ဩဂုတ်လအတွင်း ၇၁ ဦးစိစစ်ခဲ့ပြီး ၅၄ ဦးအား CI ထုတ်ပေးနိုင်
မလေးရှားနိုင်ငံ လူဝင်မှုကြီးကြပ်ရေးဌာနအောက်ရှိ ထိန်းသိမ်းရေးစခန်း ၁၅ ခုတွင် ထိန်းသိမ်းခံထားရသည့် မြန်မာနိုင်ငံသားများကို မြန်မာနိုင်ငံသို့ အမြန်ဆုံးပြန်လည်ပို့ဆောင်နိုင်ရေးအတွက် နိုင်ငံသားဖြစ်မှု စိစစ်ခြင်းနှင့် နေရပ်ပြန်လည်ပို့ဆောင်ရေးလုပ်ငန်းများ ဆောင်ရွက်လျက်ရှိကြောင်း ကွာလာလမ်ပူမြို့ရှိ မြန်မာသံရုံးက အသိပေးထားသည်။
ထိန်းသိမ်းခံထားရသူများအနက် ကိုယ်ပိုင်သဘောဆန္ဒဖြင့် နေရပ်ပြန်လိုကြောင်း တင်ပြလျှောက်ထားသူများကို မြန်မာနိုင်ငံသား ဟုတ်၊ မဟုတ် စိစစ်၍ သက်ဆိုင်ရာဝန်ကြီးဌာနများနှင့် ပူးပေါင်းကာ ပြန်လည်ပို့ဆောင်ရေး ဆောင်ရွက်နေခြင်းဖြစ်သည်။
၂၀၂၆ ခုနှစ် ဩဂုတ်လအတွင်း Melaka Camp လူဝင်မှုကြီးကြပ်ရေးထိန်းသိမ်းရေးစခန်းရှိ မြန်မာနိုင်ငံသား ၇၁ ဦးကို နိုင်ငံသားဖြစ်မှု စိစစ်ခဲ့ရာ အထောက်အထားပြည့်စုံသူ ၅၄ ဦးအား မည်သူမည်ဝါဖြစ်ကြောင်း သက်သေခံလက်မှတ် (Certificate of Identity-CI) ထုတ်ပေးနိုင်ခဲ့ပြီး ကျန် ၁၇ ဦးမှာ အထောက်အထားမပြည့်စုံသေးကြောင်း သံရုံးက စက်တင်ဘာ ၂၁ ရက်တွင် အသိပေးထုတ်ပြန်ခဲ့သည်။
အထောက်အထားမပြည့်စုံသေးသူများအတွက် မိသားစုဝင်၊ ဆွေမျိုးနှင့် မိတ်ဆွေများထံ ဆက်သွယ်၍ လိုအပ်သည့်အထောက်အထားများ ရယူခြင်း၊ သက်ဆိုင်ရာဝန်ကြီးဌာနများသို့ အချက်အလက်ပေးပို့၍ စိစစ်အတည်ပြုခြင်းတို့ကို လုပ်ထုံးလုပ်နည်း၊ စည်းမျဉ်းစည်းကမ်းများနှင့်အညီ ဆက်လက်ဆောင်ရွက်သွားမည်ဖြစ်သည်။
စခန်းအလိုက် ပထမအဆင့် နိုင်ငံသားစိစစ်နိုင်သူစာရင်း၊ နေရပ်ပြန်လည်ပို့ဆောင်မည့် လူဦးရေ၊ နေ့ရက်၊ အချိန်နှင့် လေကြောင်းလိုင်းခရီးစဉ်အမှတ်တို့ကို မြန်မာသံရုံး၏ လူမှုကွန်ရက်စာမျက်နှာမှ ဆက်လက်အသိပေးသွားမည်ဖြစ်ကြောင်း သိရသည်။
ထို့ပြင် ထိန်းသိမ်းရေးစခန်းများရှိ မြန်မာနိုင်ငံသားများနှင့်ပတ်သက်၍ မိသားစုဝင်များထံ မဟုတ်မမှန်ပြောဆိုကာ ငွေကြေးလိမ်လည်တောင်းခံသည့် ဖြစ်စဉ်များရှိနေသဖြင့် မိသားစုဝင်များနှင့် နီးစပ်ရာအသိုက်အဝန်းများအနေဖြင့် အထူးသတိပြုကြရန်လည်း မြန်မာသံရုံးက အသိပေးထားသည်။