ဇွန်လ ၁၂ ရက်
ဝါရှင်တန်ဒီစီ မြို့လယ်ရှိ အမျိုးသားရင်ပြင် ၏ မြက်ခင်းပြင်ပေါ်တွင် သမ္မတ ဒေါ်နယ်ထရမ့်ကို ဆန့်ကျင်ကန့်ကွက်မှုများနှင့် ဆက်စပ်နေသည့် “8647” ဂဏန်းအမှတ်အသားကြီးများ ရေးဆွဲထားမှုကို အမေရိကန် ပန်းခြံထိန်းရဲတပ်ဖွဲ့က ကြာသပတေးနေ့တွင် စုံစမ်းစစ်ဆေးမှုတစ်ရပ် စတင်ပြုလုပ်လျက်ရှိကြောင်း သိရသည်။
အမျိုးသားရင်ပြင်ကို စီမံခန့်ခွဲရသည့် ပြည်ထဲရေးဝန်ကြီးဌာန ၏ ပြောရေးဆိုခွင့်ရှိသူတစ်ဦးက ယခုဖြစ်စဉ်သည် “စိတ်ဖောက်ပြန်ကာဖျက်ဆီးမှု”ဖြစ်ကြောင်း ဖော်ပြခဲ့ပြီး “သည်းခံခွင့်လွှတ်သွားမည်မဟုတ်” ဟု ပြောကြားခဲ့သည်။
ပြောရေးဆိုခွင့်ရှိသူက သတင်းထုတ်ပြန်ချက်တစ်ခုတွင် “သမ္မတအပေါ် ခြိမ်းခြောက်မှုမှန်သမျှကို ဝန်ကြီးဌာနအနေနဲ့ အလွန်အလေးအနက် သဘောထားပါတယ်၊ ကျွန်တော်တို့ရဲ့ အမေရိကန် ပန်းခြံထိန်းရဲတပ်ဖွဲ့က ဒီဖြစ်စဉ်ကို စုံစမ်းစစ်ဆေးသွားမှာဖြစ်ပြီး တာဝန်ရှိသူတွေကို အရေးယူသွားမှာပါ” ဟု ဆိုသည်။
ထရမ့်ပ်အစိုးရ၏ တရားရေးဝန်ကြီးဌာနက “8647” ဆိုသည့် ဂဏန်းများသည် သမ္မတအပေါ် ခြိမ်းခြောက်မှုမြောက်သည်ဟု ယခင်ကတည်းက အခိုင်အမာဆိုထားသည်။ “86” ၏ အဓိပ္ပာယ်မှာ သတ်ဖြတ်ခြင်း (to kill) ဖြစ်ပြီး၊ “47” မှာ ၄၇ ဆက်မြောက် အမေရိကန်သမ္မတ ဖြစ်လာသည့် ထရမ့်ကို ရည်ညွှန်းခြင်း ဖြစ်သည်။
ထရမ့်၏ နိုင်ငံရေးပြိုင်ဘက်တစ်ဦးဖြစ်ပြီး ပွင့်ပွင့်လင်းလင်း ဝေဖန်လေ့ရှိသူ FBI ညွှန်ကြားရေးမှူးဟောင်း ဂျိမ်းစ် ကိုမေ သည် ကမ်းခြေရှိ ခရုခွံများဖြင့် “8647” ဟု ပုံဖော်ထားသည့် Instagram ပို့စ်တစ်ခု တင်ခဲ့မှုကြောင့် ရီပတ်ဘလစ်ကန် သမ္မတအပေါ် ခြိမ်းခြောက်ခဲ့သည်ဟူသော စွပ်စွဲချက်ဖြင့် ပြီးခဲ့သည့် ဧပြီလက တရားစွဲဆိုခြင်း ခံခဲ့ရသည်။
ကိုမေသည် အဆိုပါ Instagram ပို့စ်အတွက် ထိုစဉ်ကတည်းက ပြန်လည်တောင်းပန်ခဲ့ပြီး သမ္မတကို ခြိမ်းခြောက်ခဲ့ခြင်းမရှိကြောင်း ငြင်းဆိုခဲ့ကာ “အချို့လူတွေက ဒီဂဏန်းတွေကို အကြမ်းဖက်မှုနဲ့ ဆက်စပ်တွေးတောကြလိမ့်မယ်လို့ ကျွန်တော် သတိမထားမိခဲ့ပါဘူး” ဟု ပြောကြားခဲ့သည်။
Ref: ဆော့သ်ချိုင်းနားမောနင်းပို့စ်