ဘာရိန်းနှင့် ကူဝိတ်ရှိ စစ်စခန်းများကို အီရန်က လက်တုန့်ပြန် တိုက်ခိုက်

ဟော်မုဇ်ရေလက်ကြားတွင် ရေနံတင်သင်္ဘောများတိုက်ခိုက်ခံရမှုကို လက်တုန့်ပြန်သည့်အနေဖြင့် အမေရိက,က အီရန်ကို စစ်ရေးတိုက်ခိုက်မှုများလုပ်ဆောင်ခဲ့သောကြောင့် ဗုဒ္ဓဟူးနေ့တွင် ဘာရိန်းနှင့် ကူဝိတ်နိုင်ငံရှိ အမေရိကန်စစ်စခန်းများကို ပစ်မှတ်ထားခဲ့ကြောင်း အီရန်တော်လှန်ရေးအစောင့်တပ်က ပြောကြားခဲ့သည်။
       
အတိမ်းအစောင်းမခံသော အပစ်အခတ်ရပ်စဲရေးအပေါ် နောက်ဆုံးထိုးနှက်ချက်အဖြစ် အစ္စလာမ်မစ်တော်လှန်ရေးအစောင့်တပ်ဖွဲ့က ဘာရိန်း၏ ပဉ္စမရေတပ်ခရိုင် ဘန်ဒါဆယ်လ်မန်နှင့် ကူဝိတ်ရှိ အလီအယ်လ်ဆာလမ်လေတပ်စခန်းရှိ အမေရိက၏ အဓိကစစ်စခန်းများကို ဒုံးကျည်နှင့် ဒရုန်း ပူးတွဲစစ်ဆင်ရေးတစ်ခုပြုလုပ်ခဲ့ကြောင်းနှင့် စစ်ဆင်ရေးကို ဝင်ရောက်နှောင့်ယှက်ရန်ကြိုးပမ်းသည် အမေရိက MQ-9 ဒရုန်းတစ်စင်းကို ပစ်ချခဲ့ကြောင်း အစ္စလာမ်မစ်အစောင့်တပ်က ပြောကြားခဲ့သည်။
        
ဘာရိန်းနှင့် ကူဝိတ်တွင် လေကြောင်းတိုက်ခိုက်မှု သတိပေးဥသြသံများ ထွက်ပေါ်ခဲ့ပြီး လေကြောင်းကာကွယ်ရေးစနစ်များသည် ရန်လိုသော ဒုံးကျည်နှင့် ဒရုန်းတိုက်ခိုက်မှုများကို ရင်ဆိုင်ဟန့်တားနေကြောင်း ကူဝိတ်စစ်တပ်က ပြောကြားခဲ့သည်။ တိုက်ခိုက်မှုများနှင့် ပတ်သက်၍ လတ်တလောတွင် အမေရိကန်စစ်တပ်ထံမှ မှတ်ချက်ပေးခြင်းမရှိသေးပေ။
      
ရေလက်ကြားတွင် ရေနံတင်သင်္ဘောသုံးစင်းတိုက်ခိုက်ခံရမှုကို တုန့်ပြန်သည့်အနေဖြင့် အစောပိုင်းတွင် အမေရိက,က အီရန်ကို စစ်ရေးတိုက်ခိုက်မှုအသစ်များ ပြုလုပ်ခဲ့ပြီး အီရန်အပေါ် ရေနံရောင်းချခွင့်ပြုသည့် လိုင်စင်ကို ပြန်ရုပ်သိမ်းခဲ့သည်။
          
အပစ်အခတ်ရပ်စဲရေးကို ချိုးဖောက်ပြီး သင်္ဘောများကို တိုက်ခိုက်ခဲ့မှုအတွက် အီရန်ကို တန်ဖိုးကြီးကြီးပေးဆပ်ရစေ‌ရန် ရည်ရွယ်သည့် စစ်ဆင်ရေးအတွင်း ပစ်မှတ်များထဲတွင် တော်လှန်ရေးအစောင့်တပ်၏ ရေယာဉ်ငယ် ၆၀ ကျော်လည်း ပါဝင်ကြောင်း အမေရိကန်ဗဟိုကွပ်ကဲရေးဌာနက ပြောကြားခဲ့သည်။
         
အီရန်တပ်များ၏ အကြောင်းမဲကျူးကျော်မှုသည် အပစ်အခတ်ရပ်စဲရေးကို ပြောင်ပြောင်တင်းတင်းနှင့် အန္တရာယ်ရှိသော ချိုးဖောက်မှုတစ်ခုဖြစ်ပြီး ရေကြောင်းသွားလာရေးကို ထိခိုက်စေသည်ဟု ဗဟိုကွပ်ကဲရေးဌာနက ပြောကြားခဲ့သည်။

Ref: ရိုက်တာ