ရန်ကုန်၊ ဇူလိုင်-၁၈
ကမ္ဘာ့သကြားဈေးနှုန်းများ ကျဆင်းနေခြင်းကြောင့် မြန်မာ့သကြားပို့ကုန် တင်ပို့မှုလျော့ကျနိုင်ပြီး ယင်း၏အကျိုးဆက်အဖြစ် ပြည်တွင်းသကြားဈေးနှုန်းများလည်း ဆက်လက်ကျဆင်းလျက်ရှိကြောင်း မြန်မာနိုင်ငံသကြားနှင့် ကြံထွက်ပစ္စည်းလုပ်ငန်းရှင်များအသင်းမှ သိရသည်။
ကမ္ဘာ့ဈေးကွက်တွင် သကြားဈေးနှုန်းများ လျော့ကျနေခြင်းကြောင့် မြန်မာ့သကြား၏ ယှဉ်ပြိုင်နိုင်စွမ်း ကျဆင်းလာကာ ပြည်ပဝယ်လိုအား လျော့နည်းခဲ့ပြီး ပို့ကုန်တင်ပို့မှုအပေါ် သက်ရောက်မှုများ ဖြစ်ပေါ်လျက်ရှိကြောင်း သိရသည်။
၂၀၂၅-၂၀၂၆ ကြံကြိတ်ရာသီကုန် မေလအထိ မြန်မာနိုင်ငံတွင် သကြားတန်ချိန် လေးသိန်းခန့် ထုတ်လုပ်နိုင်ခဲ့ပြီး ယင်းပမာဏမှာ ယခင်နှစ်ထက် ၁၀ ရာခိုင်နှုန်းကျော် လျော့ကျခဲ့ကြောင်း သိရသည်။
အချို့ဒေသများတွင် နယ်မြေအခြေအနေများကြောင့် ကြံများကို အချိန်မီ မကြိတ်ဝါးနိုင်ခဲ့ခြင်းသည်လည်း ထုတ်လုပ်မှုလျော့ကျရသည့် အကြောင်းရင်းတစ်ရပ်ဖြစ်ကြောင်း မြန်မာနိုင်ငံသကြားနှင့် ကြံထွက်ပစ္စည်းလုပ်ငန်းရှင်များအသင်းမှ တာဝန်ရှိသူတစ်ဦးကပြောသည်။
ပြည်တွင်း၌ နှစ်စဉ် သကြားစားသုံးမှုမှာ တန်ချိန် သုံးသိန်းခန့်ရှိပြီး ကျန်ပမာဏကို ပြည်ပသို့ တင်ပို့လျက်ရှိသည်။ ၂၀၂၅ ခုနှစ်အတွင်း မြန်မာ့သကြားပို့ကုန်မှာ တန်ချိန် ၉၀,၀၀၀ ကျော်ရှိခဲ့သော်လည်း ကမ္ဘာ့သကြားဈေးနှုန်း ကျဆင်းမှုကြောင့် ယခုနှစ်တွင် ပို့ကုန်ပမာဏမှာ ယခင်နှစ်ထက် ပိုမိုလျော့ကျနိုင်ကြောင်း အသင်းကဆိုသည်။
ကမ္ဘာ့သကြားဈေးနှုန်းမှာ ယခင်နှစ်က သကြားတစ်တန်လျှင် အမေရိကန်ဒေါ်လာ ၄၅၀ ဝန်းကျင်ရှိခဲ့သော်လည်း လက်ရှိတွင် အမေရိကန်ဒေါ်လာ ၄၀၀ ခန့်သာ ပေါက်ဈေးရှိနေကြောင်း သိရသည်။
ယင်းကြောင့် ပြည်ပသို့ မတင်ပို့နိုင်သည့် သကြားများသည် ပြည်တွင်းဈေးကွက်အတွင်း ရောင်းချနေရပြီး ရောင်းလိုအားမြင့်တက်လာသဖြင့် ပြည်တွင်းသကြားဈေးနှုန်းများလည်း ဆက်လက်ကျဆင်းလျက်ရှိကြောင်း သိရသည်။
