မီးလောင်မှုအတွင်း ဘိုးဘွားနှစ်ဦးကို အသက်စွန့်ကယ်တင်ခဲ့သူ ဦးချိုအား ဂုဏ်ပြုဆုငွေ ချီးမြှင့်မည်

သူရဲကောင်းဆန်သည့် လုပ်ရပ်အတွက် အလှူရှင်များနှင့် လူမှုကူညီရေးအသင်းက ဂုဏ်ပြု၊ မီးဘေးသင့်မိသားစုကိုလည်း ထောက်ပံ့မည်

မန္တလေးမြို့၊ ချမ်းမြသာစည်မြို့နယ်၌ ဖြစ်ပွားခဲ့သော ဂိုဒေါင်ဟောင်းမီးလောင်မှုအတွင်း အသက်အန္တရာယ်ကို မငဲ့ကွက်ဘဲ သက်ကြီးဘိုးဘွားဇနီးမောင်နှံအား ဝင်ရောက်ကယ်တင်ခဲ့သည့် အသက် (၆၆) နှစ်အရွယ် ဦးချိုအား အလှူရှင်များနှင့် ရွှေမေတ္တာလူမှုကူညီရေးအသင်းတို့က ဂုဏ်ပြုဆုငွေများ ချီးမြှင့်သွားမည်ဖြစ်ကြောင်း သိရသည်။

ဖြစ်စဉ်မှာ ဇူလိုင် ၆ ရက် နံနက်ပိုင်းက မန္တလေးမြို့ ၁၀၁A လမ်းနှင့် ၆၇A လမ်းထောင့်ရှိ ဂိုဒေါင်ဟောင်းတွင် မီးလောင်ကျွမ်းမှုဖြစ်ပွားစဉ် အတွင်း၌ အစောင့်အဖြစ် နေထိုင်နေသည့် သက်ကြီးဘိုးဘွားဇနီးမောင်နှံ ပိတ်မိနေခဲ့ခြင်းဖြစ်သည်။

ထိုစဉ် အနီးအနားတွင်ရှိသော ဦးချိုက မည်သည့်အကာအကွယ်ပစ္စည်းမျှ မပါရှိဘဲ မီးခိုးနှင့် မီးတောက်များကြားသို့ သုံးကြိမ်တိုင်တိုင် စွန့်စွန့်စားစား ဝင်ရောက်ကာ အဘိုးနှင့် အဘွားတို့ကို တစ်ဦးချင်းစီ ကယ်ထုတ်နိုင်ခဲ့ကြောင်း သိရသည်။

သို့သော် ကယ်တင်ခံခဲ့ရသည့် အဘိုးဖြစ်သူ ဦးတင်ထွန်း (၆၄ နှစ်) သည် မန္တလေးဆေးရုံကြီး၌ ဆေးကုသမှုခံယူနေစဉ် မီးလောင်ဒဏ်ရာ ပြင်းထန်မှုကြောင့် ကွယ်လွန်ခဲ့ပြီး အဘွားဖြစ်သူမှာ ဆက်လက်ဆေးကုသမှု ခံယူလျက်ရှိကြောင်း သိရသည်။

ဦးချိုသည် သမန်းကုန်းဘက်တွင် သန့်ရှင်းရေးလုပ်ငန်း လုပ်ကိုင်နေသူဖြစ်ပြီး ညပိုင်းတွင် ကော်ဖီဆိုင် လုံခြုံရေးဝန်ထမ်းအဖြစ်လည်း လုပ်ကိုင်လျက်ရှိကြောင်း သိရသည်။

ဦးချို၏ ရဲဝံ့စွာ အသက်စွန့်ကယ်တင်ခဲ့သည့် လုပ်ရပ်ကို ဂုဏ်ပြုသည့်အနေဖြင့် မရွှေလဲ့၏ မမကြီးမိသားစုက ဂုဏ်ပြုဆုငွေ ကျပ် (၁၀) သိန်း ချီးမြှင့်သွားမည်ဖြစ်ပြီး၊ မီးဘေးသင့် ဘိုးဘွားနှစ်ဦးအတွက်လည်း တစ်ဦးလျှင် ကျပ် (၅) သိန်းစီ၊ စုစုပေါင်း ကျပ် (၁၀) သိန်း ထောက်ပံ့လှူဒါန်းသွားမည်ဖြစ်ကြောင်း သိရသည်။