ဟောလိဝုဒ်နာမည်ကျော်မင်းသား အယောင်ဆောင်ထားသည့် လိမ်လည်လှည့်ဖြားသူများကြောင့် ပြင်သစ်အမျိုးသမီးတစ်ဦး ဘဝပျက်ခဲ့ရသည့်အတွက် အယောင်ဆောင်လှည့်စားမှုများကို သတိထားကြရန် ဘရက်ပစ်၏ အေးဂျင့်က ပရိသတ်များကို သတိပေးလိုက်သည်။
အသက် ၅၃ နှစ်အရွယ် ပြင်သစ်သူက သူသည် ပစ်နှင့် ချစ်ကြိုက်နေခဲ့ပြီဟု ယုံကြည်နေခဲ့ကြောင်း ပြင်သစ် TF1 ရုပ်သံလိုင်းကို ပြောကြားခဲ့ပြီး သူသည် ခင်ပွန်းဖြစ်သူနှင့်ပင် ကွာရှင်းပြတ်စဲခဲ့ကာ လိမ်ညာသူများကို ယူရို ၈၃၀၀၀၀ (ဒေါ်လာ ၈၅၀,၀၀၀) လွှဲပေးခဲ့သည်ဟု ဆိုခဲ့သည်။
“လူလိမ်တွေဟာ နာမည်ကျော်တွေနဲ့ ပရိသတ်တွေရဲ့ ခိုင်မာတဲ့ ချိတ်ဆက်ဆက်ဆံမှုကို အခွင့်ကောင်းယူကြတာ အတော်ဆိုးပါတယ်” ဟု “Fight Club” actor အတွက် ပြောရေးဆိုခွင့်ရှိသူက အင်္ဂါနေ့တွင် Entertainment Weekly ကို ပြောဆိုခဲ့သည်။
အထူးသဖြင့် ပစ် ကဲ့သို့ ဆိုရှယ်မီဒီယာအသုံးပြုခြင်းမရှိသော သရုပ်ဆောင်များထံမှဆိုကာ အွန်လိုင်းမှ လိမ်လည်ဆက်သွယ်မှုများကို မတုန့်ပြန် အရေးကြီးသည့် သတိပေးချက်တစ်ခုဖြစ်သည်ဟု ပြောရေးဆိုခွင့်ရှိသူက ဆက်လက် ပြောဆိုခဲ့သည်။
လူလိမ်များသည် ဆိုရှယ်မီဒီယာနှင့် WhatsApp အကောင့်အတုများအပြင် AI ရုပ်ပုံဖန်တီးမှုနည်းပညာကိုသုံးကာ အော်စကာဆုရှင်မင်းသား၏ ဆဲလ်ဖီပုံနှင့် မက်ဆေ့ချ်များ အမျိုးသမီးထံ ပေးပို့ခဲ့ကြသည်။
ငွေလိမ်ရန်အတွက်မူ အသက် ၆၁ နှစ်အရွယ်မင်းသားသည် ကျောက်ကပ်ကုသရန် ငွေလိုနေကြောင်း အယုံသွင်းပြီး ဇနီးဟောင်း အန်ဂျလီနာဂျိုလီနှင့် ကွာရှင်းပြတ်စဲခဲ့၍ သူ၏ ဘဏ်စာရင်းများ ပိတ်ခံထားရကြောင်း ဟန်ဆောင်ခဲ့သည်။
Anne ဟုသာ အမည်ဖော်ပြခဲ့သော အဆိုပါ အမျိုးသမီးသည် ပစ် နှင့်ဆက်သွယ်နေသည်ဟု တစ်နှစ်ခွဲကြာအောင် လိမ်ညာခံခဲ့ရကြောင်းနှင့် ပစ်နှင့် ရည်းစားဖြစ်သူ Ines de Ramon တို့၏ အချစ်ရေးသတင်းများထွက်လာမှသာ သူအလိမ်ခံနေရသော အဖြစ်မှန်ကို သိရှိခဲ့ခြင်းဟု ဆိုသည်။
Ref: ဘန်ကောက်ပို့စ်