ပေါင်းလောင်းရေလှောင်တမံအောက်ဘက်ရှိဒေသများ ရေကြီးရေလျှံမှုအတွက် စိုးရိမ်ဖွယ်ရာမရှိ

နေပြည်တော်၊ စက်တင်ဘာ ၂

နေပြည်တော် ဇေယျာသီရိမြို့နယ်ရှိ အောက်ပေါင်းလောင်း ရေလှောင်တမံသည် လက်ရှိတွင် ရေဝင်ရောက်မှုနှင့် သိုလှောင်မှုကို ဟန်ချက်ညီ ထိန်းသိမ်းထားနိုင်သဖြင့် တမံအောက်ဘက်ဒေသများနှင့် စစ်တောင်းမြစ်တစ်လျှောက် ရေကြီးရေလျှံမှု ဖြစ်ပေါ်ရန်မရှိကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ သိရသည်။

လက်ရှိတွင် အောက်ပေါင်းလောင်းတမံ၌ ဟိုက်ဒရောလစ် ရေမြှင့်ရေတံခါး (HED) ၁၀ ရွက် ဖွင့်လှစ်ထားရှိပြီး ပေါင်းလောင်းရေလွှဲဆည် (အဝေရာရေလွှဲဆည်) မှတစ်ဆင့် ရေလမ်းကြောင်း ထိန်းညှိ ဆောင်ရွက်လျက်ရှိသည်။ သို့ဖြစ်ရာ ရေဝေရေလဲဒေသများနှင့် မြစ်ဝှမ်းတစ်လျှောက် ထူးကဲစွာ မိုးသည်းထန်စွာ ရွာသွန်းခြင်း မရှိပါက ဒေသတွင်း ဘေးကင်းလုံခြုံမှုရှိကြောင်း သိရသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်သည် စက်တင်ဘာ ၁ ရက် နံနက်ပိုင်းက အောက်ပေါင်းလောင်း ရေလှောင်တမံသို့ သွားရောက်၍ တမံအတွင်း ရေဝင်ရောက်မှု၊ ကြံ့ခိုင်မှုနှင့် ရေပိုလွှဲမှ ရေကျော်စီးဆင်းမှု အခြေအနေများကို ကွင်းဆင်းစစ်ဆေးခဲ့ပြီး တမံလုံခြုံရေးနှင့် သတိပေးအချက်ပြစနစ်ဆိုင်ရာများကို မှာကြားခဲ့သည်။

အောက်ပေါင်းလောင်း ရေလှောင်တမံသည် တည်ဆောက်ခဲ့သည့် ၂၁ နှစ်တာကာလအတွင်း ရေပိုလွှဲမှ ၁၈ ကြိမ် ရေကျော်စီးဆင်းခဲ့ဖူးသည်။ ၂၀၂၄ ခုနှစ်အတွင်းက ရာဂီမုန်တိုင်းအရှိန်ကြောင့် ရေပိုလွှဲမှ ၁၁ ပေကျော်အထိ ရေကျော်စီးဆင်းကာ ရေကြီးမှု ကြုံတွေ့ခဲ့ရသော်လည်း လက်ရှိတွင် တမံကြံ့ခိုင်ရေးအတွက် စိုးရိမ်စရာ မရှိကြောင်း သိရသည်။

အဆိုပါ တမံသည် မူလကန်ရေပြည့် ရေလှောင်ပမာဏ ၅ ဒသမ ၄၉ သိန်း ဧကပေရှိပြီး HED တံခါးရွက် ၂၀ တပ်ဆင်ထားမှုကြောင့် ရေဧကပေ ၂၁,၀၀၀ ပိုမိုသိုလှောင်နိုင်ကာ နှစ်စဉ် ရေအားလျှပ်စစ် ယူနစ် ၉၁၉ သန်း ထုတ်လုပ်ပေးလျက်ရှိသည်။

သက်ဆိုင်ရာ ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာနကလည်း တမံများ၏ ရေသိုလှောင်မှု အခြေအနေများကို လူမှုမီဒီယာများမှတစ်ဆင့် အချိန်နှင့်တစ်ပြေးညီ သတင်းထုတ်ပြန်ပေးလျက်ရှိသည်။