မန္တလေးတိုင်း၊ မတ္တရာမြို့နယ်ရှိ ဆည်တော်ကြီးရေလှောင်တမံသည် မိုးသည်းထန်စွာရွာသွန်းမှုကြောင့် သြဂုတ် ၅ ရက်တိုင်းထွာချက်အရ ကန်ရေပြည့်မှတ်ဖြစ်သော(၄၁၉ ဒသမ ၅)ပေသို့ရောက်ရှိခဲ့ကြောင်း သိရသည်။
ထိုသို့ ကန်ရေပြည့်မှတ်သို့ရောက်ရှိနေသဖြင့် ဆည်ရေပိုလွှဲရေတံခါးများကိုထိန်းညှိ၍ ရေလွှတ်ခဲ့ရာ ယနေ့ သြဂုတ် ၆ ရက်နံနက် ၁၀ နာရီတိုင်းတာချက်အရ ရေအမှတ်(၄၁၉ ဒသမ ဝ)ပေသို့ပြန်လည်ရောက်ရှိခဲ့သဖြင့် ကန်ရေပြည့်မှတ်အောက်လျော့ကျလာခဲ့ကြောင်း သိရသည်။
လက်ရှိအချိန်၌ ဆည်တော်ကြီးရေလှောင်တမံ၏ ရေထိန်းတံခါး(၇) ပေါက်မှ တံခါးနံပါတ်(၂၊ ၃၊ ၄၊ ၅၊ ၆) တို့အား (၂)ပေစီ၊ ရေတံခါးနံပါတ်(၁) နှင့် (၇)တို့အား (၁)ပေစီထုတ်လွှတ်ထားရသဖြင့် ချောင်းမကြီးဘေးဝဲ/ယာရှိ အထက်တောင်ကိုင်းကျေးရွာ၊ ကျွဲကျကျေးရွာ၊ ရှားစေးချက်ကျေးရွာနှင့် တံငါ(မြောက်)ကျေးရွာတို့ရှိ အနိမ့်ပိုင်းနေရာများတွင် ရေများဝင်ရောက်လျက်ရှိကြောင်း သိရသည်။
ထို့ပြင် တံငါ(တောင်)ကျေးရွာ မန္တလေး-မိုးကုတ်ကားလမ်း၏ မိုင်တိုင်အမှတ် ၂၅/၄ နှင့် ၂၅/၆ ကြားတွင်လည်း နံနက် ၆ နာရီခွဲမှစတင်၍ ကားလမ်းမပေါ်သို့ (၆) လက်မခန့်ရေကျော်လျက်ရှိသဖြင့် မတ္တရာမြို့နယ်အတွင်း သဘာဝဘေးအန္တရာယ်များဖြစ်ပေါ်လာပါက ရှာဖွေကယ်ဆယ်ရေးလုပ်ငန်းများဆောင်ရွက်နိုင်ရန် မီးသတ်တပ်ဖွဲ့ဝင်များနှင့် မြန်မာနိုင်ငံလူမှုကယ်ဆယ်ရေးအဖွဲ့(မတ္တရာမြို့နယ်)တို့က ရှာဖွေကယ်ဆယ်ရေးအဖွဲ့များကိုအသင့်စုဖွဲ့ထားကြောင်း သိရသည်။