လုံခြုံရေးအရ လက်နက်ကိုင်ဆောင်ရန် လိုအပ်နေသည့် ပြည်သူများ၏ တောင်းဆိုမှုများရှိသည့်အတွက် မြန်မာနိုင်ငံတွင် လိုင်စင်ဖြင့် လက်နက်ကိုင်ဆောင်ခွင့်ပြုရန် စီစဉ်ရခြင်းဖြစ်ကြောင်း နစက ပြောရေးဆိုခွင့်ရှိသူ၏ ပြောကြားချက်အရ သိရသည်။
ယင်းကဲ့သို့ လက်နက်ကိုင်ဆောင်ခွင့်ပြုရာတွင်လည်း စည်းကမ်းစနစ်တကျ ကိုင်ဆောင်နိုင်မည့်သူများကို ဦးစားပေးအနေဖြင့် ခွင့်ပြုသွားမည်ဖြစ်ကြောင်းလည်း သိရသည်။
“ပြည်သူလူထုက သူတို့ရဲ့ လုံခြုံရေးအတွက် တောင်းဆိုလာတာတွေ ရှိပါတယ်။ကျွန်တော်တို့အနေနဲ့က တကယ့်ကိုပဲ မိမိကိုယ်ကိုယ် ခုခံကာကွယ်ဖို့ လိုအပ်နေတဲ့သူတွေ ၊ ခြိမ်းခြောက်မှု ခံနေရတဲ့သူတွေ ၊ လက်နက်နဲ့ ပတ်သက်ပြီးတော့ကျ စည်းကမ်းစနစ်တကျ ကိုင်နိုင်မယ့်သူတွေကိုပဲ အများအားဖြင့် ခွင့်ပြုသွားမှာဖြစ်ပါတယ် ခင်ဗျ” ဟု ဗိုလ်ချုပ်ဇော်မင်းထွန်းက ပေါ်ပြူလာနယူး(စ်)သို့ သီးသန့်အတည်ပြု ပြောကြားထားသည်။
မြန်မာနိုင်တွင် သာမန်အရပ်သားပြည်သူများ အပါအဝင် ဌာနဆိုင်ရာဝန်ထမ်းများ ၊ ပြည်သူ့စစ်များနှင့် ဌာနေလုံခြုံရေးအဖွဲ့များအား လုံခြုံရေးအတွက် လိုအပ်ပါက သေနတ်ကိုင်ဆောင်ခွင့်ပြုမည်ဟု နစကက ဇန်နဝါရီ (၃၁) ရက် ရက်စွဲဖြင့် ထုတ်ပြန်ကြေညာခဲ့ခြင်း ဖြစ်သည်။
အဆိုပါ အမိန့်ထုတ်ပြန်ချက်အရ အသက် (၁၈) နှစ်ပြည့်ပြီးသည့် သာမန်သူများအနေဖြင့် လုံခြုံရေးအရ ခုခံကာကွယ်ရန် လိုအပ်ပါက လိုင်စင်ဖြင့် သေနတ်ကိုင်ဆောင်ခွင့်ပြုမည်ဖြစ်ပြီး အစိုးရဝန်ထမ်းများနှင့် ပြည်သူ့စစ်များ ၊ ဌာနေလုံခြုံရေးအဖွဲ့များအနေဖြင့် ပါမစ်ဖြင့် သေနတ်ကိုင်ဆောင်ခွင့်ပြုမည်ဖြစ်ကြောင်း သိရသည်။
လိုင်စင်ကြေးအနေဖြင့်လည်း ထိုက်သင့်သည့် ငွေကြေးပမာဏဖြင့်သာ သတ်မှတ်ပေးထားပြီး အသေးစိတ်ကို လိုင်စင်လျှောက်ထားသည့် အချိန်ရောက်မှသာ ရှိခွင့်ရှိမည်ဖြစ်ကြောင်းလည်း နစက ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောသည်။
ယခင်က ရှိနှင့်ပြီးသား လိုင်စင်မဲ့သေနတ်များကိုလည်း ဥပဒေ စည်းမျဉ်းစည်းကမ်းများနှင့်အညီ လိုင်စင်လျှောက်ထားနိုင်ပြီး ခွင့်ပြုထားသည့် စည်းမျဉ်းများနှင့်ညီညွတ်ပါက ခွင့်ပြုပေးသွားမည် ဖြစ်ကြောင်းလည်း သိရသည်။
“လိုင်စင်ဖြင့် ကိုင်ဆောင်ခွင့်ပြုသော သေနတ်အမျိုးအစားဆိုတာ ရှိပါတယ်။ အဲဒီအထဲမှာပါတဲ့ အမျိုးအစားဆိုရင် လိုင်စင်လျှောက်ထားလို့ ရပါတယ်” ဟု ၎င်းကဆိုသည်။
သေနတ်ဝယ်ယူရာတွင်လည်း အစိုးရထံမှ ဝယ်ယူသည်ဖြစ်စေ ၊ မိမိအစီအစဉ်ဖြင့် ဝယ်ယူ၍ ဖြစ်စေ ဝယ်ယူကာ လိုင်စင်လျှောက်ထားနိုင်ပြီး နောက်ပိုင်းတွင် လုံခြုံရေးကုမ္ပဏီများကဲ့သို့ ပုဂ္ဂလိက ကုမ္ပဏီများအား သေနတ်ရောင်းချခွင့်ပြုနိုင်ရန် စီစဉ်ဆောင်ရွက်သွားမည်ဖြစ်ကြောင်း သိရသည်။
ဇန်နဝါရီလ (၃၁) ရက်က ထုတ်ပြန်လိုက်သည့် လက်နက်ခဲယမ်းကိုင်ဆောင်ခွင့်မူနှင့် လက်နက်လိုင်စင်ပုံစံ အမှတ် (၁၆) အရ မြန်မာနိုင်ငံတွင် ကိုင်ဆောင်ခွင့်ပြုမည့် သေနတ်အမျိုးအစားများမှာ ၉ မမ အမျိုးအစား သေနတ်များ၊ (.၂၂) အမျိုးအစား သေနတ်၊ ရိုင်ဖယ်နှင့် စက်ကလေး အမျိုးအစား သေနတ်များ၊ အမဲလိုက်သေနတ်နှင့် လေသေနတ်အမျိုးအစားများ ပါဝင်ကြောင်း သိရသည်။
ယင်းကဲ့သို့ လိုင်စင်၊ ပါမစ်ဖြင့် ကိုင်ဆောင်ခွင့်ပြုသည့် သေနတ်များတွင် အဝေးကြည့်မှန်ပြောင်း(Telescopic Sight)၊အထူးပြုလုပ်ထားသော ချိန်ဆိုဒ်အမျိုးမျိုး (Types of Modified Sights)၊အသံတိတ်စေသောကိရိယာ (Silencer) ကိရိယာများ တပ်ဆင်အသုံးပြုခြင်းကို လုံးဝခွင့်မပြုကြောင်း သိရသည်။