နိုင်ငံတကာပြိုင်ပွဲများတွင် ရလဒ်ကောင်းများရရှိနိုင်ရေး ဆောင်ရွက်မည်
မြန်မာနိုင်ငံတွင် ဖူဆယ်အားကစား ဖွံ့ဖြိုးတိုးတက်ရေးနှင့် နိုင်ငံတကာပြိုင်ပွဲများ၌ အောင်မြင်မှုပိုမိုရရှိစေရေးအတွက် မြန်မာနိုင်ငံဘောလုံးအဖွဲ့ချုပ်(MFF)၏ ဖူဆယ်နှင့် သဲသောင်ပြင်ဘောလုံးကော်မတီ အစည်းအဝေး (၁/၂၀၂၆) ကို ဇွန် ၂၅ ရက် နံနက်ပိုင်းက MFF Futsal Stadium ရှိ အစည်းအဝေးခန်းမတွင် ကျင်းပခဲ့ကြောင်း သိရသည်။
ဆွေးနွေးမှုများအတွင်း ဖူဆယ်ပြိုင်ပွဲများ အောင်မြင်စွာ ကျင်းပနိုင်ရေး၊ ဖူဆယ်လက်ရွေးစင်အသင်းများ နိုင်ငံတကာပြိုင်ပွဲများတွင် ရလဒ်ကောင်းများရရှိနိုင်ရေး၊ ပြည်နယ်နှင့် တိုင်းဒေသကြီးများတွင် ဖူဆယ်အားကစား ပိုမိုဖွံ့ဖြိုးလာစေရေးတို့ကို အဓိကထား ဆွေးနွေးခဲ့ကြသည်။
ထို့အပြင် အာဆီယံ အမျိုးသမီး ယူ-၁၉ ဖူဆယ်ပြိုင်ပွဲအတွက် ပြင်ဆင်ဆောင် ရွက်နေမှု အခြေအနေများ၊ ၂၀၂၆ ခုနှစ်အတွင်း ကျင်းပရန်ကျန်ရှိသည့် ဖူဆယ်ပြိုင်ပွဲများ၏ ပြက္ခဒိန်ရေးဆွဲအတည်ပြုခြင်း၊ AFC လိုင်စင်ရ နည်းပြသင်တန်းများ ဖွင့်လှစ်နိုင်ရေးနှင့် ဖူဆယ်လက် ရွေးစင်အသင်းများအတွက် နည်းပြအဖွဲ့နှင့် Technical Team များ ဖွဲ့စည်းနိုင်ရေးတို့ကိုလည်း ဆွေးနွေးဆုံးဖြတ်ခဲ့ကြသည်။
ယင်းအပြင် ၂၀၂၅ ခုနှစ်အတွက် ဘဏ္ဍာ ရေးရှင်းတမ်းဆိုင်ရာ ကိစ္စရပ်များကိုလည်းအစည်းအဝေးတွင် တင်ပြဆွေး နွေးခဲ့ကြောင်း သိရသည်။
အစည်းအဝေးသို့ ဖူဆယ်နှင့် သဲသောင်ပြင်ဘောလုံးကော်မတီ ဥက္ကဋ္ဌ ဦးဝင်းသော်၊ မြန်မာနိုင်ငံဘောလုံးအဖွဲ့ချုပ် အထွေထွေအတွင်းရေးမှူး ဦးထွန်းထွန်းအောင်၊ ဖူဆယ်လိဂ်ကော်မတီ ဥက္ကဋ္ဌ ဦးကြည်မင်းသိန်း၊ ကော်မတီဒုတိယဥက္ကဋ္ဌ ဦးနိုင်သောင်းထိုက်နှင့် ဘောလုံးအဖွဲ့ချုပ်၊ ဖူဆယ်နှင့် သဲသောင်ပြင်ဘောလုံးကော်မတီမှတာဝန်ရှိသူများ တက်ရောက် ခဲ့ကြသည်။
ထို့ပြင် ကော်မတီဒုတိယဥက္ကဋ္ဌ ဦးဖြိုးမောင်မောင်နှင့်တိုင်းဒေသကြီး၊ ပြည်နယ်အသီးသီးရှိ ဆပ်ကော်မတီဥက္ကဋ္ဌများ၊ ကော်မတီဝင်များကလည်း အွန်လိုင်းမှတစ်ဆင့် ပါဝင်တက်ရောက်ခဲ့ကြသည်။