက် အပေါ် ပြန်လည် ဆွေးနွေးခဲ့သည်ဟု သတင်းစာက ဖော်ပြသည်။

ရပ်ဆိုင်းနေသော ရေအား လျှပ်စစ်လုပ်ငန်းများ ဆက်လက်အကောင်အထည်ဖော်ဖို့ ကိစ္စအပေါ် အချို့က မည်သည့် ရေအား လျှပ်စစ် စီမံကိန်းလည်းဟု မေးခွန်းထုတ်လျှက်ရှိနေကြသည်။

နိုင်ငံတွင် ရပ်ဆိုင်းထားသည့် ရေအားလျှပ်စစ်စီမံကိန်း က အနည်းငယ်သာရှိနေသည်။