မသန်စွမ်းသူများ၏ ပညာသင်ကြားခွင့် တန်းတူရရှိရေးနှင့် ဘဝဘက်စုံဖွံ့ဖြိုးတိုးတက်ရေးကို အထောက်အကူပြုနိုင်ရန် ရည်ရွယ်၍ ရွှေမင်းသားဖောင်ဒေးရှင်း (မြန်မာ) က “Building Bridges by Breaking Barriers – 5B PWDs Scholarship Program” ပညာသင်ဆုအစီအစဉ်ကို ၂၀၂၆-၂၀၂၇ ပညာသင်နှစ်အတွက် အကောင်အထည်ဖော် ဆောင်ရွက်သွားမည်ဖြစ်ကြောင်း ဇွန် ၁၆ ရက်တွင် ထုတ်ပြန်ကြေညာသည်။
အဆိုပါ ပညာသင်ဆုအစီအစဉ်ကို မသန်စွမ်းအဖွဲ့အစည်းများ၏ ပူးပေါင်းပါဝင်မှုဖြင့် ဆောင်ရွက်ခြင်းဖြစ်ပြီး ပညာသင်ကြားရန် ငွေကြေးအထောက်အပံ့ လိုအပ်နေသည့် Grade 8 မှ Grade 12 အထိ ကျောင်းသား၊ ကျောင်းသူများနှင့် တက္ကသိုလ်တက်ရောက်နေသော မြန်မာနိုင်ငံသား မသန်စွမ်းသူများ လျှောက်ထားနိုင်ကြောင်း သိရသည်။
ပညာသင်ဆုအစီအစဉ်အရ Grade 8 မှ Grade 12 အထိ ကျောင်းသား၊ ကျောင်းသူများအား တစ်လလျှင် ကျပ် ၁၈၀,၀၀၀ နှုန်းဖြင့် စုစုပေါင်း ကိုးလစာ ထောက်ပံ့ပေးသွားမည်ဖြစ်သည်။
ထို့ပြင် တက္ကသိုလ် နေ့သင်တန်း ကျောင်းသား၊ ကျောင်းသူများအား တစ်လလျှင် ကျပ် ၂၀၀,၀၀၀ နှုန်းဖြင့် လစဉ်ထောက်ပံ့ပေးမည်ဖြစ်ပြီး တက္ကသိုလ် အဝေးသင်ကျောင်းသား၊ ကျောင်းသူများအား တစ်ဦးလျှင် ကျပ် ၆၀၀,၀၀၀ ကို နှစ်ကြိမ်ခွဲ၍ ထောက်ပံ့ပေးသွားမည်ဖြစ်ကြောင်း သိရသည်။
“5B PWDs Scholarship Program” ပညာသင်ဆုအတွက် လျှောက်လွှာများကို ဇွန် ၁၆ ရက်မှ ဇူလိုင် ၃ ရက်အထိ လက်ခံသွားမည်ဖြစ်ပြီး လူဦးရေကန့်သတ်ချက်ရှိသဖြင့် အချိန်မီ လျှောက်ထားကြရန်လည်း တိုက်တွန်းထားသည်။
ပညာသင်ဆုအစီအစဉ်နှင့် ပတ်သက်သည့် အသေးစိတ်အချက်အလက်များကို ရွှေမင်းသားဖောင်ဒေးရှင်း (မြန်မာ) ၏ လူမှုကွန်ရက်စာမျက်နှာတွင် ဝင်ရောက်ကြည့်ရှုနိုင်ကြောင်း သိရသည်။