လူငယ်ကစားသမားသစ်များနှင့် စီနီယာကစားသမားများ ပေါင်းစပ်ရွေးချယ်
ရန်ကုန်၊ စက်တင်ဘာ ၂၁
FIFA ASEAN Cup 2026 ပြိုင်ပွဲ ဝင်ရောက်ယှဉ်ပြိုင်မည့် မြန်မာ့လက်ရွေးစင်အသင်း လူစာရင်းကို ထုတ်ပြန်လိုက်ရာ လူငယ်ကစားသမားသစ်များနှင့် အတွေ့အကြုံရှိ စီနီယာကစားသမားများ ပေါင်းစပ်ပါဝင်လာကြောင်း သိရသည်။
Head Coach Jörn Andersen ဦးဆောင်မည့် မြန်မာ့လက်ရွေးစင်အသင်း လူစာရင်းတွင် ကောင်းခန့်ကျော်၊ မိုးဆွေနှင့် ပြည့်စုံအောင်တို့သည် FIFA ASEAN Cup အတွက် စီနီယာလက်ရွေးစင်အသင်း လူစာရင်း၌ ပထမဆုံးအကြိမ် ပါဝင်လာကြခြင်းဖြစ်သည်။
ကောင်းခန့်ကျော်သည် မကြာသေးမီက မြန်မာယူ-၂၀ အသင်းနှင့်အတူ ယှဉ်ပြိုင်ခဲ့သည့် ခြေစစ်ပွဲများတွင် ခြေစွမ်းပြသနိုင်ခဲ့ပြီးနောက် စီနီယာလက်ရွေးစင်အသင်းသို့ ပထမဆုံးအကြိမ် ရွေးချယ်ခံခဲ့ရခြင်းဖြစ်သည်။
မိုးဆွေသည် သက်တမ်းအလိုက် လူငယ်လက်ရွေးစင်အသင်းများတွင် ပါဝင်ကစားခဲ့သူဖြစ်ပြီး ပြည့်စုံအောင်မှာလည်း ယူ-၁၆ နှင့် ယူ-၁၉ လူငယ်လက်ရွေးစင်အသင်းများတွင် ရွေးချယ်ခံခဲ့ရဖူးသူဖြစ်သည်။
ထို့အပြင် ရှိုင်းဝဏ္ဏအောင်နှင့် မြတ်ဖုန်းခန့်တို့သည်လည်း ယခုနှစ်အတွင်း စီနီယာလက်ရွေးစင်အသင်း၌ ဆက်တိုက်ပါဝင်လာခဲ့ကြသည်။
သို့သော် အတွေ့အကြုံရှိ ကစားသမားများဖြစ်သည့် မောင်မောင်လွင်နှင့် ဟိန်းဖြိုးဝင်းတို့မှာ ဒူးဒဏ်ရာများကြောင့် FIFA ASEAN Cup 2026 လူစာရင်းတွင် ပါဝင်နိုင်ခြင်းမရှိကြောင်း သိရသည်။
မြန်မာ့လက်ရွေးစင်အသင်းသည် FIFA ASEAN Cup 2026 ပြိုင်ပွဲ Group B တွင် ကမ္ဘောဒီးယား၊ တီမော-လက်စတေတို့နှင့်အတူ ကျရောက်နေပြီး အုပ်စုအဆင့် ပထမပွဲအဖြစ် စက်တင်ဘာ ၂၄ ရက် မြန်မာစံတော်ချိန် ညနေ ၆ နာရီခွဲတွင် တီမော-လက်စတေအသင်းနှင့် စတင်ယှဉ်ပြိုင်မည်ဖြစ်သည်။
ထို့နောက် စက်တင်ဘာ ၂၇ ရက် ညနေ ၄ နာရီခွဲတွင် ကမ္ဘောဒီးယားအသင်းနှင့် ဆက်လက်ယှဉ်ပြိုင်မည်ဖြစ်သည်။
Group B ၌ ပထမနေရာရရှိသည့်အသင်းသည် Group A မှ ပထမနေရာရရှိသည့်အသင်းနှင့် အောက်တိုဘာ ၃ ရက်တွင် ဗိုလ်လုပွဲ ယှဉ်ပြိုင်ရမည်ဖြစ်ကြောင်း သိရသည်။