ရန်ကုန်တိုင်းဒေသကြီး၊ မင်္ဂလာတောင်ညွန့်မြို့နယ်ရှိ ရွှေနဝလီဆိုင်ရှင်အား တူဖြင့်ထု၍ ငွေကျပ်သိန်း ၄၀ ကျော် လုယက်ထွက်ပြေးသူကို ယနေ့ စက်တင်ဘာ ၁၉ ရက် နံနက်ပိုင်းက ဖမ်းဆီးရမိခဲ့ကြောင်း သိရသည်။
ဖြစ်စဉ်မှာ ယနေ့ နံနက် ၁၀ နာရီခန့်က မင်္ဂလာတောင်ညွန့်မြို့နယ်၊ ကျီတော်ရပ်ကွက်၊ အထက်ပုဇွန်တောင်လမ်း၊ တိုက်အမှတ် (၇၃) မြေညီ လှေကားခွင်တွင် ဖြစ်ပွားခဲ့ခြင်းဖြစ်ကြောင်း သိရသည်။
အဆိုပါနေရာသို့ ပုဇွန်တောင်မြို့နယ်၊ အမှတ် (၇) ရပ်ကွက်၊ ဦးရွှေဂွန်းလမ်းတွင် နေထိုင်သူ အသက် ၃၀ ခန့်အရွယ် ဝင်းပိုင်စိုး ရောက်ရှိလာပြီး အသက် ၆၈ နှစ်အရွယ် ရွှေနဝလီဆိုင်ရှင် ဦးမျိုးတင့်ထံ ရွှေဆွဲကြိုးအတု ရောင်းလိုကြောင်း ပြောဆိုခဲ့ကြောင်း သိရသည်။
ထို့နောက် ဝင်းပိုင်စိုးက အသင့်ယူဆောင်လာသည့် တူဖြင့် ဦးမျိုးတင့်၏ ငယ်ထိပ်အား ထုနှက်ကာ ငွေထုပ်တစ်ထုပ်ကို လုယူထွက်ပြေးခဲ့ကြောင်း သိရသည်။ လုယက်ခံရသည့် ငွေပမာဏမှာ ခန့်မှန်းအားဖြင့် ကျပ်သိန်း ၄၀ ကျော်ရှိကြောင်း သိရသည်။
ဖြစ်စဉ်အပြီး အခင်းဖြစ်ပွားရာအနီးရှိ ပြည်သူများက ဝိုင်းဝန်းလိုက်လံဖမ်းဆီးခဲ့ရာ ဝင်းပိုင်စိုးကို ရေကျော်လမ်းနှင့် လိပ်ကန်လမ်းဆုံအနီးတွင် ဖမ်းဆီးရမိခဲ့ကြောင်း သိရသည်။
လက်ရှိတွင် ကျူးလွန်သူဝင်းပိုင်စိုးအား အမှုဖွင့်အရေးယူနိုင်ရေးအတွက် စစ်ဆေးဆောင်ရွက်နေပြီး ဥပဒေနှင့်အညီ ဆက်လက်ဆောင်ရွက်လျက်ရှိကြောင်း ရဲတပ်ဖွဲ့နှင့် နီးစပ်သူများထံမှ သိရသည်။