မြန်မာ-အိန္ဒိယနှစ်နိုင်ငံ ဥပဒေပြုရေးအပါအဝင် လွှတ်တော်လုပ်ငန်းစဉ်များ၏ ကဏ္ဍစုံတွင် အဓိကထားပူးပေါင်းဆောင်ရွက်သွားလိုဟု ပြည်သူ့လွှတ်တော်ဥက္ကဋ္ဌပြော

ပြည်သူ့လွှတ်တော်ဥက္ကဋ္ဌဦးခင်ရီက မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီး H.E. Mr. Abhay Thakur အား ဇူလိုင် ၁၇ ရက်မွန်းလွဲပိုင်း၌ လက်ခံတွေ့ဆုံစဥ် အထက်ပါအတိုင်းဆွေးနွေးပြောကြားခဲ့ခြင်းဖြစ်သည်။

မြန်မာနိုင်ငံတွင် လွှတ်တော်နှစ်ရပ်ရှိရာ အိန္ဒိယနိုင်ငံနှင့် လွှတ်တော်ဖွဲ့စည်းမှုတူညီပြီး မြန်မာနိုင်ငံလွှတ်တော်တွင် လွှတ်တော်ငယ်များဟုတင်စားခေါ်ဆိုသည့် ကော်မတီ(၂၂)ခုဖွဲ့စည်းထား၍ လွှတ်တော်ကိုယ်စားလှယ်များစွမ်းဆောင်ရည်မြင့်မားရေးနှင့် လူ့စွမ်းအားအရင်း အမြစ်ဖွံ့ဖြိုးတိုးတက်ရေးအတွက် လွှတ်တော်နှစ်ရပ်ကြား ပူးပေါင်းဆောင်ရွက်နိုင်ရေးလုပ်ငန်းစဉ်များ တစ်ဆင့်တက်ဆောင်ရွက်ရန်ဆန္ဒရှိသည်ဟု ပြည်သူ့လွှတ်တော်ဥက္ကဋ္ဌက ပြောသည်။

ထို့ပြင် အိန္ဒိယနိုင်ငံ၏ Federalism စနစ်ကိုလေ့လာလိုကာ နှစ်နိုင်ငံအစိုးရချင်း ချစ်ကြည်ရင်းနှီးမှုရှိ၍ လွှတ်တော်အချင်းချင်း ရင်းနှီးစွာထိတွေ့ဆောင်ရွက်ရေးကဏ္ဍကိုတိုးမြှင့်ဆောင်ရွက်လိုကာ ဥပဒေပြုရေးအပါအဝင် လွှတ်တော်လုပ်ငန်းစဉ်များ၏ ကဏ္ဍစုံတွင် အဓိကထားပူးပေါင်းဆောင်ရွက်လိုသည်ဟု ပြောသည်။

” အခု မြန်မာနိုင်ငံမှာပြုလုပ်နေသည့် အိန္ဒိယနိုင်ငံရဲ့ ဖွဲ့ စည်းပုံအခြေခံဥပဒေနဲ့ ဖက်ဒရယ်စနစ်ဆိုင်ရာအလုပ်ရုံဆွေးနွေးပွဲဟာ လွှတ်တော်နှစ်ရပ်ကြားပူးပေါင်းဆောင်ရွက်မှုရဲ့ တစ်စိတ်တစ်ပိုင်းလို့မှတ်ယူထားပါတယ်”ဟု ပြည်သူ့လွှတ်တော် ဥက္ကဋ္ဌက ပြောသည်။

ထို့နောက် အိန္ဒိယသံအမတ်ကြီးက လွှတ်တော်ကိုယ်စားလှယ်များအတွက် စွမ်းရည်မြှင့်တင်ရေးနှင့်ပတ်သက်၍ ဆက်လက်ပူးပေါင်းဆောင်ရွက်သွားမည်ဖြစ်ကာ လွှတ်တော်အချင်းချင်းထိတွေ့ဆက်ဆံရေးကိုလည်း အကူအညီပေးမည်ဟု ရှင်းလင်းပြောကြားခဲ့သည်။