မကွေးတိုင်း၊ မင်းဘူးခရိုင်တွင် လျှပ်စစ်နှင့် ဆိုလာဓာတ်အားစနစ်သုံးရေတင်စီမံကိန်းတို့ဖြင့် မိုးစပါးဧက(၃,၉၀၉) ဧကစိုက်ပျိုးသွားမည်ဟု မင်းဘူးခရိုင်ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာန (ရေအရင်းမြစ်)ထံမှ သိရသည်။
မင်းဘူးခရိုင်အတွင်း သီးနှံစိုက်စွမ်းအားနှင့် သီးနှံအထွက်နှုန်းတိုးတက်မြင့်မားစေရန်ရည်ရွယ်၍ ဇွန် ၂၂ ရက်မှစတင်ကာ တညောင်လျှပ်စစ်ရေတင်စီမံကိန်းမှ(၁,၉၈၁)ဧက၊ ရေပုတ်ကလေးဆိုလာဓာတ်အားပေးစနစ်စီမံကိန်းမှ(၁၀၀)ဧက၊ ကျောင်းကုန်းကြီး ဆိုလာဓာတ်အားပေးစနစ်စီမံကိန်းမှ(၂၄၀)ဧကတို့ကို ရေပေးဝေသွားမည်ဖြစ်ကြောင်း သိရသည်။
ထို့ပြင် ရွာသာကြီးဆိုလာဓာတ်အားပေးစနစ် စီမံ ကိန်းမှ(၅၀၀)ဧက၊ ဘုရားကုန်းဆိုလာဓာတ်အားပေးစနစ်စီမံကိန်းမှ(၈၂)ဧက၊ အောင်ပင်လယ်လျှပ်စစ်စီမံကိန်းမှ(၇၈)ဧက၊ ကျောက်စံလျှပ်စစ်နှင့် ဆိုလာဓာတ်အားစနစ်စီမံကိန်းမှ(၅၂၅)ဧက၊ ကန်းနီဆိုလာဓာတ်အားပေးစနစ်ရေတင်စီမံကိန်းမှ(၄၀၃)ဧကတို့ကိုလည်း ရေပေးဝေသွားမည်ဖြစ်ကြောင်း သိရသည်။
မင်းဘူးခရိုင်အတွင်း မူလဆည်ရေသောက်ဧရိယာနှင့် မိုးကောင်းသောက်ဧရိယာများ၊ အစိုးရဆည်တမံများ၊ လျှပ်စစ်မြစ်ရေတင်စီမံကိန်းများ၊ မြေအောက်ရေစုပ်တင်ခြင်းများ၊ မိုးကောင်းသောက်စနစ်များ စသော ရေရရှိရေးနည်းလမ်းများဖြင့် စပါးစိုက်ပျိုးလျက်ရှိကြောင်း သိရသည်။