မြန်မာနိုင်ငံမှ ဆရာတော်တစ်ပါးနှင့် လူပုဂ္ဂိုလ်တစ်ဦးအား အိန္ဒိယနိုင်ငံသို့ အကြိမ်ကြိမ် ဝင်ထွက်သွားလာခွင့်ရှိသော တစ်သက်စာဗီဇာပါဝင်သည့် ပြည်ပရှိ အိန္ဒိယနွယ်ဖွား သက်သေခံကတ်ပြား (OCI Card) များကို ထုတ်ပေးခဲ့ကြောင်း မြန်မာနိုင်ငံဆိုင်ရာ အိန္ဒိယသံရုံးက ထုတ်ပြန်သည်။
၂၀၂၆ ခုနှစ် ဇွန်လ ၄ ရက်နေ့တွင် မြန်မာနိုင်ငံဆိုင်ရာ အိန္ဒိယသံအမတ်ကြီး Abhay Thakur သည် မန္တလေးမြို့၌ ကျင်းပသော အခမ်းအနားတွင် ဆရာတော် ဒေါက်တာပညာသာမိထံ OCI ကတ်ကို ဆပ်ကပ်ခဲ့ကြောင်း သိရသည်။
အဆိုပါ အခမ်းအနားသို့ မြန်မာနိုင်ငံလုံးဆိုင်ရာ ဟိန္ဒူဗဟိုကောင်စီ၊ Sanatan Dharma Swayamsevak Sangh နှင့် Arya Samaj တို့မှ ကိုယ်စားလှယ်များ တက်ရောက်ခဲ့ကြသည်။
ထို့ပြင် ပြင်ဦးလွင်မြို့တွင် ကျင်းပသည့် အခမ်းအနား၌ မန္တလေးတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်း (MRCCI) ဥက္ကဋ္ဌ ဦးတင်လတ်ထံသို့လည်း OCI ကတ် ပေးအပ်ခဲ့ကြောင်း သိရသည်။
ကောင်စစ်ဝန်ချုပ် Sundeep Kaushal သည်လည်း အခမ်းအနား နှစ်ရပ်စလုံးသို့ သံအမတ်ကြီးနှင့်အတူ တက်ရောက်ခဲ့သည်။
OCI ကတ်သည် အိန္ဒိယနိုင်ငံသို့ အကြိမ်ကြိမ် ဝင်ထွက်သွားလာခွင့်ရှိသည့် တစ်သက်စာဗီဇာအဖြစ် အသုံးပြုနိုင်ပြီး စီးပွားရေး၊ ကုန်သွယ်ရေး၊ ပညာရေးနှင့် ငွေကြေးဆိုင်ရာ လုပ်ငန်းများတွင် အခွင့်အလမ်းများ ရရှိစေကြောင်း သိရသည်။
OCI ကတ်လျှောက်ထားခြင်းနှင့် ပတ်သက်သည့် အသေးစိတ်အချက်အလက်များကို အိန္ဒိယအစိုးရ၏ OCI ဝန်ဆောင်မှု ဝက်ဘ်ဆိုက်တွင် ကြည့်ရှုနိုင်ကြောင်း အိန္ဒိယသံရုံးက အသိပေးထားသည်။
